16 يونيو 2022 484 0  

بعض الناس بتعتقد إننا لازم نركز على هدف واحد بس في حياتنا، ونمشي ورا شغف واحد بس. لكن الحقيقة إننا نقدر نعمل أكتر من كدا بكتير! وممكن نبقى ناجحين في أكتر من مجال مع بعض. دي كانت حكاية مي جمال، مؤسسة براند "فضة إيجيبت". مي عندها 32 سنة، أم، وعندها وظيفة بدوام كامل، ورغم ده قدرت تتابع موهبتها في مجال صناعة الإكسسورات الفضية. عشان كدا قررت تبدأ " فضة إيجيبت" اللي جيه من مزيج من الشغف والإبداع! عشان كدا كان لينا حوار مع مي عشان نعرف أكتر عن ماركتها.

إزاي جتلك فكرة "فضة إيجيبت"؟
الفكرة بدأت لما كنت متعودة أصنع وأبيع الإكسسوارت الفضية لأصحابي وللناس اللي حواليا في المناسبات، زي عيد الأم لما صممت هدايا مخصصة. عشان كده فكرت أركز أكتر في إني إزاي أشتغل وأكسب من حاجة بحبها.

مين أكتر حد كان بيشجعك؟

أكتر حد بيشجعني هي "سمر الشاذلي"، شريكتي في مشروع فضة إيچيبت.

 

إيه اللي كوًن عندك الشغف للمجوهرات الفضية؟
كنت بحب بعض القطع المميزة من أهلي وأصحابي. لإني كنت بحب القطع البسيطة أكتر من اللي فيها شغل كتير.

إيه العقبات اللي واجهتك وانتي بتبدئي البراند الخاص بيكي؟
أكبر مشكلة كانت التسجيل والدفع في الضرائب. وده لإن العائد المادي من الشغل مكانش عالي أوي عشان يقدر يغطي الضرائب. وهكون سعيدة لو قدرت أعمل ده قريب وإني أعرض منتجاتي وأسجلها قريب جدًا.

إزاي بتقدري تلاقي الإلهام لتصميم منتجاتك؟
التصميم دايمًا بيعتمد على الإلهام. عشان كده بتابع مصممين كتير من العالم كله عشان أقدر في الآخر أطلع بأفكار مختلفة.

ايه أكتر قطعة من منتجاتك بتحبيها وقريبة لقلبك؟
القطعة اللي صممتها لزوجي. اللي كان عليها اسمي واسم إبني.

ايه الإلهام اللي تحبي تديه للستات اللي بتستخدم منتجاتك؟
حب الذات، وإنه ممكن نصمم أي قطعة بناءًا على تفضيلاتهم عشان تكون جزء من شخصيتهم مش مجرد إكسسوارات عادية.

بتحلمي بإيه لـ "فضة إيجيبت"؟

أتمنى البراند يكون عالمي. وأنا بالفعل قدرت أبيع لناس في السعودية والإمارات والبحرين، وأتمنى إن ده يستمر.

ما بين إنك أم، وعندك وظيفة بدوام كامل، إزاي بتقدري تواصلي حبك في صناعة الفضة؟ وإزاي بتقدري توازني ما بين شغلك وحياتك العملية؟
أنا عندي شغل بدوام كامل، وبعده بقدر أهتم بطفلي اللي عنده 5 سنين، وبعدها بقدر أكمل في شغفي، اللي هو الفضة.

ايه النصيحة اللي ممكن تديها للستات اللي بتفكر تبدأ في شغل خاص بيها؟
نصيحتي هي إنك تتابعي شغفك لحد ما يكبر وتقدري تكسبي منه.