02 أبريل 2020 2315 0  

ساعات بيكون صعب اننا نعرف اذا كانت القط عيان ولا بس كسلان. بغض النظر عن العلامات الخطيرة  ان القط مريض ،في تغييرات بسيطة في نظام قطك العادي ممكن تكون علامة علي مشاكل صحية عند القط،بس ممكن منلاحظهاش الا بعد ما الحالة تسوء.عشان كدة،لازم تاخدي بالك من تصرفات القط دايماً وتشوفي لو فيه حاجة مش مظبوطة،متتجاهليش أي تغير في نظام قطك العادي.ولو كنتي مش متأكدة لو فيه حاجة ولا لا،كلمي الدكتور.

جبنالك قايمة من thesprucepets.com بشوية علامات ممكن تقول ان قطك عيان.

1- الترجيع : في ناس كتير فاكرة أنه عادي ان القطط ترجع كل كام يوم،بس ده مش صحيح. الترجيع علي فترات طويلة أو ترجيع كرات الشعر ده مش حاجة مقلقة. بس لو الترجيع كان متكرر،لازم تكلمي الدكتور.

2- الأسهال : الأسهال ممكن يشير لمشاكل كتير، زي الطفيليات المعوية،العدوي البكتيرية او الفيروسية،ومشاكل تانية كتير. لو الاسهال متعالجش،ممكن يؤدي للجفاف والتهابات معوية أكتر.لو الاسهال استمر أكتر من يوم،كلمي الدكتور.

3- تغييرات في التبول: التغييرات في التبول مشكلة من المهم عدم تجاهلها،لأن بيكون معناها عادة ان في مشكلة في مجري البول أو في الكلي. لو لاحظتي تغيير في مرات او كمية البول عند القط،أو لو فيه دم في البول،استشيري الدكتور. أما لو كان القط بيحاول يتبول ومفيش حاجة بتنزل،دي ممكن تكون حالة طوارئ،خصوصاً في القطط الذكور،ولازم تاخدي قطك للدكتور في ساعتها؟

4- فقدان الشهية: فقدان الشهية ممكن يكون أمر معتاد عند القطط بس برضه مينفعش نتجاهله. لو القط رفض ياكل مرة ولا حاجة بس باقي الوقت بياكل عادي،يبقي محتاجة تتايعيه .أما لو القط بطل ياكل خالص أو بياكل كميات ضعيفة،لازم تكلمي الدكتور. عدم الأكل حتي لو لأيام قليلة ممكن يؤدي لمشاكل خطيرة .

5- تغيير في الوزن: التغيير في الوزن عند القطط حاجة مقلقة دايماً،سواء كانت زيادة أو نقصان في الوزن.لأن الاتنين ممكن يكونوا علامة علي مشاكل صحية.فقدان الوزن عامة أخطر علي المدي القريب بس زيادة الوزن أخطر علي المدي البعيد. لو كنتي قلقانة بخصوص وزن القط،روحي للدكتور للفحص.

6- تغييرات في التنفس: التغييرات في تنفس القط زي التنفس بصفارة،التنفس بسرعة، النهجان، كلها مشاكل مينفعش نتجاهلها.لو القط مش بيتنفس طبيعي،من الأفضل انك تروحي للطوارئ . لو علامات مشاكل التنفس بسيطة، حددي أقرب معاد مع الدكتور.

7- الخمول: الخمول دايماً علامة علي ان فيه مشكلة،حتي لو بسيط.كلمي الدكتور لو القط شكله همدان،بينام أكتر من الطبيعي،أو حساه مش قادر يعمل حاجة. ممكن يكون ده معناه ان في مشكلة صحية عند القط.

8- العطش : العطش الشديد ليه اكتر من معني عند القطط. معظم الوقت بيكون معناه ان فيه مشاكل في الكلي أو في مجري البول. كتير من اصحاب القطط مش متعودين يشوفوا قططهم بيشربوا. فلو ابتديتي تلاحظي ان قطك بقي يشرب أكتر من الأول،ده معناه ان فيه مشكلة.كلمي الدكتور وحددي معاد.

9- افرازات من العبن أو الأنف: الافرازات من العين او الأنف بيكون معناها ان فيه احتمال عدوي في الجهاز التنفسي. ده ممكن يخلي القط يشعر بالمرض ويبطل أكل.وممكن يكون معدي للقطط التانية الي في البيت.كلمي دكتورك عشان يكتبلك علي ادوية تساعد في  انه يتحسن بسرعة.

10- النونوة الزيادة: النونوة الزيادة ممكت يكون معناها ان القط عيان،في حاجة وجعاه، متوتر أو حتي زهقان. من المهم انك تستبعدي المشاكل الصحية قبل ما تحاولي تعرفي الجوانب السلوكية للنونوة.