21 أبريل 2020 4022 0  

مش سهل ابدا علي اي ست متجوزة انها تبقي صاحبة بزنس، ده اللي بيبان بسبب المسئوليات اللي بتبقي عند الستات بعد الجواز. بس زي ما عرفنا من ايمان الجمال صاحبة ايميز هاندميد سوب انك لو عاملتي البزنس بتاعك كأنه طفلك التاني هتنجحي. قصة ايمان ملهمة جدا لاي ست بتفكر تبدأ كارير. ايمان  نص مصرية نص اردنية بتحب الصابون الطبيعي جدا و اشترت منه من كل بلد زارتها. بالرغم من انها طبيبة اسنان ناجحة جدا و ام، الا انها دايما كانت حاسة ان في حاجة ناقصة، حياتها ناقصها شغف. فراحت تحضر كورس عن البحث عن الشغف، و لقته! و بعد شوية تجارب صغيرة بينها و بين اهلها و اصحابها، صابون ايمي جه الدنيا. معانا ايمان الجمال بنفسها تحكيلنا اكتر عن قصتها...

في البداية عايزة اسألك: ليه صناعة الصابون؟ المجال دقيق و محدد جدا، ازاي اكتشفتي نفسك فيه؟

مبدئيا في الاول خالص انا مكنتش اصلا اعرف ان في حاجة اسمها صناعة الصابون. انا كنت باحضر كورس كنت عايزة اتعرف فيه علي الشغف بتاعي و اكتشفه. و انا في الكورس اكتشفت فعلا ان انا شغوفة بمجال صناعة الصابون و من هنا ابتديت بقي ان انا اقرا عنه اكتر و ابتدي اجيب خامات بسيطة و اجرب في البيت ازاي الحاجة تتعمل لحد ما ربطت ده بذكريات قديمة كدة في حياتي ان فعلا الموضوع مرتبط بحياتي و اني شغوفة بجد بصناعة الصابون من زمان بس انا مكنتش مدركة ده.

اي بداية بيكون فيها صعوبات، قوليلنا ايه التحديات اللي واجهتك و انتي بتبدئي؟ و ايه تحدياتك دلوقتي؟

انا اصلا طبيبة اسنان فكان اول تحدي ان الشغف بتاعي مختلف تمام عن مجال شغلي، اللي ازاي هابتدي اجرب صناعة الصابون طيب و طب الاسنان و كدة؟ بس مع الوقت بالنسبالي الموضوع بدأ كبيزنس جمب الشغل. و كمان قابلتني تحديات بتاعت فين الاقي الخامات و فين الاقي حد يساعدني و كدة في الاول. التحديات دلوقتي بقت ازاي الاحق علي الاوردرات البيرة و ازاي احافظ علي الجودة و المواعيد، مع اني باعتمد دلوقتي كليا علي الخامات من مصر مبقتش اقدر زي الاول اجيب الخامات كلها من برة عشان الكميات كبيرة مبقتش اقدر اجيبها من برة.

كان سهل عليكي تعملي الشيفت من كارير ثابت زي طب الاسنان لحاجة مش مضمونة زي صناعة الصابون؟

 في الاول هو مكنش شيفت كامل كان بيزنس جمب الشغل باشتغل عليه في وقتي الفاضي، باحاول اشوف وقت اقعد ادرس يه الموضوع قبل اصلا ما ابتدي البزنس و اقرا عنه و اطبق في البيت و كدة و بعدين لما كنت شغالة جمب شغلي في العيادة كان زي المصنع الصغير و مكنش بياخد حيز كبير من وقتي انا كنت طول اليوم مثلا في شغلي في العيادة بعد ما ارجع عندي بنتي و بعد كدة بقي بالليل باتفرغ لنفسي و للشغف بتاعي. لحد من ٣ شهور شغلي كان ثابت في العيادة بس دلوقتي عندي ظروف فانا متفرغة تماما لشغل الصابون.

و اهلك دعموكي في قرارك؟ انك تبدأي بزنس في الصابون؟

انا عندي مامتي، بابايا متوفي، مامتي كانت بتدعمني جدا. لما عرفت في الاول كانت مستغربة و كانت بتقولي و شغل العيادة، هو ايه ده طيب، مش خطر تعمليه في البيت؟ مش خطر علي جلدك؟ بس كانت بتساعدني، بتنزل معايا نجيب الخامات و بعدين بقت دلوقتي شغالة معايا.

