27 أكتوبر 2022 184 0  

الأطفال دايمًا بيبقى عندهم قدرة كبيرة على التعلم، وشغف واسع في اكتشاف الأشياء، بس في أوقات الدراسة قدرتهم على التركيز بتكون أقل، وده بسبب ضغط يومهم من يوم المدرسة الطويل والتمرين وحل الواجب. عشان كده في المقال ده هنتكلم عن خطوات هتساعدك تطوري من مهارات المذاكرة والتركيز عند طفلك.

1- نحافظ على النظام الغذائي الصحي للطفل:
النظام الغذائي الصحي هو أساس صحة الأطفال النفسية والجسدية وكمان قدرتهم على التركيز. حافظي على إنك تدي لطفلك الأطعمة المفيدة زي الخضراوات المتنوعة والفواكه والمكسرات ومصادر البروتين زي البيض واللحوم الخالية من الدهون، لإنهم بيساعدوا في تنشيط الذاكرة وبيساعدوا على التركيز.

2- نحط جدول بمهام كل يوم:
تنظيم الأفكار بيساعد على تنظيم عقلنا كله. عشان كده لازم نعمل لطفلنا جدول بالأعمال اليومية اللي عليه زي إنه يروح المدرسة، يروح النادي، يخلص الواجب ويذاكر، يقرأ جزء من القرآن. ونشجعه على إنه يخلصه كل يوم. ده هيساعده على التعود وهيديله إحساس بالمسؤولية اللي عليه.

3- نفهم الطريقة اللي بتساعد الطفل على الاستيعاب بشكل أفضل:
الأطفال بيختلفوا عن بعض في أسلوب استيعابهم، زي الأسلوب البصري، أو السمعي، أو الحركي. ولما نحدد ده، هنقدر نحدد أفضل طريقة نساعد بيها الطفل على المذاكرة.

4- نساعدهم يكتبوا ملاحظات وقت المذاكرة:
الملاحظات والنقاط الملخصة بتساعد على فهم الدروس بشكل أحسن، عشان كده لازم نساعد الأطفال يكتبوا بنفسهم النقاط المهمة اللي في كل درس لإنها هتساعدهم على الفهم والحفظ بشكل مبسط.

5- نبعدهم عن الحاجات اللي بتشتتهم وقت المذاكرة:
وقت المذاكرة لازم يكون الأطفال ذهنهم صافي بشكل كويس، عشان كده لازم نخلي المذاكرة بعيدة عن أي مصادر للتشتيت زي التليفزيون أو الموبايل. ولازم نتأكد إنهم واخدين وجباتهم ونايمين كويس عشان وقت المذاكرة يكون كله طاقة وتركيز ومانخليهومش يفكروا في حاجة تانية أثناء المذاكرة.


6- نكتشف ايه أكتر مادة بيحبها:
أوقات الأطفال بتميل لبعض المواد الدراسية عن المواد التانية، عشان كده لازم نحاول نلاحظ إيه أكتر مادة بيحبها ونساعده يكون متفوق فيها.

7- نتكلم معاهم عن المستقبل والنجاح:
الأطفال قدرتهم على التخيل كبيرة، وقدرتهم على الأحلام كمان كبيرة، لازم طول الوقت نتكلم عن المستقبل والطموح والنجاح وقد ايه هيكونوا مبسوطين لما يقدروا يعملوا الحاجات اللي نفسهم فيها وقد ايه هيكونوا مبسوطين لما نكون فخورين بيهم والأهم من ده، يكونوا فخورين بنفسهم!