13 أبريل 2020 3065 0  

 

الدنيا دي غريبة قوي..وفي الحقيقة ناسها اغرب في اقوالهم وافعالهم.

بقف عند جملة باسمعها كتير وهى انا مش عارف انا عايز ايه..او انا مضايقة ليه..او الموضوع الفلاني حله ايه!!!

خلينا في انا مش عارفة انا عايزة ايه.. دي بقى جملة اسكت بيها اللي قدامي لكن في الحقيقة هى او هو عارف كويس عايز ايه بس.. وبس دي هى مربط الفرس زي ما بيقولوا...

فمثلا عايز حاجة ما تتحققش زي انه عايز يطير مثلا او حاجه اكبر من قدراته  سواء المادية او النفسية ويفضل يتعذب بيها بدل ما يفكر في غيرها ممكن تتحق... والنبي دي مش حاجة غريبة!!!

وعلى فكرة انا واحدة منهم !!!

فمنهم اللي فجأة وبدون مقدمات يقرر يتغير ومش مهم للاحسن او للاوحش المهم انه يتقلب مية وتمانين درجة... ازاي معرفش !!!

ياجماعة مفيش حد بيتغير دي خدعة اللي بيقولها بيضحك عليك..

ولو صدقته تستاهل الي يجرالك.

حكاية التغيير دي بتفكرني بالغراب اللي حاول تقليد الهدهد في مشيته فلا حصل هدهد ولا فضل عايش زي ما كان ... تفتكروا الغراب سعيد؟