31 أكتوبر 2022 570 0  

كلنا بنقضي حياتنا بنحاول نعرف شكل مستقبلنا ويا ترى هنبقى ايه لما نكبر. كل مجهودات الطفولة والشباب بتصب في هدف واحد: وهو إننا نلاقي شغل كويس بمقابل كويس عشان نضمن اللي جاي ونبقى حققنا حاجة في الحياة. بس هل ممكن بعد ما تعمل كل ده وتوصل للهدف اللي كل الناس بتسعى ليه وتبقى في شغل بمقابل ثابت، تسيب كل ده وتروح تبدأ من الصفر في مجال مختلف تمامًا؟ بالرغم من إن الناس هتقول عليك مجنون، وبالرغم من المخاطرة الكبيرة اللي ممكن تعملها؟ من هنا، غيرت الشيف دينا حمدي شكل حياتها بالكامل، واتجهت لمجال الطبخ بعد ما كانت بتشتغل في مجال التنمية وبعدين مجال صناعة المحتوى، تحديات كتير واجهتها من فكرة الكارير شيفت بعد نجاح كبير، وتحديات تانية من العمل في مجال معظمه رجالة بس. عشان كده كان لازم يبقى لينا حوار مع الشيف دينا، عشان تلهمنا بقصتها! وتشارك معانا وصفات لذيذة بطريقة سهلة.

من مهنة التنمية مرورًا بصناعة المحتوى وأخيرًا مجال الطبخ، إزاي ده حصل؟
انا اشتغلت في منظمة في مجال التنمية لمدة 8 سنوات، المنظمة دي كانت بتدعم اللاجئين في مجال التعليم. وبعدين استقلت من الوظيفة دي وبدأت أشتغل كمتخصصة في تقييم المشاريع في مجالات مختلفة زي الأطفال المشردين، قضايا المرأة، وغيرهم. وبعدين بدأت في 2016 اشتغل صانعة محتوى، كنت بحاول اكتشف نفسي لحد الوقت ده، ومن هنا، الناس بدأوا يتسائلوا عن إني إزاي أسيب وظيفة ثابتة بمستوى كويس عشان بس اشتغل صانعة محتوى. حبيت أخرج من فكرة وجود مدير بيتحكم في حياتي وفي مواعيدي وأجازاتي، حبيت أخرج عن الشئ المعتاد. وحققت بالفعل نجاح كبير في مجال صناعة المجتوى، ووأنا لسة بحاول اكتشف نفسي، لقيت إنه لسة في حاجة ناقصة وإني محتاجة اتعلم أكتر عن مجال المطاعم التجارية. أخدت شهادة ودبلومة في مجال الضيافة من دبي، ودي حاجة ساعدتني جدًا مش بس كشغل على السوشيال ميديا ولكن كمان في شغلي في استشارات المنيو وشغلي كطباخة بدوام كامل.



إزاي عرفتي إن شغفك هو الطبخ؟
أنا قدرت اعرف شغفي على مراحل، جدتي كانت طباخة شاطرة جدًا جدًا، كنت بشاركها لما كانت بتعمل المكرونة، المحشي، الكيك. أفتكر إن في مرة جدتي كانت بتحضر الفراخ وبتنضفها وكنت قاعدة معاها، وخليتني أعمل الفراخ زي ما هي عملتها بالظبط. أفتكر كمان وأنا صغيرة والدتي كانت بتشتغل، فاتعودت أعمل الأكل ليا ولأخواتي بعد المدرسة. بعدها حبيت الطبخ أكتر وبدأت أعمل وصفات من غير ما اعرف مكوناتها، كنت بخمنهم، ده حسسني إني عندي موهبة الإبداع والابتكار في الأكل.

ايه أول وصفة عملتيها؟ وكان عندك كام سنة؟
كان عندي 10 سنين، عملت مكرونة بالصلصة وفراخ مسلوقة.

ايه اللي شجعك تشتغلي في مجال الطبخ؟
كنت عايزة أحول شغفي لمصدر مال، وكمان كنت حابة اشتغل في حاجة بحبها.

