27 يونيو 2022 649 0  

إتدلعي مع بامبي بوكس

الستات بتحب التحديات، وأنها تعمل مجهود في الحاجة اللي مهتمة بيها وبتحبها!
بجانب شغفها أنها تبدأ البيزنس الخاص بيها، نهى اختارت نوع بيزنيس مش متعارف عليه في مصر (نظام الإشتراك) فالتحدي بقى مضاعف!
نهى قررت تعمل براند مختلف فختارت الستات الحوامل، عشان هي عارفة قد ايه الستات في مصر مش بيتدلعوا كفاية او خالص الحقيقة فقررت تدلعهم هي بنفسها.
النهاردة هنقابل نهى، صاحبة بامبي بوكس عشان تكلمنا أكتر عن الخطوات اللي خدتها في كارييرها وإزاي جالها الفكرة إنها تختار النوع ده من البيزنيس

في الأول احكيلنا منين جتلك فكرة بامبي بوكس؟

خلال فترة الكورونا كنت بفكر ابدأ البيزنيس الخاص بيا وكنت عايزة اساعد الستات وادلعهم لكن فكرت انه لازم يبقى محدد اكتر وعشان كدة اخترت الستات في فترة الحمل.

الأمهات في مصر مش بياخدوا الدلع الكافي زي الستات في أغلب البلاد التانية، الناس بتعاملها كأنها مريضة، ومع ذلك هي مرحلة مهمة جداً في حياتها ولازم تستمتع بكل مرحلة من مراحلها وتكون مستعدة للأعراض اللي هتجيلها وتلاقي الدعم من كل الناس اللي حواليها.

ايه الصعوبات اللي واجهتك في بداية البيزنيس الخاص بيكي؟

من الصعوبات اللي واجهتني ان نظام الشغل بالأشتراك مش متعارف عليه في مصر زي الدول التانية فكان صعب أوصل للعملاء الفكرة في البداية، كمان الشراكة مع البراندات التانية كانت صعبة في البداية عشان نقدر ندلع أمهات اكتر.

مين أكبر داعم ليكي في رحلتك؟

مامتي وجوزي هما اكبر داعمين ليا.

إزاي بتوازي بين الشغل وحياتك الشخصية؟

بحاول أكون منظمة قدر الأمكان وأحط خطط لليوم، لكن أكيد في الأول الموضوع كان صعب.

ايه النصيحة اللي تحبي تقديمها للستات اللي بتخطط تبدأ مشروعها الخاص؟

البحث العميق و الأستمرار هما مفتاح تحقيقك لأحلامك.

احكيلنا أكتر عن بامبي بوكس وأيه اللي الأمهات هتلاقيه جوه الصندوق؟

بامبي بوكس هو أول صندوق بنظام الأشتراك.

أول ما تحسي إنك حامل أبعتلنا رسالة عشان دة الوقت اللي بنبدأ ندلعك في ونجهزك للفترة دي بصندوق جديد كل 3 أشهر، تقدري تشتركي في صندوق أو أتنين أو 3 أو 4 صناديق، بتاخدي واحد كل 3 شهور و واحد بعد الولادة.

كل صندوق بيتكون من 5 لـ 8 منتجات وكمان ممكن تلاقي قسائم شراء وخصومات من شراكئنا، بالمنتجات والخدمات اللي بتهم الأمهات.
عملنا بحث عميق عن كل التغييرات والأعراض اللي بتحس بيها الأم كل 3 أشهر وكل صندوق بننفذة بيكون على حسب الفترة اللي بتمر بيها الأم.
على سبيل المثال، في أول 3 شهور من الحمل هتلاقي بوكس في وجبات خفيفة صحية تساعدك على التخفيف من الغثيان، في التلت التاني من الحمل هتلاقي منتجات بتساعدك على الأسترخاء، في التلت التالت من الحمل هتلاقي منتجات هدفها أنك تدلعك قبل ما تولدي عشان تكوني جاهزة.

في التلت الرابع بيتحدد على أساس الولادة طبيعية ولا قيصرية، والرضاعة طبيعية ولا لا، كمان عشان أنا مدمنة منتجات العناية بالبشرة، الأمهات هتلاقي جوه كل صندوق منتج أو أتنين عشان جمالهم بمنتجات معمولة من المكونات الطبيعية وامنه جداً للحمل. انتي كأم لازم تتوقعي الدلع والسعادة مع كل صندوق.

 

احكيلنا عن أقرب صندوق لقلبك؟

كل صندوق بيتعمل بيتجهز كأنه لواحدة من أصحابي لأني عارفة هما بيكونوا عاملين إزاي فبوصل حبي ودعمي لكل واحدة فيهم من خلال الصندوق.

إزاي بتدعمي الستات من خلال المشروع الخاص بيكي؟

معظم المنتجات اللي بنقدمها من إنتاج ستات تانية لدعم أعمالهم، ولما بيعرفوا أن المنتج هيتعمل لستات حوامل بيعملوا أفصى ما عندهم عشان يقدموا أفضل منتج ليها.

إزاي الأم تقدر تدلع نفسها خلال فتر الحمل؟

لازم تاكل كويس وتاخد الفيتامينات بانتظام لأنها بتأثر على حالتها الصحية والمزاجية، حافظي على نشاطك وحاولي تسترخي.
شاركي مع جوزك اللي حاسة بي عشان تلاقي الدعم منه ولو عرفتي تقربي من ستات حوامل هيكون كويس.
وإشتركي في بامبي بوكس عشان يدلعك!
ايه أهم نصيحة تحبي تقدميها للأم الجديدة؟

استمتعي.. حاولي تلاقي الجانب المشرق في كل موقف ومرحلة انا عارفة أنه صعب لكن الوقت ده هيعدي فحاولي تستمتعي بكل لحظة.

هل عندك مخططات تانية لـ بامبي بوكس أنه يشمل حااجات تانية غير فترة الحمل؟

أكيد، عندنا صندوق للأم بعد الولادة، بنعمله مخصوص على حسب نوع الولادة ونوع تغذية الطفل عشان نتأكد أنها هتاخد التغذية المناسبة للفترة دي.
كمان بنخطط نبدأ أنواع مختلفة من الاشتراكات، وقريب هبتدى كورسات للسيدات اللى حابين يبتدوا مشروعهم بنظام صندوق الاشتراك ... لأنه نوع جديد من المشاريع و اتوقع انه باذن الله هيلاقى رواج كبير.

ايه خطتك لـبامبي بوكس؟
بخطط أنه يكون أفضل بوكس أشتراكات في الشرق الأوسط خاص بالحمل وأني أقدر أنشر أكتر فكرة الإهداء الذاتي بين الأمهات في مصر.