22 ديسمبر 2022 110 0  

 اضطرابات الطعام..وكل اللي محتاجة تعرفيه عنها!

 

كتير مننا سمع الجملة دى (اضطرابات الطعام) أو(Eating disorders) ومش بنفهم معناها ويعنى ايه اصلا اضطراب في الأكل؟! وهل أنا ممكن أكون مصاب بيه ومعرفش؟

اضطرابات الأكل تصنف مرض نفسي، وزي أي مرض نفسي ممكن نصاب بيه بيكون ناتج عن حدث أو مشكلة فوق قدرة احتمالنا مابيكونش عندنا الخبرة الكافية للتعامل معاها فنصاب باضطرابات الأكل وتتأثر صحتنا ومشاعرنا بسببه. واضطرابات الأكل بتيجى فى شكل تغييرات في نوع وكمية الأكل اللى بناكله، وبالتالى سلوكنا كله بيتغير تجاه الأكل.

اضطرابات الأكل فى منها 5 أنواع وكل نوع منهم ليه أعراض خاصة بيه:

1- أول نوع هو فقدان الشهية العصبي:

والمصاب بالنوع ده بيعمل حاجة من اتنين مع الأكل، يا يقلل أكله جدا لدرجة انه يلجأ لأدوية تسهل اخراج الطعام، ويلجأ ممارسة رياضة عنيفة ويبذل مجهود شديد جدا عشان يخسر وزنه.
يا ياكل كتير جدا لدرجه الشره والنهم وبعدها يلجأ للقئ المتعمد.

 

2- تانى نوع هو تقييد الطعام:

الناس اللى بتعاني من النوع ده بيقللوا جدا من كميات أكلهم وبالتالى بيحصل نقص كبير جدا في الوزن لدرجة التعب الصحي، ولو طفل مصاب بيه بيقلل نمو الطفل، وكمان الناس المصابة بالاضطراب ده مبتقدرش تشارك الأكل مع اللى حواليهم سواء ف مناسبة سعيدة مثلا أو عزومة أو حتى خروجه مع صحابه.

 

3- تالت نوع هو النهم العصبي:

وهنا المصاب بالنوع ده بياكل كميات كبيرة جدا من الأكل، وبعدها على طول يحاول يخسر وزنه زي إنه يلجأ للصيام أو للرياضة العنيفة. والمصاب بالاضطراب ده دايمًا بيبقى قلقان تجاه وزنه وممكن يوصل بيه الحال أنه يوزن جسمه يوميًا ويعرض جسمه للتعب الصحي الشديد بسبب هوسه بالوزن.

 

 

 

4- رابع نوع هو اضطراب شهية الأكل الغريب:

المصاب بالنوع ده بيلجأ لتناول مواد غير صالحة للأكل من الأساس زى الورق والطين..الخ وده طبعا بيؤدى لمضاعفات خطيرة ف الجهاز الهضمى أو التسمم.

وف الغالب الاضطراب ده بيصاب بيه مرضى الفصام والتوحد والإعاقات الذهنية.

 

5- خامس نوع هو اضطراب الشراهه للطعام:

والمصاب بالاضطراب ده بيفقد السيطرة تماما على كمية الأكل اللى بيدخله جسمه لدرجة إنه بياكل من غير وعي ومن غير تذوق للأكل، بياكل وهو مش جعان أصلا، وبعد ما بياكل كل الكميات دى بيحس بالذنب تجاه نفسه وتجاه جسمه وشكله.

والمصاب هنا مبيحاولش يتخلص من الأكل اللى أكله عن طريق الرياضة العنيفة أو القئ المتعمد، ونتيجة الاضطراب ده بيبقى مريض سمنة وبيصاب بالاكتئاب.

وطبعًا نتيجة كل ده هما بيفضلوا ياكلوا لوحدهم بعيد الناس عشان بيحسوا بالاحراج والعار تجاه جسمهم.

الأكل بالنسبة لهم هو محاولة منهم لكتم مشاعرهم والسيطرة عليها أو التشويش على اللى حاسين بيه فيهربوا للأكل.

 

وفى النهاية انتي ماتقدريش تشخصي نفسك لو عندك أيًا من من الأعراض اللي اتكلمنا عنهم، بس لو حسيتي إن الكلام اللى قريتيه بيشبه أسلوب تعاملك مع الأكل، فالأفضل تلجأي لطبيب نفسي، أو لأخصائي نفسي، يساعدك على التعافي من اضطرابات الأكل.

وخليكى عارفة إن الدايت اللي مش صحي ده مش علاج، وإن الدايت الغير صحي هو سبب من أسباب اضطرابات الطعام. خليكي عارفة إن صحتك أهم من أي وزن مثالي ممكن توصليله بعد ما تضحي بصحتك النفسية والجسدية.