ايه العقبات اللي واجهتك في العمل في وظيفة معظم عامليها من الرجالة؟
كانت صعبة جدًا، لإن الناس بيحكموا على الشيفات الستات من قبل ما يعرفوهم، بيشوفوا إنك ماتقدريش تنجحي، ماتقدريش تتحملي ضغط الشغل، الناس قالولي مش هتقدري تبقي في شغل بدوام كامل وخصوصًا الشغلانة دي، قالولي إنها مش مناسبة ليا، قالولي إني رقيقة جدًا على إني اشتغل في الشغل ده. ده الكلام اللي بيتقال لأي ست عمومًا بتشتغل في مجال معظمه رجالة، بس أنا صدقت ونفسي وصدقت أحلامي وأصريت إني أكمل، لإني كنت بحس إني اتولدت عشان اشتغل في مجال المطاعم التجارية. بس انا دلوقتي بشتغل شيف بدوام كامل وزمايلي كلهم رجالة واتفاجئوا بشغلي ونجاحي. عشان كده انا ببعت رسالة للشيفات الستات: ماتخليش حد يحط حدود لأحلامك.


ايه العقبات اللي واجهتك لما قررتي تعملي كارير شيفت؟
فكرة الكارير شيفت صعبة، خصوصًا لو بتبدأي من الصفر في مجال مختلف تمامًا. الناس هتشوفك مجنونة وهيتسائلوا انتي ليه ممكن تسيبي وظيفة ثابتة وكويسة عشان تشتغلي شيف. عشان كده، لو أي حد بيفكر يعمل كارير شيفت، لازم يبقى قوي لإن الموضوع فعلًا مش سهل، ويمكن تواجه صعوبات كتير مادية وصعوبات نفسية بسبب التنمر، لازم تكون مسؤول، قوي، ومنضبط، عشان تقدر تواجه الموقف.


مين أكتر ناس كانت بتدعمك في رحلة الكارير بتاعتك؟
عيلتي هما كانوا أكتر ناس بيدعموني معنويًا وماديًا. من غيرهم ماكنتش هوصل للي أنا فيه دلوقتي. فمثلًا من أول ما بدأت أعمل فيديوهات كنت بعملها في البيت، فكانوا بيساعدوني في ترتيب حاجاتي وأدواتي وحتى غسيل الأطباق كانوا بيساعدوني فيه.

كمطورة وصفات، إزاي بتقدري تلاقي الإلهام؟
الإلهام بييجي عادة من حاجتين، أول حاجة هي إني بحب أجمع بين مطبخين مختلفين زي المطبخ المصري والأجنبي، فمثلًا أنا عملت الرقاق بالجمبري المفروم، عملت مثلًا التشيز كيك بالطحينة والعسل الأسود، عملت كمان كنافة بالبلح والقرفة بصوص السينابون. تاني حاجة المقادير بتديني الإلهام، فمثلًا لما ظهر اللوتس بيسكوف في مصر إداني إلهام كبير، فكنت أنا أول حد يعمل الكنافة باللوتس في مصر وهي اتشهرت فعلًا وعجبت الناس.


إزاي ذوقك أو نَفَسك في الأكل اتطور بمرور الوقت؟
من خلال التجارب الكتيرة والدراسة والمعرفة الواسعة، طبعًا ده اتطور بنسبة 100%.

ايه هو مطبخك المفضل؟
بحب المطبخ الياباني خصوصًا إني باشتغل في مطبخ ياباني، بحب كمان المطبخ اللاتيني والمطبخ الأسيوي.


ايه هي خططك الجاية؟ وهي بتخططي إنك تفتحي مطبخك الخاص؟
خططي الجاية هي إني أزود المعرفة بتاعتي كويس جدًا في مجال المطاعم التجارية، وبعدها هقدر أقرر لو هفتح مطعمي الخاص أو هكمل كفريلانسر.

