10 نوفمبر 2022 276 0  

بذور الشيا بتعتبر من أكتر الأطعمة المهمة لصحة الجسم، وده لإنها بتحتوي على فوائد كتير جدًا للجسم وللعقل وده بسبب قيمتها الغذائية الكبيرة. لإنها بتحتوي على مضادات الأكسدة والمعادن والألياف وأوميجا 3. الموطن الأصلي لبذور الشيا هو المكسيك، ويقال إنها كانت بتستخدم في حضارات الأزتك والمايا في الوجبات الغذائية، الأغراض الطبية، الطقوس الدينية، ومستحضرات التجميل. عشان كده هنتكلم معاكم في المقال ده على فوائد بذور الشيا وإزاي ممكن نستخدمها في وجباتنا!

فوائد بذور الشيا:

1- تحتوي على مضادات الأكسدة:
بذور الشيا بتحتوي على مضادات الأكسدة اللي بتساعد في الحفاظ على صحة القلب والكبد بالإضافة لخصائصها المضادة للسرطان.

2- تحتوي على الألياف وأحماض الأوميجا 3
بسبب احتوائها على الألياف، بتساعد بذور الشيا في تخفيض مستويات الكوليسترول في الدم. كمان بعض الدراسات وضحت إن بذور الشيا بتساعد في تقليل مستويات الدهون الثلاثية. وبعض الأبحاث أثبتت إنها بتساعد في تقليل ضغط الدم للناس اللي بتعاني من ارتفاع ضغط الدم.

3- عنصر مناسب لإنقاص الوزن:
احتواء بذور الشيا على كمية كبيرة من الألياف الغذائية خلاها مصدر مهم للشعور بالشبع، وبالتالي هي اختيار مهم لإي نظام غذائي غرضه إنقاص الوزن.

4- مفيد لصحة العظام:
بتحتوي بذور الشيا على بعض العناصر الغذائية المفيدة لصحة العظام زي الكالسيوم والفوسفور والماغنسيوم، عشان كده هي اختيار مهم للي بيعانوا من أمراض العظام.

وصفات لذيذة ببذور الشيا:

 

1- زبادي بالفواكه وبذور الشيا

المكونات: زبادي يوناني أو عادي، بذور الشيا، معلقة من العسل، شرائح فاكهة
الطريقة: بنحط معلقة العسل على الزبادي، ونحط عليهم بذور الشيا، ونزين الطبق بشرائح الفاكهة.

2- الجرانولا:

المكونات: 2 كوب شوفان، ربع كوب من بذور الشيا، ربع كوب من جوز الهند، ربع كوب من بذور الكتان، رشة قرفة، 4 معالق كبيرة من العسل، وربع كوب من الزبيب.
الطريقة: بنحط المكونات بالترتيب وبنخلطهم مع بعض، وبعدين بنفردهم في صينية ونحطهم في الفرن لمدة تلت ساعة وبنقلبه كل 5 دقايق. وبعدها بيتم حفظه في برطمان وبنحطه في التلاجة.
ممكن يتقدم مع الزبادي في وجبة غذائية متكاملة.
 

 

         

 

 

3- بودينج الشيا:

المكونات:  كوب من بذور الشيا، 4 قطع كمبوت خوخ، و2 كوب من الحليب.
الطريقة: في طبق هنهرس كمبوت الخوخ كويس، ونضيف عليه الحليب، وبعدها هنضيف بذور الشيا.
بنقلب المكونات كويس ونسيبها في التلاجة لمدة ليلة وكده الوصفة بقت جاهزة! ممكن في التقديم نضيف عليه كريم شانتيه.