29 سبتمبر 2022 302 0  

لما يكون الشغل هو الشغف!.. قصة نجاح منتجات "شيري" للعناية بالشفاه والبشرة

أحيانًا ممكن نكون بنشتغل في مجال معين، وبندرس في مجال تاني، وشغفنا في حاجة مختلفة! بس لما نكون بنشتغل في مجال إحنا شغوفين بيه، الموضوع بيبقى مختلف، وبنبدع في شغلنا وبنكبر بسرعة، عشان كل حاجة عملناها.. كانت بحُب! من هنا بدأت شيري، مؤسسة براند "شيري لمنتجات العناية بالبشرة والشفاه" شغلها الخاص، لما بدأت في مجال هي حباه وشغوفة بيه ووصل لانه بقى واحد من اشهر البراندات المحلية.
عشان كده، كان لازم نتكلم مع شيري عشان نعرف أكتر عن مشروعها وتجربتها!

قوليلنا إزاي جتلك فكرة المشروع؟
كنت مهتمة بمنتجات العناية بالشفاة وخصوصًا "الليب جلوس" وده أول منتج أعمله بنفسي، ولما لقيت إنه صعب ألاقي المنتج ده في مصر بشكل كبير، فكرت أبدأ البيزنيس ده عشان كمان كل الناس اللي كانت زيي وبتدور عليه ومش لاقياه إنهم يقدروا يلاقوه بسهولة وكمان بجودة كويسة.



ايه خططك الجاية للبراند بتاعك؟
بتمنى إنه ينجح أكتر وإنه يكون براند عالمي.


ايه العقبات اللي واجهتك لما كنتي بتبدأي؟
الوقت والمجهود الكبير اللي بذلتهم عشان أقدر ألاقي الخامات اللي أنا محتاجاها، كان صعب الاقيها في مصر، بس الموضوع بقى أفضل بكتير دلوقتي.


مين أكتر حد دعمك لما بدأتي مشروعك؟
اصحابي، واخواتي، وخطيبي، كانوا أكتر ناس بيدعموني


ايه أكتر منتج قريب ليكي من المنتجات بتاعتك؟
أكيد الليب جلوس!


إزاي بتقدري توازني بين شغلك وبين حياتك الخاصة؟
بالنسبة للصفحة بتاعتي على السوشيال ميديا، مكانش من الصعب خالص إني أديرها خصوصًا إني مهتمة بمجال التسويق. بس بالنسبة لتحضير الاوردرات باخد يوم أو يومين في الأسبوع لتحضيرها.



إيه النصيحة اللي ممكن تديها لأي بنت أو ست حابة تبدأ بيزنيس خاص بيها؟
خليكي نفسك، واعملي اللي بتحبيه وماتعتبريهوش مجرد بيزنس. وماتقلديش أي حد لأنك تقدري تقدمي الأفضل دايمًا. وثقي إنه في يوم من الأيام هتكوني فخورة بنفسك وبكل اللي حققتيه.


إزاي ممكن تقدمي الدعم للستات من خلال البيزنيس بتاعك؟
بقدملهم منتجات طبيعية مستحيل تؤذيهم.

ايه أفضل روتين للعناية بالشفايف تقدري تنصحي بيه البنات؟
أول حاجة لازم نتغذى بشكل كويس وناكل الخضروات والفاكهة.
تاني حاجة نشرب مياه كتير عشان نتجنب جفاف الشفايف والبشرة بشكل عام.
تالت حاجة نعمل تقشير للشفايف مرة أو مرتين كل شهر ونستمر عليه.
رابع حاجة لازم نرطب الشفايف كويس بالليب بالم أو السيروم.
وممكن نستخدم ماسكات الشفاه قبل النوم لإنها بتعمل تأثير كويس جدًا.
وأخيرًا هنلاقي النتيجة بمجرد ما نهتم بالروتين.