03 نوفمبر 2022 517 0  

انا نرمين. باصنف نفسي غير متزنة لاني كل يوم بحال. انما عقلي، فيوزن بلد، و تقريبا دي مشكلتي: شوافة. باشوف الناس و باشوف احوالهم و هما عايزين ايه و نفسهم في ايه، و باشوف كمان هما رايحين علي فين. و ده اللي خلي دايما عندي حاجة عايزة اقولها. و انهاردة شوفت زيادة الاسعار. و شوفت الجو العام و الحزن اللي خيم علينا كلنا عشان حفاظنا علي نظام حياتنا اللي متعودين عليه بقي من رابع المستحيلات. و حلي للموضوع ده هو نفس حل مستطاع الطعزي في فيلم البيضة و الحجر، لأ مش هاعمل دربندوخ و انصب عالناس، هاحارب الغلاء بالاستغناء. بس برضه باشوف ان ده مش حل مرضي، لاني باستغني عن حاجات انا عايزاها فمش باكون مبسوطة .فقررت اني اخوض المغامرة و اتعلم ازاي اعمل الحاجات اللي انا باحب اكلها في البيت، و بكدة اوفر لفلوس الحاجات اللي مش باعرف اعملها في البيت، اصل هاعمل بنزين و كهربا ازاي! و لقيت ان بالرغم من ان المكونات مكلفة، بس التكلفة قصاد الكمية طلعت ارخص. فاتكلت علي الله. عملت برجر و فرايد تشيكن و شويت فراخ و لحمة و اعتمدت الكفتة و بلاش منه الاستيك. كله مشي معايا فل الا البيتزا. مهما عملتها و حاولت بافشل فشل ذريع. فبدل ما اسمي نفسي فاشلة، قررت اعمل دايت، و بكدة كلنا نقدر نرتاح! هاخس و انا بامتنع عن معظم الحاجات اللي انا باحبها من غير ما احس اني بقيت فقيرة. و هاوصل لهدف اسمي: البيرفكت فيجار اللي نفسي فيه من زمان، و عاملة نفسي مبسوطة و الحال عال اهو، احنا بس اللي مش عارفين نعيش ازاي، انما الدنيا، مفيش اسهل من كدة.

نرمين 3/11/2022