17 فبراير 2021 1367 0  

7 نصايح لتربية قارئ

من أول ما بتمسكي طفلك بين أيديكي بتبدأي تسمعي ناس كتير بتقولك أتكلمي معاه كتير و أقريله كتير بس مش ديماً اللي بيقولنا كده بيكون بيتكلم عن فعل القراءة نفسه أو تربية طفل بيحب الكتب لكن عشان يبدأ يتكلم بدري , بس محدش بيقولنا لو عايزة طفلي يطلع بيحب الكتب و القراءة نعمل ايه. ا
لقراءة هي أول خطوة من خطوات النمو الفكري لطفلك و بتساعدة يكون عنده قوة تركيز و ثقة في النفس و حصيلة لغوية كبيرة من سن صغير..
و عشان أول 6 سنين في حياة طفلك هي الفترة اللي بتتشكل فيها اتجاهاته و ميولة في الحياة فبالتالي هي أفضل فترة تبدأي تحببيه في الكتب و القراءة , بس مش كلنا بنكون عارفين نبدأ منين فـ دي شوية نصايح و خطوات تساعدك في تنشأة طفل قارئ:

1- إبدأي بدري : خصصي وقت هادي بينك و بين طفلك و اقرأيله بصوت عالي و هو لسه في شهورة الاولى , مفيش نوع معين ممكن تبدأي به ممكن تقرأيله كتاب عن الطبخ حتى لكن حاولي تكون الكلمات واضحة ده هيخلق عنده حب للقصص و الحكايات و هيوسع خياله.

2- أقرأيله على مدار اليوم : القراءة لطفلك قبل النوم هو المتعارف عليه و بتخلق نوع من الانسجام و الهدوء عند الاطفال أما القراءة خلال النهار فهي الافضل لزيادة التركيز , متتأيديش بوقت معين و استمتعي بالوقت اللي بتقضيه مع طفلك.

3- كوني قدوة : الأطفال بيكتسبوا أغلب عوايدهم من أهاليهم , لو طفلك شافك بتقرأي ديماً و مستمتعة هيبدأ يقلدك , و متكتفيش إنه يشوفك بتقرأي بس لكن كمان اتكلمي معاه عن اللي بتقرأيه و احكيله عن حاجه اتعلمتيها من الكتاب , ده هيربط عند طفلك القراءة بأكتشاف الأفكار و المعلومات الجديدة.

4- متجبريش طفلك: متخسريش متعة القراءة مع طفلك و فرصة حبه للكتب بأنك تجبريه يتعلم القراءة , في كل الأحوال هيتعلم يقرأ أول ما نموه الفكري يكتمل لكن لو حس أنه مجبر الاحساس ده هيفضل مسيطر عليه و القراءة هتكون اخر حاجه ممكن يفكر فيها في المستقبل.

5- حضري لطفلك مكتبتة الشخصية : الأطفال بيحبوا يكون عندهم حاجة خاصة بيهم هما بس و ده بيبدأ من أول اللعبة المفضلة عندهم , تعويد الطفل ان الكتاب من مقتنياته الشخصية هيخليه يحبوا اكتر و يحافظ عليه. أعملوا المكتبة مع بعض و خليه يختار شكلها معاكي و ده هيساعدة يقدر ياخد قرارته لوحده.

6- إحترمي أختياراته : أدي لطفلك مساحة أنه يختار الكتاب اللي عايزة حتى لو شايفة أنه مش بيضيف حاجة تربوية له متجبرهوش يقرأ حاجة مش حاببها لكن ممكن تقترحي عليه مواضيع مختلفه. و حاولي ديماً تديلله مساحته إنه يقول رأيه و تردي على اسألته في وقتها و بعدين ترجعوا تكملوا قراءة تاني

7- متوقفيش قراءة مع طفلك : بعد ما يبدأ يقرأ لوحده متسحبيش منه متعة القراءة معاكي و أحساس الدفء المصاحب للقراءة مع بعض , خليها عادة عندكم حتى لو مرة في الاسبوع و ديماً اتناقشي معاه في الكتب اللي بيقرأها. و دي أقتراحات لكتب ممكن تضيفها لمكتبة طفلك : 1. سلسة المغامرون الخمسة 2. سلسة رجل المستحيل 3. الأمير الصغير 4. البنت التي لا تحب أسمها 5. مرحباً .. هل من أحد هناك؟ 6. فندق الثعالب 7. صاحبي الجديد 8. سلمى و ليلى 9. ماتيلدا 10. اليس في بلاد العجائب