ومنز افينوز
الستات كل يوم بتقابل صعوبات كتير تمنعها من انها تكون علي طبيعتها من غير قيود. ومنز افينوز بتوفر لستات مصر منصة للتسوق اونلاين عشان حياتها تبقي اسهل و يلبي كل احتياجاتها. مساحة امان تسمحلهم يحققوا طموحاتهم و يبقوا علي حريتهم. و بتوفرلنا مكان نحتفل فيه بقوتنا الناعمة اللي مش بتتعارض مع انوثتنا. الغرض من وجود ومنز افينوز هو تمكين المرأة و دعمها و هي بتكسر القوالب اللي المجتمع حابسها فيها.
خلفية
الموضوع بدأ لما احتجت اشتري حاجات مهمة و مكنش ينفع اسيب ابني لوحده و انزل اجيبها و ملقتهاش اونلاين. وقتها حسيت بالوحدة و الاحباط و اني مليش مكان محفوظ في المجتمع اللي انا عايشة فيه. و ده اللي طلع فكرة ومنز افينوز في دماغي، الحاجة لمكان محفوظ ليا و لكل الستات في المجتمع. كنت حاسة بالتعب و قلة الطاقة و انا ام و زوجة و شغالة علي بزنس بتاعي و باذاكر لماجستير و دكتوراة، كنت محتاجة تشجيع و ده خلاني احس قد ايه كل الستات محتاجة تشجيع قصاد كل الصعوبات اللي بتواجههم و هما بيحاولوا يحققوا حقوقهم العادية و احلامهم البسيطة، زي الشغل و تأسيس عيلة و المذاكرة او السعي ورا كارير او هواية، و ده شجعني اني اشتغل علي ومنز افينوز، عشان يدعمنا كلنا و يوفرلنا التشجيع اللازم.
اتجاهنا
هدفنا هو تمكين المرأة من خلال دعمها لتحقيق مجتمع نسائي صحي. موقعنا بيوفر منصة عرض و بيع اونلاين لكل الخدمات و المنتجات اللي تهم المرأة. سواء مشروع صغير او كبير، طالما صاحبته ست هندعمها و نوفرلها مساحة عرض عشان هدفنا الحقيقي هو توفير مساحة امنة لكل ستات العالم يقدروا فيها يشتغلوا و ياخدوا الدعم اللي يستحقوه. و كمان بنوفر كل انواع الدعم و المساعدة المعنوية عن طريق كتابنا المحترفين في مجالاتهم، و بنرحب دايما باي قصة او خبرة صاحبتها حابة تشاركها معانا.
منهجنا
درسنا السوق و اللي بيقدمه للستات في مصر و كمان احتياجات المرأة و اللي مفتقداه في المجتمع المصري و لقينا اننا محتاجين موقع واحد يكون منصة بتوفر الدعم الحقيقي الغير مشروط لكل الستات. موقع نعرض عليه خدماتنا و منتاجاتنا لو كنا اصحاب اعمال، او نشتري من عليه لو بندور علي حاجة. احنا محتاجين مجتمع نسوي يسمحلنا نكون بحريتنا و نناقش عليه الامور اللي تهمنا من غير قلق او احكام. في ومنز افينوز احنا جمعنا الاتنين مع بعض عشان نقدر نوفر كل اشكال الدعم من ابسط الاحتياجات لاكبرها.
