09 يونيو 480 0  

فرحي هو محطتك الشاملة ليومك السعيد!

من ضغوطات تجهيزات الفرح ظهرت فكرة جديدة عشان تغير فكرتك عن تجهيزات "الفرح".

ندين فراج رائدة أعمال شغوفة اتخرجت من الجامعة الأمريكية بدرجة مزدوجة في التسويق والصحافة.

ندين عندها 30 سنة وهي المؤسسة والرئيس التنفيذي لشركة "فرحي" وهو محطتك الشاملة لتجهيزات فرحك من اول اختيار المكان وكمان هيساعدك تظبطي الميزانية.

قابلوا ندين عشان تعرفوا اكتر عن قصتها مع فرحي وايه الخطوات اللي خدتها عشان يظهر للنور!

الأول قوليلنا منين جاتلك فكرة فرحي؟

ناس كتير كانت بتتجوز حواليا في وقت ما وكنت باساعدهم في تجهيزاتهم، وانا اصلاً بحب الأفراح وبشوفها حاجة جميلة.

لكن بدأت ادخل في تفاصيل الفرح نفسها ولقيتها حاجة صعبة وموترة بالرغم من أن ده اسعد يوم في حياتك.

لقيت بنات بتنسى حاجات وفي بنات بيتنصب عليها ومكنش في مكان واحد مجمع كل الخطوات والتجهيزات اللي المفروض تحصل في الفرح. من هنا جت فكرة "فرحي".

 

ايه الصعوبات اللي واجهتك لما بدأتي البيزنيس بتاعك؟

لما بدأت أعمل الويب سايت اتنصب عليا. الحمد لله رجعت الفلوس بس بعدها حسيت اني مش عايزة اعمله وقفلت الموضوع لكن بعد فترة رجعت وقررت اعمله تاني. كمان من الصعوبات اللي واجهتني ان فكرة فرحي جديدة وكان صعب نقنع الناس انه احنا مش منظمين افراح لكن احنا محطة شاملة هتلاقي فيها كل اللي محتاجاه لتجهيزات الفرح من أول حجز المكان لحد فندق شهر العسل.

"فرحي هو البيبي بتاعنا"

مين اكتر حد قدملك الدعم في رحلتك؟

الداعم الأكبر ليا هي علّية شريكتي. فرحي هو البيبي بتاعنا. كمان خطيبي وعيلتي وصحابي بيدعموني جداً.

 

إزاي بتوازني بين البيزنيس و حياتك الخاصة؟

الموضوع صعب جداً وكل ما البيزنيس كبر اكتر كل ما الموضوع بقى مستحيل! لكن كل شهر بنبعد في عن الشغل تماماً انا و باقي الفريق وبنسميه "اليوم الصامت" وحتى مش بنكلم بعض في.

 

بعد الجواز، تفتكري هيكون صعب انك توازني بين الأولاد والشغل؟

انا عندي كلب لو ممكن نحسبه هههه. لكن عليّة عندها طفل والموضوع بيكون صعب التوفيق بين البيت وبينه وبين الشغل انا عارفه انها بتعاني من الموضوع لكنها بتوديه حضانة دلوقتي، فبيكون عندنا فترة الصبح بتكون هادية اكتر.

 

ايه هي مخططاتك لفرحي؟

احنا عايزين نغير مجال الأفراح مش بس في مصر لكن في الوطن العربي. احنا عايزين التجهيزات تكون اسهل لكل الناس اللي عايزه تتجوز وعايزين نقولهم ان الموضوع سهل وبسيط ومسلي. يعني عايزين نكون المحطة الاولى في تجهيزات الأفراح في الوطن العربي كله.

 

تنصحي الستات اللي عايزه تبدأ البيزنيس بتاعها بأيه؟

نصيحتي لأي حد عايز يبدأ البيزنس بتاعه انه يكسب خبرة الأول. اشتغل في ستارت اب، اعمل علاقات لأنها مهمة جداً، كمان متتخرجش وتبدأ مشروعك بدري، لأن الموضوع صعب.

نصيحتي للستات بقى هي خليكم واثقين في نفسكم اكتر! أنتِ تعرفي تعملي اي حاجه بيعملها الراجل وكمان اكتر. بيزنيس زي فرحي لو راجل فكر يعمله مش هينجح لأنه محتاج ست تفهم الموضوع ماشي إزاي. الستات محتاجة تصدق في نفسها وفي قدرتها اكتر.

 

إزاي بتساعدي باقي الستات في شغلها عن طريق البيزنيس بتاعك؟

مجال الأفراح فيه ستات كتير جداً، زي الميكب ارتيست و الويدينج بلانرز وغيرهم كتير… احنا بنساعدهم الناس تعرفهم اكتر من خلالنا بشكل مجاني. كمان فريقنا بالكامل من الستات فاحنا بنساعدهم بأننا بنعين كل يوم ناس اكتر واكتر.

هل دراستك للتسويق ساعدتك في البيزنيس بتاعك؟

أكيد دراستي ساعدتني، لكن مش عارفة هل دراستي ولا خبرتي العملية ساعدوني اكتر. لأن كل خبرتي في الشغل كانت في الماركتينج، لكن الأكيد الاتنين ساعدوني.

شغلك بيتتطلب تكوني في مود حلو طول الوقت، بتعملي ايه لما تكوني برا المود؟

انا بعرف افصل بين مودي و الشغل و مفيش حاجة بتأثر على التانية دي حاجة انا بعرفة اعملها في حياتي عامة مش الشغل بس.

 

بين كل الأفراح اللي رتبتيها. اي فرح هو المفضل بالنسبالك؟

كل فرح له نكهته الخاصة! لكن المفضل ليا هي الأفراح الصعبة اللي فيها تحدي عشان في اخر اليوم كل شيء بيبقى كويس وبننبسط بتعبنا. لكن كمان الأفراح اللي فيها ميزانية كبيرة لأنها بتخلينا نشتغل بحرية اكتر ونعمل الحاجة بسهولة وبشكل احلى.

بتحسي بأيه مع كل عروسة بتساعديها في اسعد يوم في حياتها؟

بنحس احساس رائع لما عروسة تقولنا شكراً انتوا انقذتوني او خليتوا يومي احلى، وقتها بننسى كل التعب!

 

بتساعدي العرايس اللي بيجولك بميزاينة صغيرة إزاي؟

مش كل فرح بنعمله بتكون ميزانيته كبيرة، كتير من الناس بيكونوا جايين بميزانية صغيرة وبنقدر نساعدهم عشان عندنا علاقات كتير وتجار كتير وشاطرين في البحث الحمدلله. لكن اهم حاجه تكون العروسة فاهمه اننا ماشيين بميزانية محدودة و بنحتاج نقلل من حاجات او نحط حاجات في اولويتنا. وبنحاول نعمل احلى حاجة بميزانية صغيرة.