12 ديسمبر 2022 574 0  

الشريك الداعم.. كان سر نجاح منتجات آية مرتضى!

كلنا عدينا أكيد بقعدة مع خالاتنا وجداتنا لما كانوا بينصحونا وبيدونا من خبرتهم، كانوا بيقولولنا إزاي نختار الزوج المستقبلي المثالي! فيبتدوا يقولولك إنه لازم يبقى طيب، معاه فلوس، متعلم، يقدر يحميكي إنتي وعيلتك، بس مافيش حد خالص كان هيقولك إنك لازم تختاري شريك يشجعك، زوج طموح مهتم يخليكي تكتشفي نفسك وتعرفي شغفك الحقيقي وتكوني بجد مبسوطة. من هنا كانت بداية آية مرتضى، صاحبة براند تصميمات آية مرتضى للمنتجات اليدوية، لما قدرت تلاقي شغفها الحقيقي لحد ما بقت واحدة من أشهر الأسماء في المنتجات اليدوية اللي قدرت تكسب ثقة المشاهير. عشان كده كان لينا حوار مع آية، عشان تقولنا رحلتها كانت عاملة إزاي، وإزاي تشجيع زوجها كان له أثر كبير خلاها تبقى في المكان اللي وصلتله النهاردة! تابعوا المقال للنهاية.

ممكن تعرفينا بنفسك؟
أنا اسمي آية مرتضى، عندي 32 سنة. أخدت بكالوريوس في التصميم الداخلي. أنا متجوزة وأم لولدين جُمال أوي.

 

إزاي وصلتي لفكرة مشروعك؟
بدأت بمشروع الرسم، ورسمت لوحات كتيرة بس الموضوع مامشيش كويس فبالتالي وقفت شوية. وبعد كده اكتشفت شغفي بالخيوط وفكرت في إني أتعلم الكروشيه، وبدأت أتعلمه من على اليوتيوب وعملت بيزنس صغير. وفي يوم شفت فيديو لست تركية بتعمل الكوسترات بالخيوط وكان شكلها جميل جدًا فأخدت الإلهام منها، وبعدها حبيت الموضوع وقررت أجرب فيه.
وجوزي جابلي مكنة الخياطة في عيدميلادي ومن هنا بدأت!

ايه العقبات اللي واجهتك لما قررتي تبدأي مشروعك؟
أكبر عقبة واجهتها هي تسويق شغلي، كنت حابة أوصل لناس كتير وأخد ثقتهم.
تاني عقبة كانت مشكلة الخامات، مش كل الخامات بتبقى متاحة للأسف فبالتالي ببذل قصارى جهدي إني ألاقي البدايل اللي بتديني نفس الجودة.


مين أكتر حد دعمك في شغلك؟

أكتر حد دعمني هو جوزي، وعيلتي وصحابي، كانوا دايمًا بيخلوني أتحرك وكانوا بيشجعوني كتير.


إزاي بتقدري توازني بين شغلك وبين حياتك الشخصية؟
أنا ببذل جهد كبير جدًا في إني أحقق الموازنة. عشان كده نظمت يومي! بصحى الصبح بدري فبيبقى عندي وقت كفاية أخلص شغلي بدري وباقي اليوم بقدر أقضيه مع عيلتي.

لو عندك أولاد، إزاي بتقدري توازني بين احتياجات شغلك وبين احتياجاتهم؟
العيلة بتيجي قبل أي حاجة، وأنا بعمل أقضى جهد عندي عشان مقصرش في حقوقهم. لإنهم بيحتاجوا دايمًا لاهتمامي وعنايتي، هما أكبر مشروع ليا.

ايه خططك للبراند بتاعك؟
خططي إني أعمل ورش عمل وكمان أقدر أوصل للعالم كله.

 

 

إزاي بتدعمي الستات من خلال شغلك؟
أنا مؤمنة بإن الله في عون العبد ما دام العبد في عون أخيه. وعشان كده بحاول أكون شخص كويس وإني أساعد أي حد محتاج مني معلومة أو نصيحة.


هل المشروع أثر عليكي بشكل عاطفي؟
أيوة أثر بشكل كبير جدًا. خصوصًا لما بيجيلي كلام كويس على شغلي أو لما حد بيطلب حاجة مخصوصة وبتطلع زي ما كان متوقعها، الحاجة دي ممكن تخليني مبسوطة لمدة أسبوع مثلًا.

كان شعورك عامل إزاي لما مشروعك بدأ ونشرتي أول منتج ليكي؟
كنت متحمسة جدًا، أول منتج كان باسكت الكليم بالكروشيه. صحابي شجعوني أوي وبدأوا يطلبوه، كنت سعيدة جدًا.

إزاي بتلاقي الإلهام عادةً؟
بعمل بحث كتير جدًا وبشوف تصميمات ومنتجات جديدة باستمرار، ولما حاجة بتعجبني بحاول أعملها بس بطريقة مختلفة. وأوقات العملاء بيدوني الإلهام من أفكارهم.

 

إزاي قدرتي تديري جزء التسويق في شغلك؟ وهل كان الموضوع صعب؟
في البداية كان صعب جدًا بس أنا مافقدتش الأمل. أخويا مصمم جرافيك وساعدني كتير جدًا في شكل صفحتي وتسويقها لإنه كان بيعملي كل تصميمات الصفحة. كمان، ليا صديقة مؤثرة على السوشيال ميديا، سارة ثروت، ساعدتني كتير واتكلمت مع متابعيها عني. بعدها بدأت أعمل ريلز وبوستات وستوريز كتير.

ايه أنواع الخيوط اللي عادةً بتستخدميها؟
بستخدم القطن والجوت.

فكرتي قبل كده في التدريس وتعليم البنات للمهارة اللي بتعملي بيها شغلك؟
الموضوع في دماغي بالفعل وبحاول ألاقيله وقت. أنا عادةً بعمل ستوريز وأنا شغالة وأتمنى ده يكون مفيد لأي حد. وبالفعل درست لبنات أون لاين من غير مقابل لإني اتمنيت في بدايتي إن حد يساعدني ويحطني على الطريق الصح.

ايه أقرب منتج لقلبك؟
كل المنتجات قريبة لقلبي وكل المنتجات بحبها، لإنها منتجات يدوية اتعملت بكل الحب.

ايه أهم نصيحة ممكن تديها لست بتخطط إنها تبدأ في بيزنس خاص بيها؟
ماتفكريش في العقبات، اكتبي أهدافك، ماتضيعيش وقت كتير، حبي اللي بتعمليه، واعمليه بكل شغف!
ماتحاوليش تقارني نفسك بأي حد وركزي على هدفك. خليكي مؤمنة بالنجاح، وأكيد هتوصليله في يوم.