11 أغسطس 2022 469 0  

كتير مننا بتعدي علينا فترة نحس إننا فقدنا الشغف في كل حاجة في الحياة، وبنبتدي نحس إن كل حاجة سخيفة ومملة ومابنبقاش قادرين نكمل، حتى أكتر الهوايات اللي بنحبها بتيجي فترة وحماسنا ليها يقل. وبعدها بنبدأ نحس بالإحباط. وبتبدأ كل الأنشطة السهلة اللي كنا بنعملها كذا مرة في اليوم بتبقى صعبة وتطبيقها بيكون شئ تقيل! والحقيقة كنت أنا كمان حابة أٌول إني كنت متحمسة جدًا أكتب عن فكرة فقدان الشغف، فلقيتني فقدت الشغف أصلًا ومش قادرة أكتب المقال!
فبعد بحث كتير، هقولكم على تجربتي، وهنتكلم دلوقتي عن 6 خطوات هتساعدنا نتعامل مع فقدان الشغف على إنه ضيف كئيب وقته قليل ومش هيكمل معانا عشان نقدر نتخطاه.

1- اتأكد إنك بتجري ورا شغفك الحقيقي:
لازم نتأكد إننا لقينا شغفنا الحقيقي، وإن الشغف ده نابع من جوانا ومؤمنين بيه، وهنبقى متقبلينه بمميزاته وعيوبه، الشغف ده ممكن يكون هدفنا في الحياة، هواية شاطرين فيها، وحاجة بتخلينا نطلع أحسن ما فينا عشان نوصل لسعادتنا. وممكن نفضل سنين مش عارفين إيه هو شغفنا الحقيقي في الحياة لحد ما بنوصل بالفعل، وبعدها كل حاجة بتكون أسهل.

2- فكر في الحاجات اللي مخلياك مكمل لحد النهاردة:
كلنا بيكون عندنا حاجة عايشين عشانها، الحاجة اللي بتخلينا نقوم كل يوم من عالسرير عشان لازم نكمل، علشانهم! فلازم من وقت للتاني نفكر في الحاجات اللي عايشين عشانها واللي مخليانا مكملين لحد النهاردة، ممكن الحاجات دي تبقى أشخاص قريبين مننا واحنا عايشين عشانهم، وممكن يكون هدف بنتمناه وعايشين عشانه.

3- نتعامل مع ناس بتنقلنا طاقة إيجابية:
التعامل مع الأشخاص الإيجابيين هينقلك كمان مشاعر إيجابية من وقت للتاني. لإنهم عادةً بيشوفوا الأمور بطريقة إيجابية، والوقت معاهم هيخلقلك كتير من الذكريات السعيدة والأوقات الممتعة اللي هتشيل من عليك حمل التفكير السلبي وفقدان الشغف.


4- نغير من روتين يومنا:
التغيير حتى لو كان بشكل بسيط ممكن يأثر بشكل إيجابي علينا، وممكن يرجع حماسنا من تاني. احنا ممكن نعمل ده من خلال إننا نعمل فطار مختلف، نغير ترتيب أوضتنا، نعمل ستايل شعر مختلف مثلًا. كمان ممكن نقرأ كتاب جديد أو نشوف فيلم مختلف. الحاجات دي ممكن تغير يومنا وتفصلنا عن أفكارنا السلبية.

5- نبدأ في الهوايات اللي نفسنا طول الوقت نعملها:
الهوايات أكتر حاجة ممكن تحرك شغفنا لإننا بنبدع في حاجة بنحبها، كمان بتخلينا نكتشف نفسنا بشكل أفضل. تجربة الهوايات والأنشطة المختلفة من وقت للتاني خصوصًا في الأوقات اللي بنحس بيها بانعدام الشغف، بيقدر يدينا إيجابية عشان نكمل ونرجع بشكل أقوى.

6- دايمًا نفتكر إننا وصلنا لمكان كنا بنتمنى نكون فيه:
لازم نفتكر من وقت للتاني إننا دلوقتي في المكان اللي كنا بنحلم بيه من سنين، حتى لو ده مش الحلم كله. بس التفكير بالطريقة دي هيدينا كتير من مشاعر الرضا والشكر لربنا عشان نكمل من تاني.