15 مارس 2021 1374 0  

كتير مننا اتفرج على فيلم "هذا هو الحب" و المشهد المشهور لماري منيب و لبنى عبدالعزيز, لما ماري كانت بتفحص كل جزء من جسم لبنى عشان تتأكد أنها مناسبة للجواز و الخلفة , من اول السنان لحد الركب.
https://www.youtube.com/watch?v=V2uzDdJchEw

يمكن كلنا ضحكنا على المشهد بس انا بدأت افكر هل مشكلة الخجل من الجسم اللي كتير من الستات بتعاني منها الايام دي بدأت من التفاصيل الصغيرة اللي عرضها لنا الفيلم مش بس من السوشيال ميديا؟
لسنين كتير كانت بتحاصر الستات فكرة أن جسمهم لازم يبقى زي جسم عارضات الازياء و البداية كانت مع ظهور الكورسيه 1500م, و فضلت الفكرة دي يتناقلها جيل ورا التاني و ده اتسبب فأن الست اللي تخرج برا المقاييس دي تتعرض للتنمر.
بتسمعي كل يوم تقريباً اسئلة زي " ايه ده انتِ قصيرة أوي, اللعبي عقلة" "هما بياكلوا أكلك ولا ايه" أو " كفاية أكل مفيش مرايات في بيتكم؟" " مال شعرك خفيف كده ليه" و اكتر و اكتر طبعاً , و الاسئلة دي أثرت على الروتين اليومي بتاعنا , فبدل ما الستات تستمتع بيومها و تشوف نفسها حلوة طول الوقت, بقوا يعملوا سيرش بأسئلة زي "كيفية تفتيح الاماكن الغامقة" أو " كيفية تصغير الانف" و بالمناسبة الاسئلة دي من ضمن أكثر الاسئلة بحثاً على جوجل, 2% فقط من الستات شايفين نفسهم حلوين و راضيين عن كل جسمهم.
كلنا عارفين قد ايه الخجل من الجسم شيء بشع , لكن تعرفوا ان كمان بيأثر على الصحة العقلية و ممكن يؤدي الي مرض اضطرابات الأكل ؟
إحساس الخجل من الجسم ممكن يؤدي لاضطرابات نفسية زي القلق و الاكتئاب و الانعزال الاجتماعي, الاشخاص اللي بيعانوا من القلق يميلوا انهم يفكروا في كل حاجه حواليهم ولو حد أداهم أي ملاحظة على جسمهم ممكن يوصل معاهم لنوبات من الهلع والإكتئاب.
كمان ممكن يؤدي لاضطرابات في الأكل , لو حد جسمه مليان شوية بيكون مهووس بفقدان الوزن ولو رفيع بياكل بهوس عشان يتخن , و ده بيخلي أمراض كتير تظهر زي الجفاف, الإمساك, نقص التغذية, الانتفاخ و حتى عدم انتظام الدورة الشهرية.
طيب خلاص عرفنا بدايات الـ Body-shaming و ممكن يؤدي لـ ايه ,إزاي نقدر نتغلب عليه؟:
أولاً كده ننسى جملة " الجمال جمال الروح" كلنا سمعناها و مفيش حاجه اتغيرت , بس اللي نقدر نعمله اننا نعترف لنفسنا بأن مفيش شيء في العالم اسمه "الجسم المثالي" و ان مفيش معايير تحدد يعني ايه جسم مثالي
بصي لجسمك بكل " الكيرفات و السيليوليت .."  أنه جزء من نفسك , حبي كل جزء منك لأنه ده هو إنتِ.
كمان ممكن تحيطي نفسك بناس مؤمنين بالإيجابية الجسدية و بيساعدوا في تقبلك لشكل جسمك, و الايجابية الجسدية هنا مش معناها تقبلك لشكل جسمك بس , لكن كمان انك تتمتعي بالصحة, فالأكل الصحي والحفاظ على الترطيب و التمارين الرياضية بيخلي عندك جسم صحي وإيجابي.
الحل في انك تصدقي ان كل أشكال الجسم جميلة، و تتقبلي شكل جسمك أياً كان عيوبه.