14 يونيو 2022 595 0  

السعي ورا شغفك هو افضل حاجة ممكن تعمليها لنفسك!

"لا يوجد ما هو مهم مثل الشغف. بغض النظر عما تريد أن تفعله في حياتك، كن شغوفًا" جون بون جوفي.

ده بالظبط اللي عملته ضيفتنا. اتعرفوا على تولين البري، أم شغوفة عندها 34 سنة قررت تبدأ الكاريير بتاعها بالحاجة اللي بتحبها: الاكل الصحي.

الحياة الصحية بقت حل أسهل مع health matters nutrition

 

 احكيلنا، أمتى بدأ شغفك للحياة الصحية؟

الحياة الصحية كانت دايمًا جزء من حياتي، لكن خلال فترة الكورونا حسيت أني مرتاحة اكتر وقلبت حياتي كلها من وقتها.

انا كنت دايمًا بلعب رياضة وبروح أتمرن و أركب خيل في الصحرا، وكنت دايمًا بحب الطبخ والأكل بشكل عام وبحب أبتكر وصفات جديدة. عشان كدة قدرت أجمع بين الصحة والطبخ في نفس الوقت في فترة الكورونا.

منين جتلك فكرة مشروعك Health Matters Nutrition؟

كنت مهتمة دايمًا بالتغذية وبعمل سيرش كتير وبقى عندي معلومات كتير عن التغذية ونمط الحياة الصحي. ولما قررت اني عايزة ده يبقى مهنة وبيزنس، كان عشان كنت عايزة أكون أكثر صحة وقت الكورونا عشان كنا كلنا محبوسين في البيت ومش بنعمل حاجة غير الأكل، وده أثر على ناس كتير من ضمنهم أنا. فبدأت آخد كورسات واعرف اكتر عن التغذية وبدأت بنفسي و خسيت 14 كيلو وبعدها بدأت مع عملاء اكتر!

ايه الصعوبات اللي واجهتك لما بدأتي الشغل الخاص بيكي؟

انا بدأت خلال فترة الكورونا و كان صعب جداً ابدأ أتعلم و أدرس من جديد. لكن الموضوع كان مهم جداً بالنسبالي وحبيت أتعلم كل المعلومات الجديدة عن إزاي نعيش حياة صحية سليمة.

مين الداعم الأكبر ليكي في شغلك؟

عيلتي و جوزي هما الداعميين الأكبر ليا. و بيستمروا في دعمي عشان أكون افضل وافضل. انا من غيرهم ولا حاجة.

إزاي بتوازني بين شغلك وحياتك الشخصية؟

مش هكذب عليكم الموضوع صعب. لكنه ممكن مع شوية إدارة وقت وتنظيم الأفكار والمهام ممكن يتعملوا مع بعض .

عادة بحضر كل حاجة من بدري وبدي كل شيء وقته المناسب. سواء وقت الشغل او الوقت الشخصي.

أيه النصيحة اللي تحبي تقديمها لأي ست بتخطط انها تبدأ مشروعها؟

نصيحتي هي:

 -ابدأي بخطوات صغيرة

- اكتبي أفكارك في ورقة وابدأي خططتي لخطواتك الجاية

-متستسلميش ابداً وحاولى دايمًا وفي يوم من الأيام هتوصلي لأحلامك

- أسعي ورا حلمك ومتسبهوش و استمري في المحاولة لحد ما تنجحي في الحاجة اللي بتحبيها

احكيلنا اكتر عن برامج التغذية الصحية.

الهدف هو تغيير نمط حياتك لحياة صحية أكتر عن طريق اني اعلمك تاكلي ايه بدل ما تمشي على دايت بس.

هي وجبة صحية متوازنة ولذيذة في نفس الوقت من غير ما تحرمى نفسك من حاجة.

ايه خطتك بعد برنامج أكلة حلوة؟

عندي أمل نقدر نكمل برنامج أكلة حلوة وكمان بخطط أعمل فيديو وصفات ونصايح وأفكار عن ازاي نغير نمط حياتنا من العادات السيئة لنمط حياة صحي أكتر إن شاء الله.

متاكليش أقل لكن كلي أفضل!

تنصحي بأيه الناس اللى عايزين يبدأوا الحياة الصحية لكن لسه مترددين؟

الحياة الصحية مش معناها ابداً الحرمان من الأكل اللذيذ، ومش معناه إنك تاكلي كل حاجة مشوية ومش معناه إنك تخسري وزن بس عشان تحضري فرح أو تلبسي فستان يكون مظبوط عليكي. الموضوع اكبر من كده وهيكون لصحتك مدى الحياة وهتشكري نفسك إنك بدأتي فيه. خدي خطوة واحدة في كل مرحلة وأحتفلي بيها لحد ما تلاقي نفسك وصلتي لهدفك النهائي. الموضوع ملوش علاقة بكمية الأكل ولكن بجودة الأكل. متاكليش أقل لكن كلي أفضل!

تقولي ايه للناس اللي شايفين إن الاكل الصحى والطعم اللذيذ ملهمش علاقة ببعض؟

أحب أقولهم جربوا الوصفات الأول وبعدين احكموا عليها. وأراهن انكم هتحبوها!

 

انتِ عندك أطفال. هل بتربيهم على الأكل الصحي؟ وقوليلنا إزاي نربي أطفالنا على الأكل الصحي؟

مظبوط. عندي بنت اسمها صوفيا 6 سنين و نص. بعلمها كل حاجة خاصة بالأكل الصحي> تاكل ايه ومتاكلش ايه وبعمل للبيت كله أكل صحي وكلهم بياكلوا معايا وبيحبوه الحمدلله.

الموضوع معتمد على أننا نعلم ولادنا أن الأكل الصحي طعمه احلي من الوجبات السريعة، وفي نفس الوقت نوضح لهم إزاي أي أكله ممكن نحولها تبقى صحية ويفضل طعمها لذيذ!

ايه خطتك لـ Health Matters Nutrition؟

انا دلوقتي في مرحلة ببني فيها نفسي اكتر بالمعرفة عشان اقدر اساعد ناس اكتر. وده هدفي الرئيسي من البداية: مساعدة الناس يكونوا كويسين وصحتهم الجسدية والعقلية سليمة.