25 يوليو 2022 353 0  

فكرة إننا نلاقي شغفنا نفسنا في حاجة ممكن تيجي في وسط مسؤوليات وضغوطات كتير، وإننا نعمل الحاجتين ممكن يكون صعب لكن مش مستحيل! ده اللي كانت مؤمنة بيه "علياء جمال"، صاحبة براند "كريستال ميوز". علياء عندها 27 سنة وبدأت البراند بتاعها أثناء ما كانت بتدرس منحة الفنون وبتشتغل في وظيفة بدوام كامل. ولإنها كانت بتحب الكريستال ومهتمة بجمعه، قدرت تلاقي بيه علاج لخطوط الوجه اللي كانت بتعاني منها، فعملت بحث كتير جدًا لحد ما توصلت للعلاج بالطب الصيني اللي من خلاله قدرت تستخدم بكرات الكريستال وأحجار الجواشا في التخلص من خطوط الوجه. وبعدها البيزنيس بتاعها كبر لحد ما بقت من أشهر البراندات في بيع بكرات الكريستال! عشان كدا كان لينا حوار مع مي عشان تكلمنا أكتر عن رحلة عمل "كريستال ميوز".

إزاي جاتلك فكرة كريستال ميوز؟
أنا كان عندي خطوط في الجبهة وكانت مضايقاني، فبدأت أعمل سيرش عن إني إزاي اتخلص منها لحد ما لقيت العلاج بقطع الكريستال. ابتديت انتجهم بنفسي وخليت صحابي يجربوهم عشان يقولولي رأيهم على المنتج بصراحة. وبعدها ابتدى يجيلي أوردرات أونلاين.

إيه العقبات اللي واجهتك لما بدأتي في البراند بتاعك؟
العقبات كانت فكرة إني أبدأ براند خاص بيا، لإني كنت ببقى مسؤولة عن جودة المنتجات، التسويق على السوشيال ميديا، التغليف، وكمان المتابعة مع الورش. كمان أنا كنت ببقى مسؤولة عن مراحل العمل كلها وكان صعب إني أعين حد يشتغل معايا في البداية. كمان بعض الناس ماكانتش مقتنعة بالفكرة أو مصدقينها.

إزاي بتقدري توازني ما بين شغلك وحياتك الشخصية؟
أنا بحاول إني أوصل للتوازن دا وإني أوصل كمان لتحسين صحتي النفسية والجسدية.

مين أكتر حد كان بيشجعك لما بدأتي في شغلك الخاص؟
والدي ووالدتي كانوا أكتر ناس بتشجعني لإنهم بيدعموا أي حاجة أنا مؤمنة بيها.

ليه سميتي البراند بتاعك بالاسم ده؟
لإني مهتمة جدًا بالكريستال وبحب أجمعهم ولإن فكرة البراند بتاعي أصلا قايمة على الكريستال. ميوز معناها السيدة الملهمة للآلهة في الثقافة اليونانية.

هل كل أدوات البشرة اللي بتقدميها تناسب كل أنواع البشرة؟
معظم الأدوات بتناسب كل أنواع البشرة خصوصًا البشرة الحساسة.

من وجهة نظرك.. ايه أفضل سن المفروض نبدأ فيه نهتم ببشرتنا؟

بداية من سن الـ 12 المفروض نعتني ببشرتنا وخصوصًا خطوة واقي الشمس، كمان المفروض نعلم أولادنا إزاي يهتموا ببشرتهم.

 

 

 

 

 

إيه هي القطعة المفضلة ليكي من منتجاتك؟
القطعة المفضلة ليا هي الجواشا، لإني أنا اللي أنتجتها من الألف للياء، كمان هي 100% صناعة مصرية.

كلمينا أكتر عن روتين العناية بالبشرة الخاص بيكي؟

الأول كان الروتين بتاعي معقد شوية لإني بحب دايمًا أجرب منتجات جديدة، لكني مؤخرًا رجعت لروتين الـ3 خطوات اللي هي: غسول الوجه، المرطب، وواقي الشمس.

إيه النصيحة اللي بتوجهيها للسيدات اللي عايزة تبدأ في العناية بالبشرة؟
أهم الخطوات للعناية بالبشرة هو المرطب المناسب لنوع البشرة، واقي الشمس، والغسول المناسب، وده بيعتبر روتين أساسي للبشرة. بعد كدا يقدروا يدخلوا علاجات جديدة للبشرة زي الهايلرونيك أسيد والريتينول.

إزاي بتقدري تدعمي السيدات من خلال البراند بتاعك؟
ده عادةً بيتم من خلال طريقتين، أول خطوة هي إن جزء من أرباحنا بيروح لمؤسسة بهية. وتاني طريقة هي إني كنت بقدم خدمة مجانية على السوشيال ميديا وهي إني برد على البنات في الأسئلة المتعلقة بالعناية بالبشرة، لكن الخدمة دب متوقفة حاليًا.

كلمينا أكتر عن الطب الصيني وإزاي بتستخدميه في المنتجات بتاعتك؟
الحقيقة إني معرفش كتير عن الطب الصيني وعرفته بالصدفة لما كنت بدور على حل يخليني أتخلص من خطوط الجبهة، فلقيت إن الجواشا والمساج وبكرات الكريستال هما أفضل حل.

ايه النصيحة اللي تحبي توجهيها للستات اللي حابة تبدأ في بيزنس خاص بيها؟
نصيحتي دايمًا إنها تبدأ وتشتغل في الحاجة اللي هي مؤمنة بيها، وتتجاهل التعليقات السلبية عشان تقدر توصل للي هي عايزاه.

ايه هي خطتك لكريستال ميوز؟
خطتي هي إني أعمل منتجات لروتين كامل للبشرة، والشعر والجسم، دي هي خطوتي الجاية.