إزاي ممكن تساعدي الستات من خلال شغلك؟
أنا بشوف إن دعم الستات ومساعدتهم دي أكتر حاجة مهمة في مجتمعنا حاليًا ومحتاجة للتطوير، لإننا عندنا قناعات سامة ومش حقيقية متأصلة في عقول الناس زي إن الستات مش بتساعد بعض أو الستات بتغير من بعض، كل ده مش حقيقي. أنا مقتنعة جدًا بفكرة إن الستات بتساعد بعضها على عكس الأفكار المنتشرة، عشان كده كنت بساعد صغار صانعي المحتوى والنجوم الصاعدة.


نصيحة ممكن تقوليها للأمهات اللي بتشتغل بدوام كامل إنهم يطبخوا وصفات لذيذة بغض النظر عن يومهم المشغول دايمًا؟
أقولهم إنهم يقدروا يقضوا ساعتين في الأسبوع في تحضير الأكل بحيث يكون جاهز وكل مكوناته جاهزة على الطبخ زي سلق اللحمة، تحضير الكفتة، صدور الفراخ والبانيه، وكمان إنهم يشتروا الخضراوات المتنضفة والجاهزة على الطبخ دايمًا عشان يقدروا يعملوا لأولادهم أكل بيتي وصحي.


ايه هو طبقك المفضل؟
زي كل المصريين، طبقي المفضل هو الرز والفراخ والملوخية.

ايه أسرع طبق بتحبي تعمليه؟
المكرونة، السوشي، وكل أنواع الشوربات.

قوليلنا وصفات لـ 5 أكلات سريعة للأمهات العاملات؟

الوصفة الأولى: فريك الدجاج بالمشروم والكريمة،

المكونات:
صدور دجاج نقطعها لمكعبات متوسطة الحجم
زيت طهي
2 كوب من الفريك
6 فصوص من الثوم المهروس
1 علبة من المشروم مقشر ومقطع إلى شرائح
2 مكعب من المرقة
2 معلقة من الدقيق
3 كوب من المياه
2 كوب من كريمة الطبخ
جبنة بارميزان
بقدونس مفروم

الطريقة:
- في طاسة سخنة بنحط الزيت ومكعبات الدجاج وبنحط عليهم ملح وفلفل أسود، وبنقلب لحد ما تاخد اللون الدهبي، وبعدها بنطلع الدجاج ونحطه على جنب.
- في نفس الطاسة، هنزود شوية كمان من الزيت، ونحط الفريك عشان يمتزج مع الصوص كويس.
- بنحط مكعب المرقة وكمية الثوم ونقلبهم.
- بعدها هنضيف المشروم
- بعد كدا هنوطي النار ونغطي الطاسة ونسيبها لمدة من 15 لـ 20 دقيقة.
- بنضيف الدقيق ونقلب وبعدها بنحط كريمة الطبخ
- نحط الدجاج
- نضيف نص كوب من جبنة البارميزان
- نزين الطبق بالبقدونس وجبنة البارميزان

الوصفة التانية:

كاساديا الدجاج:

- 160 جرام من صدور الدجاج.

- 30 جرام من الفلفل الأحمر (جوليان)

- 4 قطع من البصل المخلل.

- جبنة شيدر وجبنة سويسرية.

• بهارات الكاجون:

4 ملاعق صغيرة من البابريكا

4 ملاعق صغيرة من الكمون

2 ملعقة صغيرة من عصير البصل

2 ملعقة صغيرة من الثوم المفروم

1 ملعقة صغيرة من الفلفل الأسود

1 خبزالتورتيلا.

 

الطريقة:
- في طاسة متوسطة الحجم ، حطي كمية قليلة من الزيت ، ونقلب الدجاج ، ونحط عليها البهارات.

- لما تبدأ الفراخ تاخد اللون الدهبي، هنضيف الفلفل.

