13 أبريل 2020 2481 0  

سى السيد

في يوم من ايام الروقان سهرت انا وصحباتي نتفرج على فيلم بين القصرين اصلنا بنحبه قوي خصوصا الست امينة بالتحديد.

بعد ما خلص الفيلم بصينا لبعضينا وقعدنا نضحك...بعد ما بطلنا ضحك قولتلهم:

يا ترى بتضحكوا على نفس الحاجة اللي بأضحك عليها !!

قامت احدث واحدة فيهم متجوزة ومخلفة قالت:

اصل سي السيد احمد عبد الجواد بتاع زمان احسن بكتير من سي السيد بتاع اليومين دول.

الراجل كان موفر للست امينة بيت كبير وشغالة ولها متطلبات البيت بيجيبهالها وهى مستنية في البيت وما بتعملش غير حاجتين فنجال القهوة والبخور والنفاثات في العقد واحسن ميزة عندها انها ما كانتش تعرف اي حاجة عن عربدة سي السيد برة البيت.

انما سي السيد بتاع اليومين دول عايز الست تشتغل وتربي العيال و تذاكرلهم وتطبخ وتمسح وياريت عاجبه والنكد يبتدي ولا ينتهي على اتفه الاسباب ويتهمني بالتقصير مع اني باشتغل زي زيه...

قامت صاحبتي التانية قالت وفيه حاجة مهمة انتي ما قولتلهاش اهم من كل الي قولتيه.

وفي صوت واحد قلنا ايه

قامت قالت اننا دايما عارفين مغامرات سي السيد برة البيت ....بالذمة مش دي مصيبة يا بخت الست امينة يا رتنا زيها.

كلنا ردينا في صوت واحد...اه يا ريتنا الست امينة...بذمتكم مش احسن؟!