21 يناير 2021 1169 0  

المقابلة الأولى بتكون مخيفة وبتكوني متوترة جدًا قبلها، ليه القلق؟

خدي نفس عميق وتعالي نتكلم في المفيد.

بالنسبة لاللبس، ألبسي هدوم تحسسك بالراحة. مش لازم تكون جديدة، لكن اختاري لبس شكله أنيق ويحسسك أنك أنتِ. لو مصرّرة يكون في اختيارات تنقي منها، ممكن تلبسي چينز، وتي-شيرت سادة وچاكيت أو بليزر مع جزمة عادية أو كعب. ممكن كمان تجربي فستان منقوش مع صندل أو جزمة برقبة (بوت).

بالنسبة لاختيار المكان، لو متعرفوش بعض، روحوا مكان عام زي كافيه لكن هادي علشان يكون في فرصة تتكلموا بحرية. لو تعرفوا بعض وفي بينكم اهتمامات مشتركة في الفنون على سبيل المثال: ممكن تحضروا عرض مسرح أو تزوروا متحف. لو أنتم الاتنين بتحبوا الحركة، ممكن تجربوا اختيار جرئ زي الترامبولين أو تلعبوا ألعاب فيديو. بشكل عام، برشح تختاروا حاجة بره الصندوق علشان التوتر يقل، وكمان لأني مؤمنة أنكم لما تعملوا أنشطة مع بعض ده بيظهر جزء أكبر من شخصياتكم عن الكلام عادي.

دلوقتي ده الجزء المهم، اعتقد قرأتي المقال علشانه، تتكلموا في إيه؟ التزمي بالكلام عن الهوايات والاهتمامات والأصحاب والسفر والأفلام والأمور هتكون سهلة. ممكن كمان تتعمقي وتسألي أسئلة فلسفية، مثلأ: في الحياة،إيه ممكن يشجعك؟ وأسئلة من النوع ده. لكن أبعدي عن الدين أوالسياسة في المقابلة الأولى. أنا عارفة أن ده بيمثلك تحدي لو أنتِ من النوع اللي بيحب يسمع أكتر، فعلشان تقدري تدخلي في الحوار؛ أبدأي أنك تعلقي على الكلام اللي بيقوله.

بعيدًا عن كل ده، عبري عن نفسك وكوني واثقة واستمتعي. فكري في المقابلة على أنها تجربة أنك تتعرفي على شخص من قريب، وحتى لو مكنتوش مناسبين لبعض، ممكن تكسبوا بعض كأصدقاء.