01 أبريل 2020 2836 0  

بعد فترة من الجواز والتعود علي العيشة مع بعض ، عادة بنقع في فخ الحياة الروتينية.كل حاجة بتفقد سحرها وكل حاجة بنعملها بتبقي مجرد روتين.حتي أصغر وأحلي التفاصيل بين العشاق ممكن تتحول لحاجة عادية. عشان نساعدك تتغلبي علي الملل والروتين الزوجي، جبنالك قائمة من خمس حاجات ممكن تعمليها عشان ترجعي الحرارة لعلاقتك الزوجية.

أول حاجة، محتاجة توافقي جوزك في كتير من الأوقات. اسمحيله بانه يفرح لما يحس انه علي حق. وافقيه علي أفكاره وطلباته. ده هيخليه يحس بالثقة والراحة في علاقتكم.ده غير انه هيخليهم يحسوا بالمسئولية.ده معناه برضه انك تقبلي لما يقولك علي حاجة لا،لأننا في العادي بنزعل لما الي بنحبه يرفض لنا طلب. لو وافقتي علي انه يرفض أحياناً، هيحس بأمان وتقدير وتفهم أكتر،وبالتالي هيقدر الكلام معاكي وهيحس بالراحه في التواصل معاكي.

تاني حاجة، انك تمدحي جوزك وتعاكسيه وتبعتيله رسايل من وقت للتاني دي دايماً فكرة كويسة.ده هيحرك حياتكم العاطفية وهيحافظ علي حرارة الحب بينكم ،زي الشرارة لو لقت حاجة تمسك فيها هتتحول لحريق.نفس الحكاية في حياتك العاطفية،لو حافظتي علي شرارة الحب بينكم هيتجاوب معاكي وهتبقي حياتكم رومانسية وممتعة أكتر.

تالت حاجة، لازم دايماً جوزك يشوفك في أحسن صورة.فكري اد ايه هتكون حاجة حلوة لو رجع من الشغل او صحي من النوم شافك لابسة حاجة جديدة وشيك،والبيت ريحته حلوة والحمام جاهز. من الأفضل دايما للزوج والزوجة انهم يحسسوا شريكهم انهم بيحبوهم يشوفوهم في أحسن صورة.

رابع حاجة ودي أشهر حاجة فيهم، أخرجوا سوا.سيبي الولاد مع مامتك أو مامته،او مع حد من أصحابك والبسي شيك وروحوا مكان لطيف.أعملوا حاجة مع بعض،روحوا سينما أو مسرح،أقعدوا دردشوا في مطعم أو كافيه.أتعرفوا علي بعض من جديد وقضوا وقت حلو مع بعض بعيد عن المسئوليات والمشاكل واتكلموا في مواضيع غير البيت والأولاد والفواتير.

خامس وأهم حاجة، كوني صديقة لجوزك.بالطريقة دي هتقدروا دايماً تتكلموا عن كل حاجة وتشاركوا بعض في كل تفاصيل حياتكم.ممكن تسهروا تضحكوا علي التفاصيل المضحكة الي حصلت في الشغل أو مع الولاد.لما تكونوا أصحاب،دايماً هتلاقوا حاجة تتكلموا وتضحكوا عليها.