22 يونيو 2022 432 0  

10 عادات هتدمر بشرتك الدهنية:

 

البشرة الدهنية هي أكتر أنواع البشرات حساسية وتأثر من العوامل الخارجية، فهي بتتأثر عن طريق إفراز زيوت ودهون لامعة غير مرغوبة، ومع إهمالها بتزيد مشاكلها وبتطلع حبوب وبثور. وفيه شوية عادات غلط منتشرة ولو بتعمليها هتتسبب في زيادة مشاكل بشرتك الدهنية.

 

1- استخدام منتجات التقشير القوية بكثرة:

منتجات التقشير بتساعد على تقشير أول طبقات البشرة، وإزالة حبوب تحت الجلد. لكن استخدام منتجات التقشير القوية بإفراط هتتسبب في فتح مسام البشرة وبالتالي قابليتها للتعرض للبيكتيريا بشكل أكبر وظهور الحبوب والبثور البيضاء والسوداء. كمان الإفراط في استخدام منتجات التقشير هيؤدي لجفاف بشرتك الدهنية وبالتالي إفراز البشرة لكمية أكبر من الدهون.

2- عدم استخدام مرطب :

بعض الناس بتعتقد إن البشرة الدهنية مش محتاجة لمرطب لإنها بالفعل بتفرز زيوت ترطبها، بس ده مش حقيقي لإن البشرة لما بتتعرض لجفاف بتفرز كمية أكبر من الدهون. الصح هو استخدام مرطب مناسب للبشرة الدهنية.

3- استخدام كمية كبيرة من الماكياج:

البشرة الدهنية مع الوقت ومع ارتفاع درجة الحرارة بتتفتح مسامها بشكل أكبر، ومع استخدام كمية كبيرة من الميك اب ده هيؤدي إلى امتصاص البشرة لجزء من الميك اب اللي هيسد المسام ويسبب بثور وحبوب دهنية.

 

4- عدم إزالة الميك اب بشكل جيد قبل النوم:

عدم إزالة الميك اب هيؤدي لانسداد المسام وامتلائها بالبيكتيريا، ودي أفضل بيئة لظهور الحبوب والبثور.

الصح هو استخدام مزيل ميك اب وغسل الوجه بعدها بغسول طبي مناسب، واخر خطوة هي وضع مرطب مناسب للبشرة الدهنية.

 

5- استخدام غسول الوجه بكثرة:

الاستخدام المفرط لغسول البشرة بيعتبر من العادات الخاطئة في العناية بالبشرة الدهنية، لإن الكثرة في استخدامه هتسبب جفاف للبشرة وإيذاء حاجز البشرة الطبيعي، ودا هيخليها حساسة جدًا ومعرضة للحبوب والتصبغات. يفضل استخدام غسول البشرة مرة واحدة في اليوم للحفاظ على حاجز البشرة.

6- استخدام منتجات غير مناسبة لنوع البشرة:

 

كل حد فينا عنده بشرة مختلفة عن التاني، وطبيعتها كمان بتختلف، فبالتالي المنتجات المناسبة لكل بشرة مش هتكون واحدة!

استخدام منتجات غير مناسبة للبشرة الدهنية هتضرها وهتزود من حساسيتها وكمية الدهون اللي بتفرزها. عشان كدا بننصحك باستخدام منتجات مناسبة بس للبشرة الدهنية وده هتقدري تعرفيه عن طريق معلومات المنتج الموجودة على كل عبوة. والأفضل كمان استشارة طبيب جلدية لتحديد المنتجات المناسبة لنوع بشرتك.

كمان بننصحك قبل استخدام أي منتج جديد، إنك تجربيه على جزء من بشرتك عشان تشوفي إذا كان المنتج ده مناسب.

 

7- عدم الحصول على نوم صحي:

 

النوم مفيد للجسم كله، لإنه بيساعد على بناء البشرة في الفترة اللي بننام فيها، والتخلص من إصابات البشرة والتهاباتها اللي بتحصل طول اليوم، فبالتالي عدم الحصول على نوم كافي هيخلي بشرتك باهتة، كمان هيزود من الهالات السوداء وانتفاخات حول العينين.

وافتكري دايمًا إن أي عادة صحية بتعمليها.. بتنعكس بشكل إيجابي على البشرة وصحتها ونضارتها.

 

8- عدم استخدام واقي الشمس:

 

التعرض الكبير للشمس بشكل مباشر خصوصًا في أوقات الظهيرة بيخلي البشرة تمتص كمية كبيرة من الآشعة فوق البنفسجية والحرارة العالية. الآشعة فوق البنفسجية بتؤذي البشرة بشكل كبير وبتعرضها للإصابة بحروق الشمس، إفراز دهون بنسبة أكبر، تصبغات الجلد، واسمرار البشرة مع الوقت. عشان كدا لازم تحافظي على استخدام واقي شمس مناسب لبشرتك وتجدديه كل ساعتين.

9- التخلص من الحبوب بصورة خاطئة:

كتير مننا بينزعج من حجم الحبوب وشكلها، وناس كتير بتلجأ للتخلص منها عن طريق الضغط عليها بقوة أو استخدام إبرة البثور لفتح الحبوب وإخراج المادة البيضاء منها، وده طبعًا مش صح. لإن المادة اللي بتخرج من الحبوب بتقدر تتنتقل لباقي الوجه عن طريق العدوى، وده هيسبب زيادة الحبوب بدل التخلص منها، كمان هيؤدي إلى وجود آثار للحبوب والتصبغات اللي بياخدوا وقت في العلاج.

10- الاعتماد على نمط غذائي غير صحي:

النظام الغذائي من أهم العوامل اللي بتأثر على صحة بشرتنا، والاعتماد على نظام غذائي غير صحي زي الأكل الجاهز والأكل اللي فيه مواد حافظة، والوجبات الغنية بالدهون والأطعمة الحارة، بيساعد على ظهور الحبوب وزيادة دهون البشرة.
بننصحك بأكل وجبات متوازنة وغنية بالخضراوات عشان تساعد على الحفاظ على بشرتك ونضارتها.