21 يونيو 2020 2675 0  

 التكنولوجيا بقت اسرع مجال في العالم اليومين دول. بقت حيوية في حياة الناس، و فكرة ان حد يبطل تكنولوجيا بقت حاجة مستحيلة. لو مش الفيسبوك او باقي مواقع التواصل الاجتماعي، فهيبقي يوتيوب و باقي تطبيقات المشاهدة. مبقاش يعدي علينا يوم منستخدمش فيه اب تساعدنا في حاجة، سواء اكل او رياضة او جي بي اس. و مع ذلك، مبنسمعش بالساهل عن ستات متفوقة في مجال بالحجم ده! حاجة غريبة مش كدة؟ عشان كدة انهاردة قررنا نتكلم عن 5 اهم اهم ستات في المجال و نعرف الناس بيهم و باساميهم.

تريسي جريس:

تريسي جريس هي المديرة التنفيذية و رئيسة ايبيكس لخبراء الاي تي. دي شركة تعليم تقني بتدي تدريب متخصص للعاملين بالتكنولوجيا و هما في شغلهم و مواقعهم من غير ما يحتاجوا اجازات. تدريباتهم بتعتمد علي الخبرة و التجربة و الملاحظة. اشتغلت مع منظمات عالمية و مهمة زي ناسا، امازون، و وزارة الدفاع الامريكية.

الملهم في قصة تريسي انها مكنش عندها اي خبرة في التكنولوجيا. كانت بتشتغل في ادارة العمليات و المبيعات، بس لما لقت فرصة انها تعمل مشروع ناجح و مهم انتهزتها! احتكت من خلال شغلها باحتياج السوق للمهارات التقنية و ده اللي خلاها تأسس ايبيكس.

آن وتشيتسكي:

هي مديرة و شريكة في تأسيس ابليكيشن توينتي  ثري اند مي. الابليكيشن بتقدم خدمات صحية مخصصة لكل شخص علي حسب احتياجاته. الابليكيشن موجود من 2006 بس خطته ل2020  – 2030 واعدة. عشان هما ناويين يشاركوا اير بي ان بي في توقيت مهم جدا عشان يربطوا خدماتهم الطبية بسياحة المغامرة بصفته مجال منتشر و بيتطور عالميا الفترة دي. السبب التاني هو اهتمامهم بتطوير الادوية بما ان الخدمات الصحية المخصصة للافراد بقت منتشرة حاليا. قبل توينتي ثري اند مي، آن كانت بتشتغل في وال ستريت كمحللة صحية لعدد من الشركات المالية. و بعد كدة بقت باحثة بيولوجية و استخدمت نتايج ابحاثها في تأسيس الابليكيشن. و ده كان السبب اللي خلي شركة فاست تلقبها بانها اكتر شخص مبدع في الشركة. وكمان ساعدت في تحديد جايزة الاكتشاف العلمي لسيليكون فالي.

سيلينا توباكوالا:

شاركت في تأسيس شركة جكسو للصحة البدنية. بدأت مشوارها في شركة تكنولوجيا و استمرت في التقدم. اشتغلت نائب رئيس الهندسة في عدد من شركات التذاكر و الدعاوي و بعد كدة اكتشفت ان عندها فرصة كويسة انها تقدم كورسات فتنس اونلاين الناس تقدر تشارك فيها من البيت.أطلق عليها المركز الوطني للمرأة وتكنولوجيا المعلومات لقب البطلة الريادية. وفي رأيها  أن سنة  2020 هتكون وقت ازدهار  للشركات.

جوليا تايلور تشيك:

تشيك اسست ايفيرلي ويل. مشروعها بيوفر عدد التحليل المنزلي لحساسيات الطعام، وظايف الغدة الدرقية،هشاشة العظام و نقص فيتامين د و الالتهابات المختلفة. هدف الابليكيشن هو مساعدة الناس في التقليل من تكاليف التحاليل و الرعاية الصحية الغالية جدا. و ده نابع من احتياج تشيك في فترة من حياتها لخدمة زي دي. عدت عليها مرحلة من حياتها كانت مديونة ب 2000 دولار تمن تحاليل مستلمتش نتايجها لحد انهاردة! ايفيرلي ويل انهت جولة  تمويل بقيمة 50 مليون دولار في شهر ابريل عشان اسعارها في متناول الجمهور.وهي واحدة من المتألهين للتصفيات  النهائية لجايزة رواد الأعمال.

لوريتا جونز:

درست علم نفس و اشتغلت كمدير تنفيذي للتسويق في 6 شركات تكنولوجيا مختلفين قبل ما تنضم لفريق عمل ,ميكس ماكس ابليكيشن للايميلات تفوق علي جي ميل بمميزاته و اعداداته. البريد الإلكتروني  مكنش دايما  من السلع التقنية الأكثر شعبية ، بس ميكس ماكس  تحت إشراف جونز بينمو بمليارات الرسايل سنويًا ،  وده  بسبب عمليات التكامل و التشغيل الالي و  اللي جونز بتعتز بيها كعامل  لنمو التطبيق. باستخدام خلفيتها في علم النفس ، ساعدت  جونز في اكتساب أكثر من 10.000 مستخدم بشكل عضوي ، من غير أي تكلفة.

 

2020 كانت المفروض تبقي السنة اللي هتتكرم فيهم الستات دي، بس نظرا لظروف الكورونا محدش لسه عارف ايه اللي هيحصل. عموما، احنا متأكدين انهم هيفضلوا الاحسن في مجالاتهم. و نتمني نسمع اكتر عنهم الفترة الجاية.