- في طاسة كبيرة ، هنحط خبز التورتيلا، نضيف عليه الدجاج، الفلفل، الجبنة ، البصل المخلل
- نقفل التورتيلا ونقلبها على الجانبين لحد ما تاخد اللون الدهبي.
- تقدري تقدميها مع اللبن الزبادي وشريحة الليمون، والصلصة المكسيكية 

 

وصفة الصلصة المكسيكية:

• 15 جرام من مكعبات الطماطم الصغيرة.
• 15 جرام من البصل الأحمر ونقطعه مكعبات صغيرة.
• 15 جرام كزبرة طازجة.

الوصفة الثالثة:

رقاق بالجمبري المفروم
تكفي 8 أفراد
زمن التحضير: 60 دقيقة

المكونات:

1. زيت طهي
2. 1/2 كوب بصل ونقطعه مكعبات.
3. 2 كوب جمبري مفروم خشن
4. 1 ملعقة كبيرة من الثوم المفروم.
5. ملح وفلفل حسب الرغبة.
6. زعتر طازج.
7. 1 ملعقة كبيرة من الدقيق مذابة في نصف كوب حليب.
8. 1 1/2 كوب من مرقة الجمبري.
   الطريقة: (https://youtu.be/p_TFSxFooNg)
9. مكعبات الزبدة.
10. رقاق.
    الطريقة:
11. نسخن الفرن على 200 درجة مئوية.
12. للحشوة ، في طاسة. سخني ملعقتين كبيرتين من الزيت النباتي على نار متوسطة.
13. يضاف البصل ويقلى حتى يصبح شفافاً ثم يضاف الجمبري ويخلط حتى يتحول لون الجمبري إلى اللون البرتقالي.
14. يضاف الثوم المفروم ، الزعتر الطازج ، الملح ، الفلفل حسب الرغبة ويخلط.
15. نضيف الزعتر الطازج ونضيف خليط الدقيق بالحليب.
16. قلّبي لحد ما المزيج يبقى كثيف وبعدين نسيبه على جنب
17. في طبق للخبز، هندهنه بالزبدة
18. ضعي طبقة واحدة من الرقاق مع ملعقة من مرقة الجمبري الساخنة وكرري الخطوة 3 مرات.
19. يضاف خليط الجمبري ومكعبات الزبدة الصغيرة ويكرر ذلك. أضيفي 4 طبقات أخرى من رقاق كل منها مغموسة في مرق الجمبري.
20. اضغطي برفق مع وضع يديك فوق الرقاق.
21. أضف مكعبات الزبدة على الوجه. اخبزيها لمدة 30 دقيقة حتى تصبح ذهبية اللون. مقرمشة من الخارج وطرية من الداخل.
22. تقدم ساخنة
    
    

الوصفة الرابعة:

وصفة سلطة الجبنة الكوتاج:

 

المقادير:

1- جبنة قريش

2 - طماطم مقطعة 

3-بهارات الدقة:

* 1/3 كوب سمسم

* 1/3 كوب بندق غير مملح

* 1/2 كوب بذور كزبرة

* 1/4 كوب بذور كمون

* الملح والفلفل حسب الرغبة.

نقلبها ونحطها في برطمان محكم.

 

التقديم:

* تخلط جميعًا معًا وتنتهي بزيت الزيتون.

* نأكل بالشوكة أو بالخبز البلدي المصري.

الوصفة الخامسة:

رز بقلوب الدجاج:

المكونات:

1. زيت طهي
2. 1 بصلة متوسطة الحجم.
3. 1/2 كيلو قلوب دجاج.
4. 2 ملعقة صغيرة من الفلفل الأسود.
5. 1 كوب ونصف أرز مصري.
6. ملح حسب الرغبة.
7. الماء حتى يغطى (كوب واحد وربع ماء لكل كوب أرز).

 

الطريقة:

1- في حلة ساخنة ، نضيف زيت الطهي ونقلي البصل ثم نضيف قلوب الدجاج ونقلب.

2- نضيف الفلفل الأسود.

3-  نضيف الأرز ونقلب لمدة 5 دقائق.

4- نضيف الماء حتى يتغطى الأرز.

5- نحطها على نار عالية حتى تصل لدرجة الغليان وبعدين نوطي النار لمدة 20 إلى 25 دقيقة.