01 أبريل 2020 1534 0  

كأمهات وستات عموماً،احنا دايماً معندناش وقت. ما بين دوامة الحياة اليومية  وشغلنا،كل دقيقة ممكن نوفرها بتعتبر نعمة كبيرة. ومع ان التكنولوجيا دلوقتي بتخلي كل حاجة تتعمل أسرع،ده ميمنعش برضه اننا نوفر كام دقيقة زيادة واحنا بنستخدمها. لو كنتي بتدوري علي طرق تخليكي تستخدمي التكنولوجيا بشكل أسرع، جبنالك النصايح الرائعة دي من موقع  Tomsguide.com عشان نساعدك توفري الكام دقيقة الغاليين دول.

1- استخدمي الضغط علي زرار الماوس اليمين عشان تبحثي في جوجل أسرع: لو بتقري مقال علي النت وحبيتي تبحثي عن مصطلح أو شخصية معينة في المقال،دوسي علي الزرار اليمين في الماوس عند المصطلح أو الاسم الي حابة تبحثي عنه واختاري "ابحث في جوجل". هتفتح صفحة جديدة في المتصفح بتاعك بنتايج البحث.الخاصية دي متوفرة في متصفح كروم وفايرفوكس وسفاري.

2- أفتحي اللينك في صفحة جديدة باستخدام زرار الاسكرول في الماوس: لو عاوزة تفتحي لينك في صفحة جديدة، حطي مؤشر الماوس علي اللينك ودوسي علي زرار الاسكرول. هيفتح اللينك في صفحة جديدة ويوفر عليكي وقت النسخ واللصق.

3- استخدمي تطبيقات التحكم في الكمبيوتر عن بعد عشان تدخلي علي الكمبيوتر بتاعك:نزلي تطبيق التحكم في الكمبيوتر عن طريق التليفون علي التليفون والكمبيوتر عشان تقدري تدخلي علي الكمبيوتر بتاعك وتاخدي أي ملف محتاجاه وتحفظيه علي تليفونك. بالطريقة دي تقدري توفري وقتك لو نسيتي تبعتي ملفات مهمة من علي الكمبيوتر  .

4- اتصفحي صفحات الوبب باستخدام شريط المسافة: استخدمي شريط المسافة بدل الاسهم او شريط التصفح المزعجين. دوسي علي شريط المسافة عشان تنزلي تحت في الصفحة، واستخدمي زرار" شيفت "مع شريط المسافة عشان تطلعي فوق.

5- استخدمي برنامج ادارة الباسورد عشان تفتكري الباسوردات بتاعتك: كلنا بننسي باسورد الحسابات بتاعتنا في مرحلة من المراحل، شركات كتير دلوقتي بتتيح تطبيقات بتساعدك تحفظي كل المعلومات بتاعتك في مكان واحد. وبكدة لو نسيتي الباسورد بتاعتك ممكن تدخلي تطلعيها من التطبيق.

6- وفري وقتك بانك تستخدمي "ماكروز" للبيانات الي بتدخليها علطول في الوورد: عشان توفري وقتك الي بتقضيه في مهام متكررة علي الوورد،ممكن تجمعي كل الخطوات في "ماكرو". وال"ماكرو" زي ما متعرف علي موقع الأوفيس هو مجموعة من الأوامر والتعليمات الي بيتم تجميعها في أمر واحد يستخدم لانجاز العمل تلقائياً. كل اللي محتاجة تعمليه انك تسجلي الماكرو ،وبعدين تشغليها بالضغط علي زرار في شريط ادوات الوصول السريع.

7- استخدمي تطبيقات امسح الضوئي عشان تقدري تستخدمي تليفونك بدل السكانر: مش محتاجة ترجعي مكتبك  بعد ما اتحركتي عشان تمسحي المستندات وتبعتيها . مع تطبيقات المسح الضوئي هتقدري تمسحي المستندات  علي تليفونك وتحفظيها بصيغة Pdf .نزليها من علي الستور  عشان تبقي جاهزة.

8- احفظي المستندات الي بتستخدميها  دايماً كtemplate : لو بتستخدمي نفس المستند دايماً ،زي نموذج معين للشغل، ممكن توفري الوقت الي بقعدي تكتبيه فيه كل مرة تدخلي علي المستند ده بانك تحوليه ل"تيمبلت". أول ما تكتبي النموذج الي عاوزة تحوليه لتيمبلت هتدوسي علي  "حفظ باسم" وبعدين اختاري "حفظ كنوع" بعديها اختاري "تيمبلت" من القايمة. دلوقتي المستند جاهز كتيميلت و كل الي محتاجة تعمليه المرة الجاية انك تكملي المعلومات الناقصة.

9- أوصل لملفاتك من أي مكان: وحدات التخزين العامة بقت طريقة شائعة عشان تحافظي علي شغلك ومستنداتك متزامنة بين كل أجهزتك. جربي تستخدمة خدمة زي “Drop Box”  أو “Box”   أو “I cloud”  لمستخدمي الاي فون. كل الي محتاجة تعمليه انك  تحملي ملفاتك علي الخدمة الي اختارتيها. نزلي التطبيق علي كل أجهزتك،وبكدة يبقي تقدري تدخلي علي كل ملفاتك من اي مكان. وأحسن حاجة انك تظبطي المزامنة بين الأجهزة.

10- فكري في شاشة زيادة: بالطريقة دي تقدري توفري وقتك بانك تدوري مثلا علي المعلومات علي شاشة وتكتبي علي التانية، او انك تستخدمي تطبيقين واحد عشان تجمعي بيه مصادر والتاني تعملي عليه فيديو. وجود شاشة تانية يالتأكيد هيوفر وقتك ويساعدك تخلصي شغلك اسرع وأسهل.