ازاي بدأتي و مولتي البزنس بتاعك؟

في الاول انا كان معايا فلوس شايلاها فابتديت استخدمها ان انا اجيب خامات و اشتري كتب و اخد كورسات اونلاين و كل حاجة كنت انا اللي باصرف عليها.

حلو جدا، من خبرتك في البزنس، البزنس محتاج ايه عشان يقف علي رجله و ينجح؟

اول حاجة ان اي بزنس محتاج سيستم، مش محتاج تجارب اذا نفع اه لو منفعش هابطل، المفروض اي حاجة عشان تكمل و تنجح لازملها سيستم، فبدأت بالبحث عن نظام امشي بيه شغلي، دي حاجة. تاني حاجة الالتزام، انك تكملي، ازاي تشتغلي كل يوم زي التاني، ازاي تلاقي دافع لده اصلا، كل ده من ضمن السيستم.  و طبعا بيحتاج مجهود، بيحتاج فلوس، بيحتاج دراسة و وقت. بعد شوية بتلاقي نفسك بتنشغلي بزيادة لاني اصلا عندي شغلي الثابت + بيتي + شغلي التاني فبينتهي بيكي الحال انك دايما مشغولة جدا.

و بتشتغلي كام ساعة في اليوم؟ معاكي حد بيساعدك؟

في الاول كان مثلا ممكن اشتغل علي شغفي ٤ ساعات في اليوم دلوقتي الموضوع تطور لدرجة انه تقريبا طول ما انا صاحية انا باشتغل فيعني بقيت اشتغل ١٢ ساعة في اليوم او اكتر. في الاول خالص كنت باشتغل لوحدي حوالي سنتين لحد دلوقتي اخر ٦ شهور ابتديت دلوقتي يبقي معايا شركا فمعايا اتنين بيساعدوني.

و بتقدري تحافظي علي التوازن بين بيتك و شغلك؟

الي حد ما انا قادرة اوازن بس اوقات الشغل في السيزونز و الحاجات دي بييجي شوية علي نظام حياتي و كدة بس في الاخر التوازن بيرجع تاني. هو بس اي بيزنس في الاول بيحتاج مجهود اكتر و وقت اكتر و كدة لحد ما يقف علي رجله لحد ما يبقي فيه تيم و بعد كدة الدنيا بتبقي احسن.

احكيلنا بقي، ايه المميز في صابون ايمي؟

الصابون بتاعي مميز عشان هو بيجمع بين الجانب الفني و الجمالي في الشكل و بين انه حقيقي مفيد للبشرة. الشكل مبيجيش ابدا علي حساب فوايده للبشرة. شكلها حلو اه بس فيها زيوت مفيدة جدا للبشرة و كمان ليها مميزات زي ان في منها بيعمل تقشير للبشرة و الاروما، صابوني ريحته دايما فواحة و مميزة.

و ده حقيقي فعلا! طيب انتي قولتي في الفيديو بتاعك ان الصابون بيتعمل بطريقتين، انتي بتشتغلي بانهي طريقة منهم و انهي اسهل؟

انا باعمل الصابون بطريقتين: عالطريقة الباردة، و الطريقة الساخنة اللي هي ميلت اند بور. الاتنين ممتعين جدا بالنسبالي. كل طريقة فيها فن و متعة. و كل طريقة ليها فوايد ايجابية جدا للحالة النفسية. فيهم خواص تأملية و انتي بتعمليهم. انهي طريقة فيهم اسهل؟ الاتنين ليهم صعوباتهم مفيش واحد يعتبر اسهل من التاني، هما طريقتين مختلفتين تماما. بس الأخطر شوية الطريقة الباردة، ليها اجراءات سلامة اكتر عشان بنتعامل مع صوديوم هايدروكسايد اللي هو خطر جدا فله تحذيرات جامدة يعني مينفعش يبقي فيه اطفال او حيوانات اليفة و هو بيتعمل. لكن الميلت اند بور طريقة امان جدا حتي الاطفال ممكن يعملوها.

