29 أغسطس 2022 473 0  

مشاعر الوحدة..ممكن تبقى مفتاح لحياة سعيدة؟
التغلب على الشعور بالوحدة

لو صحيت في يوم متأخر، الوقت عدى ومافيش حاجة قلقتك. مسمعتش صوت موبايلك ولما فتحته ملقيتش ولا ماسدج، والوقت طول. اليوم بيعدي وكل حاجة زي ما هي. بتكتشف إن اليوم بيجيب يوم، لسة بتصحى متأخر، لسة بتستنى مكالمة أو مسدج، لحد ما بتلاقي إنك لازم متستناش ده أبدًا، وإن -بشكل ما- ده هيكون روتين حياتك لفترة.
مشاعر الوحدة من أقسى المشاعر اللي أي إنسان ممكن يحسها خصوصًا لو مختارناهاش بمزاجنا. وده لإنها عكس الطبيعة البشرية تمامًا، لإن فطرتنا بتخلينا حابين وجود ناس حوالينا نشاركهم يومنا، نشاركهم إنجازاتنا، ونشاركهم كمان حزننا وكل حاجة.
بعض الناس بتتبسط بكونهم لوحدهم، وبعض الناس لأ. مهما كانوا ناس كويسة، مهما كان عندهم حاجات كتير، ومهما كانوا ناجحين، بيفضل معاهم شعور داخلي إنهم مش مبسوطين، وأبسط مثال على ده كتير من المشاهير اللي بشكلٍ ما بيبان إن عندهم كل حاجة، بس هما في الحقيقة مش سعداء. يمكن عشان لو حوالينا ناس بنحبهم، بيدوا لكل الدنيا -في عينينا- طعم، وفي نفس الوقت فيه أشخاص بيبقى حواليهم ناس كتير بس كمان بيحسوا بالوحدة.

*الوحدة فترة مؤقتة نقدر نعرف نفسنا فيها بشكل كويس*
مؤخرًا حسيت إن مشاعر الوحدة مش بتفضل موجودة طول الوقت، بل هي بتيجي وبتروح باختلاف مراحلنا العمرية والناس اللي بنقابلهم من مدرسة، لشغل، وجامعة. من وجهة نظري بشوف إننا لو عدت علينا فترة حسينا إننا لوحدنا ومافيش ناس في يومنا ومافيش حد نتكلم معاه ونحكيله، إن دي بتكون فرصة كويسة نعرف نفسنا أحسن، ونقرب أوي منها ونفهمها. اكتشافنا لنفسنا هيساعدنا نتعامل مع أي شعور سئ ممكن نواجهه. بمعنى إنك لو مجربتش تخاطر لوحدك، لما تبقى في خطر حقيقي مش هتبقى عارف إزاي تتعامل صح، لإنك ماعرفتش نفسك بشكل كفاية يخليك تعرف نفسك بقدراتك وبردود أفعالك. أو زي إننا ممكن نكتشف إن عندنا هوايات ممكن تساعدنا نتخطى أي وقت صعب!

*المحاولة هتساعدنا دايمًا*
لما فضلت فترة كبيرة لوحدي كنت بتعمد أقفل على نفسي أكتر وبرفض أي فرصة تيجي عشان أخرج من الدايرة دي. شوية كان بسبب خوف إني اتجرح وأرجع أسوأ من الأول، شوية عشان من كتر ما بعدت أوي عن الناس مابقتش مؤمنة إن أساسًا فيه ناس كويسين في الدنيا، شوية عشان بقيت شخص خجول. أسباب كتير كانت بتبني حواليا ألف حاجة تبعدني أكتر، وبقيت برفض أخرج مع حد أكنسل خروجات، لحد ما لقيت إن فكرة التعامل مع الناس العادية أصلا بقت صعبة في العموم. إديت لنفسي فرصة وإديت للناس اللي بتحاول تقرب مني فرصة، ايه اللي ممكن أخسره؟
وحتى لو غلطت، يبقى عيشت تجربة جديدة، عشان الأكيد إحنا مش جايين الدنيا نعمل كل حاجة صح.

*اختيارنا بيفرق*
كتير ممكن تحس إنك وسط دايرة كبيرة من الناس بتخرجوا وبتقضوا وقت لذيذ، بس وسط القعدة بتحس إنك لوحدك، أو إن في وسط الضحك والهزار بتتمنى تكون في مكان تاني، أو بتحس إنك أساسًا مش جزء من الناس دي.
الأكيد إنه العيب مش في الناس دي، والأكيد كمان إنه مش فيك، بس اختيار الناس هو اللي بيفصل هنا، يعني مقدرش أقول نختار ناس شبهنا ولا ناس مختلفة، بالعكس، نختار ناس نكون حقيقي مبسوطين معاهم وبس! ناس قادرين نكون "إحنا" معاهم.


*حاول في كل الأحوال تكون سعيد*
سواء باختيارك أو غصب عنك لقيت نفسك لوحدك، سواء كنت مع ناس وبتحس إنك لوحدك، وسواء أي حاجة تانية، اكتشفت إنك في كل الأحوال لازم تفكر في نفسك وفي راحتك النفسية قبل أي شئ. اختار ناس تقدر تكون مبسوط معاهم وماتجبرش نفسك تكون في وضع مش حابُه.