12 يناير 237 0  

كيف بدأ الرجل النطع

في سكرين شوت منتشرة الفترة دي من جروب على الفيسبوك ست بتسأل فيه الناس عن رأي قانوني إزاي تحفظ حقها في شقة من الشقق الي بتقدمها الدولة؛ جوزها هيقدم عليها بأسمه لكن هي هتدفع نص الأقساط والمقدم من فلوسها الشخصية، وكانت أراء الرجالة غريبة جداً وكانت من عينة "ربنا يعين الراجل الصراحة" أو "اتطلقي منه عشان انتي بيزنيس ومن مش زوجة ربنا يبعد امثالك عن الناس"!

 

وقفت قدام الاسكرين شوت دي مذهولة، مش عارفه امتى الرجالة في مصر بقت بهذه النطاعة؟ وامتى فقدنا التمييز بين مفهوم الحياة مشاركة و النطاعة وقعدت افتكر زمان لما حد شرحلي ليه "الرجال قوامون عن النساء" وعن ليه ربنا أمرنا أن "للرجل مثل حظ الأنثيين" كنت وقتها لسه بستكشف الحياة وبعرف أسباب كل حاجة عشان أقدر أشوف الدنيا بشكل صح، وكنت شايفه ان بما اننا دولة اسلامية والرجالة طول الوقت بتتكلم عن حاجات من حقوقهم في الدين، انهم يطبقوا الحاجات الي ملزمين بيها كمان، "ومازلت بصراحة"، لكن لسبب ما الرجالة بقت تتجه للنطاعة والعيش على قفا الستات بشكل غريب وبنسبة كبيرة تخلينا نفكر هل كل الرجالة بقت كده؟ و من امتى بقى ده العادي؟ بس قعدت مع نفسي وبدأت افكر واسأل ناس مختلفة ايه اسباب النطاعة الغريبة اللي بقت موجودة دي.

ولكن أحب انوه اني مع مفهوم المشاركة بين الزوجين او بين الراجل والمرأة بشكل عام، ولكن مش مع النطاعة بحد ذاتها و مش بنعمم ونقول ان كل الرجال كده لأن ده مش حقيقي اطلاقًا ولكن نسبة كبيرة من اللي بقينا نشوفها في حياتنا بقت كده.

فخليني اشارككم الأسباب اللي توصلنا ليها و هستناكم تقولولي لو شايفين اسباب تانيه او لو مختلفين في الرأي.

 

 

 

الأسترونج اندبيندينت ومن والمساواة بين الرجل والمرأة

 

في اخر كام سنة بدأت فكرة الاسترونج  اندبينت ومن تكبر وتكبر، وقدرت انها تمكن الستات انهم يحسوا بمكانتهم في المجتمع وقدروا انهم يتعينوا في وظايف اكتر، يحسوا بالأستقلالية ويحسوا بنفسهم وانهم مش شيء زايد في المجتمع ولكن دورهم مهم زيهم زي الرجالة.

لكن الموضوع تحول من الفكرة السامية دي اللي الستات فضلت تحارب عشانها سنين لناحية تانيه خالص!

كتير من الستات وقعت في فخ ان لا، انا احسن منه، انا اقدر اعمل اللي هو بيعمله بالظبط وكمان احسن منه بكتير، انا بس اللي اتحمل مسؤوليتي الشخصية سواء مصاريفي أو أي حاجه انا محتاجاها. " ومش بقول ان ده غلط خالص" لكن كل حاجه زياده بتتقلب ضدها!

الرجالة بقوا ياخدوا شعارات الستات وفكرة الاسترونج اندبيندنت ومن لشكل تاني، انها لازم تقدم كل حاجه، لازم تساعدني في كل حاجه، لازم لازم لازم… ونسيوا الحاجات اللي مطلوبه منهم اصلا، نسيوا الشهامة والمروءة ونسيوا واجبتهم اللي فرضها عليهم الدين ومش بيتكلموا عن اي حاجة غير حقوقهم وبس وبقوا يدخلوا على حقوق الستات كمان.

 

عقدة الخواجة

 

زي ما بقينا نسمع كتير عن عقدة الخواجة في كل حاجة في البلد، جزء الجواز هو كمان بقى متأثر بعقدة الخواجة، فتلاقي لو فتحتي أي موضوع مع راجل "نطع" أول حاجة يقولهالك ما الست برا بتشتغل وتصرف على البيت و كل حاجه بينهم بالنص، لكن ستات برا حلوين مش زي المصريات!

و بينسى الحقوق اللي وخداها الستات هناك وانها مثلا لو اتطلقت منه هتاخد كل ما يمكله بالنص، مش هيقدر يتجوز عليها، لو راحت أي محكمة تطلب حقوقها هتاخدها كاملة، مش هيقعدوا يلفوا ورا بعض سنين في المحاكم عشان بس تاخد نفقة أولاده اللي مسئول زيه زيها عنهم بالظبط!

 

تفضيل الراجل لراحته عن الشغل

 

في الفترات الأخيرة الرجالة بقت تفضل راحتها عن الشغل، بقى مش بس الرجالة عايزه الستات تعمل كل حاجه وهو يشارك معاها ف جزء ، لا بقى يرمي كل الحمل عليها هي، فتلاقي ستات بتشتغل شغلانة واتنين و تيجي البيت تأكل الولاد و تعمله الفطار و الشاي و تحافظ  على واجبتها كزوجة وهو بيه، مبيعملش أي حاجة غير يتفرج على التلفزيون والموبايل، وشايف انه هو الصح ويمكن يبقى شايف انه بيعمل كتير كمان لكن الست دي هي اللي مش مقدره و مش شايفه حاجه، و المعظم طبعًا بتعمل ده عشان خايفه من التعنيف.

وهنا افتكر موقف في مقال قرأته كانت ست بتحكي انها عانت من نطاعة جوزها لفترة كبيرة لكنها للاسف وقتها كانت خايفة تطلق للاحكام الكتير اللي بتطلق على الست المطلقة و كان معاها 5 ولاد، لكن بعد فترة كبيرة اتشجعت و اتطلقت واتجوزت راجل تاني وعلى حد قولها كان ابن حلال وكان بيصرف على البيت ومش بيأثر معاها او ولادها الـ 5، لكن بعد فترة تعب جداً لدرجة انه ساب الشغل وقعد في البيت وهي كانت بتنزل تشتغل وتصرف هي، ولما خف رفض انه ينزل الشغل تاني وقال انه حب قعدة البيت و مش هينزل الشغل، وهي بدل ما كانت بتصرف على 5 زمان بقت تصرف على 7، كأن النطاعة هي دوامة الرجالة بتحب تلف جواها.

 

دي كانت اكتر الأسباب اللي اتقالت لما سألت عن السبب،  قولولنا انتوا شايفين ايه؟ وازاي نقدر نتخلص من الظاهرة دي؟