الناس دايما بتقلق من الكيماويات، بتستخدمي كيماويات في الصابون بتاعك؟

بالنسبة للكيماويات بصوا هو دلوقتي في ناس بيختلط عليها الامر، انا طبعا مبستخدش اي كيماويات خالص في الصابون. بالنسبة للكولد بروسيس بيدخل فيه الصوديوم هايدروكسايد بس دي اصلا مشتقة من حاجة طبيعية و المادة دي من غيرها مفيش صابون. الصوديوم هايدروكسايد اسمه التجاري لاي. و في مقولة معروفة عند صناع الصابون اللي هي من غير لاي مفيش صابون. بس الفكرة بتاعته ان صابون الكولد بروسيس لما بيدخل فيه لاي بيتفاعل مع الزيوت و نتيجة التفاعل ده بيبقي صابون، و الكولد بروسيس بياخد من 4 ل 6 اسابيع عشان يبقي جاهز فاللاي بينشف تماما منه و يتحول لصابون فبيبقي خلاص مش موجود. .

 

شكل الموضوع دقيق...بياخد قد ايه من طاقتك؟ مرهق؟

انا لما المود بتاعي اصلا و بيبقي مش متظبط بادخل اعمل صابون عشان اتبسط. هو ممتع جدا في شغله و بيفرق فرق ايجابي جدا في الطاقة.

و بيجيلك افكار جديدة ازاي؟ بتستلهمي شغلك من ايه؟

الالهام بييجي من حاجات كتير حواليا، الالوان، الديزاينات، حاجات في الديكورات و اواقات بيجيلي الالهام من الروايح. حاجات كتير يعني بس معظم الوقت بيبقي من المناظر الطبيعية و الطبيعة. و كمان لما باشوف صناع الصابون العالميين، في اليابان و امريكا و تايلاند، لما باشوف شغلهم باتحمس علي طول. و في حاجة كمان، المكونات نفسها ممكن تديني فكرة تخليني اعمل بيها صابونة جديدة.

تحبي تقولي ايه للبنات اللي بتقرا الانترفيو ده دلوقتي؟

اقولهم ان الحياة بشغف ليها بعد تاني خالص و هما ميعرفوش عنه حاجة فلازم يحاربوا عشان يعرفوا ايه هو شغفهم. في نوعين من الناس، ناس تعرف الشغف بتاعها بس مش بتمارسه و ناس متعرفش يعني ايه شغف و ايه الشغف بتاعهم. في الحالتين لازم يعرفوه عشان هما كدة معاشوش حياتهم كاملة هما هيكتشفوا ان الحياة ليها بعد تاني خالص لما يكتشفوا ايه الشغف بتاعهم و يمارسوه.

و باقي الناس، حابة تقوليلهم حاجة؟

احب اقول للناس تقدر قيمة الهاند ميد. انه الناس لما بتشتري الحاجة الهاند ميد دي بيبقي ليها قيمة و حاجة تانية خالص غير الحاجات اللي بتتعمل بمكن. انت لما بتشتري حاجة هاند ميد انت بتشتري ساعات من التعب و من الدراسة و من التجربة. بتشتري فرحة صانعها نفسه انت فعلا بتخلي شخص في ذاته طاير من الفرحة. غير لما بتروحي تشتري حاجة من مكان او محل انتي اصلا متعرفيش مين صاحب البراند لكن الفكرة في الهاند ميد ليها بهجة و قيمة تانية خالص. الحاجة التانية ان اي حد يقدر يعمل اي حاجة و تنجح لو هو بس صبر عليها و التزم انه فعلا يديها كل يوم من وقته و مجهوده.  الحاجة التالتة ان لو انت شايف ان الحاجة دي مش عجباك او مش علي ذوقك و علي المواصفات اللي في دماغك متشتمش او متوبخش او متقللش انت متعرفش الحاجة اللي مش عجباك دي ممكن تكون عاجبة ناس تانية كتير جدا فيعني رفقا بالناس.

في النهاية حابين نعرف: ايه خطواتك الجاية؟

الخطوة الجاية اني باخطط ابدأ شركة و يبقي ليها اوراق عشان لو عايزين نصدر نقدر نعمل كدة. ان شاء الله كمان في السنة الجاية هابقي باعمل كورسات اعلم فيها الناس ازاي يعملوا صابون و كمان يبقي لينا ستور الناس تيجي تشوف الحاجات فيه و تختار زي ما هي عايزة.

اتبسطنا جدا بحوارنا مع ايمان الجمال و نتمني تكونوا انتوا كمان اتبسطوا و استفدتوا. شاركونا اراءكوا في الكومنتات.