05 فبراير 2020 2866 1  

10 نصايح للأمهات قبل الرجوع للشغل بعد الولادة

مش كل الأمهات بيقدروا يفضلوا في البيت مع البيبي بعد الولادة لمدة طويلة .كتير منهم بيبقي لازما يرجعوالشغلهم بعد تلات لأربع شهور من الولادة.ومع ذلك لو انتي مامي جديدة،لازم تحاولي تقعدي مع البيبي الجديد علي أد ما تقدر،ممكن تحاولي تشتغلي بارت تايم أومن البيت،ده هيخليكي تحافظي علي تقدمك في شغلك ،وفي نفس الوقت تفضلي مع البيبي.

في النهاية هتحتاجي تنزلي شغلك بعد فترة طالت أو قصرت،والموضوع ده مش بيكون سهل ابداً.مش من السهل انك تسيبي البيبي الجميل ده الي معتمد عليكي في كل حاجة لمدة طويلة كل يوم.

وعشان كدة جبنالك نصايح  تسهل عليكي الفترة الصعبة دي.

1-ابتدي بدري:

آخر حاجة محتاجاها هي انك متكونيش عارفة مين الي هيقعد مع البيبي،فابتدي التفكير في النقطة دي من بدري.ممكن حتي من قبل البيبي ما يتولد،خصوصاً لو بتفكري تسيبيه في حضانة ممكن يكون ليها قوائم انتظار.

2- اختاري المكان او الشخص الي هيعتني بطفلك كويس:

رجوعك للشغل هيكون اسهل بكتير لو كنتي واثقة من اختيارك في المكان او الشخص الي هيخلي باله من البيبي.لو هتوديه حضانة، اسألي لو ممكن تعدي عليهم في نص اليوم عشان تشوفي البيبي، بالطريقة دي هتكوني انتي والبيبي مرتاحين أكتر بخصوص المكان والناس الي فيه.

3- أعملي بروفات علي روتينك الجديد:

في الكام اسبوع الي قبل رجوعك للشغل، من المفيد انك تمارسي الروتين الجديد الي هيكون مطلوب منك ايام الشغل. زي انك تصحي بدري،تجهزي انتي والبيبي وتخرجوا من البيت في مواعيد محددة.ممكن تستغلي الjبروفات دي في انك تروحي الحضانة ال اختارتيها لو مطلوب منك تجيبي حاجات معينة للبيبي.

4- ارجعي بالتدريج:

لو ممكن ،حاولي تشتغلي أول اسبوع او اتنين بارت تايم. الفترة الانتقالية دي هتساعدك انتي والبيبي تتأقلموا علي انكم تبعدوا عن بعض وكمان هتساعدك تجربي روتين يومك الجديد وتظبطي أي لخبطة فيه قبل ما ترجعي شغلك بشكل كامل.

5- اطلبي من الحضانة تتابعك بأخبار البيبي:

أصعب حاجة في الرجوع للشغل طبعاً هي انك هتسيبي البيبي.أطلبي من الحضانة انها تبعتلك رسايل وصور للبيبي خلال اليوم. ولو حسيتي انك محتاجة انك تتصلي كل يوم عشان تتطمني عليه وتتابعي أخباره،متتكسفيش واتصلي. ده حقك كأم.

6- أتكلمي مع خبيرة رضاعة:

لو يتخططي انك تستمري علي الرضاعة الطبيعية بعد ما ترجعي شغلك،خبيرة الرضاعة هتقدر تساعدك في أي استفسارات تخص الرضاعة،ازاي تحافظي علي اللبن ،الشفط وانتي في الشغل،وازاي تحافظي علي ان اللبن ميقلش. 

7- خططي يومك من اليوم الي قبله

الليل هو وقت التخطيط الجديد بتاعك.خططي هتلبسي ايه،جهزي غداكي وشنطة البيبي،ورتبي كل حاجة لليوم التاني قبل ما تنامي.ده هيساعدك تخلي وقت الصبح أسهل كتير بالنسبالك (ويمكن حتي تلاقي وقت للفطار)

8- عودي البيبي علي البيبرونة:

 لو كنتي بترضعي طبيعي بس،ابتدي ادي البيبي ببرونة بلبن من صدرك كل فترة،عشان تتأكدي انه هياخدها.لو رفض ياخد الببرونة ،خلي باباه أو حد تاني يجرب معاه.وافضلي حاولي لحد ما البيبي يرضي يشرب منها.

9- متحسيش بالذنب:

سواءاً انتي الي اخترتي ترجعي للشغل،أو كنتي مضطرة،متسيبسش نفسك للاحساس بالذنب. أكتر من 75% من الأمهات بيشتغلوا برة البيت.رجوعك للشغل مش بيخليكي أم وحشة،فمتفكريش في كدة ولو لثانية واحدة.

10- جهزي الحاجات الي هتحتاجيها:

دي شوية حاجات ممكن تحتاجي تجيبيها قبل ما ترجعي للشغل:

- شفاط للبن االصدر: لو مكنتيش جبتي واحدة

-  بادز رضاعة زيادة: خليهم في مكتبك في الشغل.عشان تستخدميها لو اتلأخرتي عن معاد شفط اللبن وحسيتي ان صدرك هيبتدي ينزل لبن.

صورة للبيبي: في أمهات بتحس انها بتسهل عليهم غيابهم عن البيبي انهم يشوفوا صورته قدامهم علي المكتب. و فيه أمهات تانية بيزعجها وجود الصورة لأنه بيفكرها بأنها بعيدة عنه.جيبي واحد معاكي عشان لو حسيتي انك محتاجاها.

- وجبات صحية: لما ترجعي تاني للشغل وللطاحونة اليومية،ممكن تنسي بسهولة انك تاكلي وجبات منتظمة وصحية. خلي معاكي دايما وجبات صحية عشان متضطريش تشتري حاجة مش صحية متفيدش جسمك اثناء الرضاعة.

وجبات غداء :

لو كنتيي فاكرة انك بعد الولادة مبقاش عندك وقت تطبخي،استني لما تشوفي ايه الي هيحصل لما ترجعي كمان للشغل.هتبقي برة طول اليوم ووقت تحضير  الغدا الطبيعي غالباً هيضيع في الزحمة.جهزيكام أكلة وحطيهم في الفريزر قبل ما ترجعي للشغل عشان يبقي عندك حلول سريعة وقت الزنقة.