22 سبتمبر 2022 824 0  

"كاريرها".. فرص عمل للستات بعدد ساعات مرنة

التحديات اللي ممكن نقابلها في حياتنا كتير، لكن فيه تحديات بتجبرنا نختار ما بين حاجتين صعب الاختيار بينهم. دي مشكلة بتواجهها ستات كتير مع أول طفل بيدخل حياتهم، بيبدأوا تحدي صعب وجديد، وهو إنهم إزاي يعملوا الاتنين سوا، العناية بالطفل وتربيته، وفي نفس الوقت يكملوا في رحلة الشغل والكارير. عادةً سوق العمل مش بيراعي ده ومش دايمًا بنلاقي فرص عمل بعدد ساعات مرنة. من النقطة دي، بدأت چيسي رضوان، مؤسسة موقع "كاريرها" ومبادرة "هاير سوبر ماما”، في إنها تساعد الأمهات في إنهم يلاقوا فرص عمل بعدد ساعات مرنة تناسب شكل حياتهم الجديد.

ولإننا بنهتم بالمبادرات اللي زي كده ومؤمنين بأهميتها في تغيير الأوضاع. اتكلمنا مع چيسي عشان تقولنا أكتر عن "كاريرها"!

 

قوليلنا إزاي جتلك فكرة موقع كاريرها؟

من ٤ سنين لما بنتي بدأت تدخل الحضانة، حسيت وقتها بإني لازم أرجع أشتغل وأكمل في كاريري. لكن لقيت الموضوع صعب والفرص اللي بدوام كامل مواعيدها كانت بتتأخر. فكنت بدور على فرصة عمل بأوقات مرنة عشان أحقق ده من غير ما آجي على بنتي.

ايه المشاكل اللي واجهتك لما بدأتي الموقع؟
قبل الكورونا، كانت فكرة الشغل من البيت صعبة، وكانوا أصحاب الشركات بيلاقوا إن لازم أي شغل بدوام كامل يكون من مقر الشركة. فكان صعب أقنعهم بفكرة الشغل بساعات عمل مرنة للستات والأمهات بالتحديد.

إزاي بتوازني بين شغلك وبين مسؤولياتك اليومية؟
أنا عادةً بقسم يومي لوقتين، أول وقت الصبح بدري من وقت نزول الأولاد للمدرسة لحد الساعة 3 وبعدها باخد استراحة. وبعدين بكمل شغل بالليل لما بيناموا. ودي أكتر طريقة نفعت معايا وناسبت شكل حياتي في وجود الأولاد.

مين أكتر حد كان داعم ليكي؟
أصحابي وعيلتي وجروب "هاير سوبر ماما" اللي إدوني طاقة كبيرة عشان أكمل، لإنهم بالفعل كانوا بيعانوا من نفس المشكلة وبيدوروا على الحل ده.

قوليلنا على قصة نجاح بدأت مع "كاريرها"؟
بالنسبالي قصص النجاح هي إني أشوف ستات بالفعل بيلاقوا شغل وبيزودوا من مهاراتهم وبيقدروا يستغلوا الفرص اللي بنقدمها.




قوليلنا نصيحة حابة تديها للستات اللي حابين يبدأوا بعملهم الخاص؟
أنا شايفة إن الفكرة كلها إنهم يمشوا بخطوات بسيطة بس متسقة ومترتبة، لإن كلنا بنبقى عايزين نعمل كذا حاجة ونحقق أكتر من حاجة في نفس الوقت ونعملهم كمان بشكل مثالي. فالترتيب والخطوات المدروسة أهم شئ.


ايه اللي دفعك لمساندة الستات إنهم يلاقوا فرص عمل بعدد ساعات مرنة؟
بسبب الإحباط اللي حسيت بيه وتجربتي الشخصية في معاناة إني ألاقي فرصة شغل بعدد ساعات مرنة. كنت محتاجة تشجيع من ناس بتعاني من نفس المشكلة عشان كده عملت الجروب وبعدها بدأت آخد خطوة.

هل الموقع بيستهدف مؤهلات تعليمية معينة؟
الموقع بيستهدف مؤهلات تعليمية عالية زي البكالوريوس، ومهارات لغوية زي اللغة الإنجليزية بشكل أساسي.

ايه خططك الجاية لموقع "كاريرها"؟
خطتنا إننا نكون المنصة الأولى في الشرق الأوسط اللي بتقدم فرص عمل للستات بعدد ساعات مرنة. وإننا نقدملهم الدعم من خلال ورش العمل والكورسات.

هل كانت المبادرة ليها تأثير نفسي أو عاطفي عليكي؟
المشروع ليه تأثير عاطفي جدًا عليا، لإنه بدأ بشكل عاطفي، ولحد دلوقتي فاكرة اليوم اللي عملت فيه الجروب وشعوري في اليوم ده، إنه ليه الست تضحي بحاجة هي عايزاها عشان هي أم، ليه ماقدرش أبقى أم وأقضي وقت مع عيالي وفي نفس الوقت أحقق كياني وكاريري.

كلمينا عن إيفينت "كاريرها" الجاي؟
الإيفينت هيكون يوم 15 أكتوبر، وهيكون أول مؤتمر عن توفير عمل للستات تحت فكرة المساواة وفكرة الموازنة بين الحياة والشغل، الإيفينت هيضم ورش عمل وفرص عمل للمبتدئين. والضيوف هيكونوا على درجة عالية من الكفاءة.

تقدروا تتابعوا الوظائف المتاحة من خلال لينك موقع كاريرها:
https://carerha.com/