21 مارس 2021 1495 0  

صباح الخير .. وحشتوني، وحشتوني أوي. بقالي كتير ماقابلتكوش، لكن معلش هنتقابل كتير ان شاء الله..

قبل ما أقولكم احدي ذكرياتي أقولكم كل سنة وانتم طيبيين بمناسبة عيد الأم، ماهو شهر مارس كله عيد أم، إعلانات تليفزيون ومحلات كلها مركزة علي الهدايا الي ممكن نجيبها لأمهاتنا...

عايزة أقولكم عن ذكري جميلة حصلتلي في عيد الأم من أولادي وهما صغيرين..

كانوا متعودين يجيبولي كرت عاملينه في المدرسة وهدية رمزية من مصروفهم، وفي ظرف خمس دقايق يدوني الهدية والبوسة ويجروا يلعبو ويعملوا زي كل يوم من بلاوي ومصايب..

وطبعاً بعد شوية جمعتهم بعد زعيق وصريخ في عيد الأم، فهمتهم اني كل الي طالباه منهم في اليوم ده انهم يريحوني ومش عايزة حاجة تانية..

إتكسفوا وقرروا يعوضوني في اليوم التالي..

يريحوني معملش حاجة أبداً هما الي هيعملوا كل حاجة.. فرحت ونمت..

وجه تاني يوم وندمت علي ما فعلت..

أولادي طلبوا مني أفضل في أودتي ومخرجش منها لغاية ما يقولولي.. وفعلاً قعدت وبعدين خرجت زي ما طلبوا..

لقيت السفرة مليانة بكل محتويات التلاجة ! وده كان الفطار طبعاً..

صُدمت لكن تماسكت وقلتلهم برافو شاطرين حبايبي ونزلت فيهم بوس، ودخلوني الأوضة تاني عشان أرتاح وهما يكملوا شغل البيت لغاية الغدا..

وفعلاً دخلت بس فضلت رايحة جاية أفكر في الكوارث الي هتحصل ..

وبالفعل النتيجة النهائية دمار شامل في الشقة من مطبخ وحمام الخ الخ

طلعت روحي طبعاً في إعادة الأمور علي ما كانت عليه، لكن كنت سعيدة بمحاولتهم لراحتي بالشكل المريع ده.

ومن يومها وكل عيد أم بفتكر أنا وهما بعد ما كبروا واتجوزوا طبعاً ونضحك علي كل حاجة عملوها وهما صغيرين في عيد الأم، وطبعاً بيجيبولي هدايا برضه.

بس بدأوا يعلموا ولادهم الي هما أحفادي إن الهدية مش بالفلوس بس لكن الأهم إحساسهم بأمهم وراحتها... ولا إيه!!