02 أغسطس 2022 373 0  

كلنا عدينا بمرحلة إنه بتيجي علينا فترة نقرب من ولد لدرجة إنه بيقدر يحتل كل جزء في يومنا ولكن بشكل جميل! بيكون معانا طول الوقت وبنشارك بعض كل حاجة، الحاجات اللي بتفرحنا، اللي بتزعلنا، والحاجات اللي بنحلم بيها!، وبنقدر نكون فاهمين بعض من قبل حتى ما نتكلم. بنقطع وعود كبيرة إننا مش هنتخلى عن بعض تحت أي ظرف، وإننا حتى لو بعد عشرين سنة، هنبقى قادرين نبعت لبعض ماسدج بعد منتصف الليل محتواها "أنا مش تمام".
لكن هل الوعود دي بتكون حقيقية؟ وهل بنقدر نكون سوا طول الوقت بنفس الحماس والحب؟ لإني دايمًا مقتنعة إن علاقة "البيست فريندس" أقوى وأكبر من العلاقات العاطفية، بس هل هي بتقدر تكمل بنفس الطريقة؟

الحقيقة ومن خلال تجربتي وتجربة ناس قريبين مني، إن العلاقة -غالبًا- مابتكملش بنفس الطريقة، لإنه في الغالب واحد من الطرفين بيقع في حب التاني -من غير قصد-. بيتحول من إنه عنده شخص قريب منه بس، لإنه بيكون مستني حاجة من الشخص ده. وده جايز لإن مفهوم "اللايف بارتنر" أو شريك الحياة بقى شئ قريب من مفهوم "البيست فريند" أو الصديق المفضل. ماهو لما بنلاقي شخص بنحبه ومتقبلينه بكل حاجة، ومتقبلنا، بيكون معانا معظم الوقت، وبنحب نكون معاه، هنحتاج ايه تاني؟ فبالتالي سوء الفهم ده بيولد مشكلة كبيرة! هنتكلم دلوقتي عن الحالات اللي ممكن نتعرض فيها لده وإزاي نتعامل معاها.

1- لو الإعجاب منه هو بس:
في بعض الحالات، الإعجاب بيكون من الطرف التاني بس ولكنه مش متبادل، وفي حالة إنك لاقيتي الإعجاب بس من الطرف التاني وانتي حسيتي بده وعرفتيه، ممكن تبدئي تبعدي أو تلمحي -بطريقة مش جارحة- إنك مش بتفكري في ده. وواحدة واحدة تقللي الأفعال اللي ممكن توصله إنك مهتمة وتعمل سوء فهم، وده عشان تقدري تحافظي على علاقتكم من غير أي مشكلة ومن غير ما تجرحيه.

2- لو انتي اللي معجبة:
لو حسيتي في يوم إنك معجبة بصديقك المفضل، حاولي تتجنبي أي أفعال تبين إعجابك ده غير لو حسيتي إن الطرف التاني هو كمان مهتم وبيلمح بده. لإنك لو قررتي تعترفي وتواجهي ده هيفسد علاقتكم ومش هيرجعها زي الأول أبدًا وكمان ممكن يحطك في خيبة أمل كبيرة لو اعترفتي واعترافك اتقابل بالرفض.

3- لو الإعجاب متبادل بينكم:
في حالة العلاقة بين البيست فريندس وكانوا الطرفين معجبين ببعض واعترفوا لبعض بده، فممكن يبدئوا ياخدوا الموضوع  خطوة خطوة لإن فيه أساس قوي وهو إن الطرفين أصحاب جدًا من البداية، ولو حسوا في يوم إن الموضوع مختلف أو لسة مش متخيلينه، يقدروا يرجعوا للأساس بتاعهم اللي هو علاقتهم كأصدقاء مقربين ويعالجوا المشكلة اللي بتواجههم، وفي الحالة دي لو اتصرفنا صح، علاقتنا بتكون ناجحة جدًا لإن مافيش حاجة أفضل من إن شريك حياتنا يكون في نفس الوقت صديقنا المفضل!

4- في حالة العلاقة الرمادية:
أوقات ممكن تلاقي البيست فريند بيقول إن علاقتكم أكتر من مجرد علاقة صحاب، أو من الأفضل مانحددلهاش اسم، أو لو من وقت للتاني بيلمح بحاجات تدل إنه معجب، ولكن في نفس الوقت مش بيعترف بأي حاجة، وده ممكن يحسسك بالحيرة لو إنتي عندك جزء من الإعجاب، ويحطك في زون إنك مستنية حاجة مش عارفة هتحصل ولا لأ، في الحالة دي الأفضل إنك تواجهي عشان تعرفي حقيقة العلاقة دي، أو إنك تبدئي تحطي حدود عشان العلاقة ماتكونش أكتر من علاقة أصحاب بس.