01 سبتمبر 2022 273 0  

إزاي عرفت إنه مش الشخص المناسب؟

أوقات كتير بنحس إننا لقينا شريك حياتنا بجد، وبنكون من برا عارفين إن ده شخص مناسب فعلًا، زي قد ايه هو شخص محترم، قد ايه هو مثقف، شغله كويس وقد ايه هو شكله حلو، وبتلاقي إن معظم الناس بتقول عليه "ده ألف واحدة تتمناه"، "المهم إنه مش بخيل" وده لإنهم في الحقيقة بيكونوا شايفين صفات سطحية عن الشخص ده وكإنك مش هتحتاجي غير الحاجات دي عشان تعيشي معاه.

ولكن القرب بيخلينا نعرف اللي قدامنا أكتر ونشوف منه كل صفاته وأسلوب حياته اللي ماحدش تاني بيشوفها. الحاجات الكويسة اللي فيه والحاجات السيئة كمان، ردود أفعاله التلقائية تجاه الأمور، الحاجات اللي بيداريها، وغيرهم كتير من صفات مش بتبان في الأول من معظم الأشخاص، هنتكلم دلوقتي عن الحالات اللي ممكن تحسي فيهم إنك مختارتيش الشخص المناسب.

1- أول حالة ممكن تخليكي تعرفي إنك مش مع الشخص المناسب، لو هو بياخد خطوة الارتباط لمجرد إنه عايز ياخد الخطوة دي بس سواء ارتباط رسمي أو مش رسمي، وده ممكن تعرفيه لو لاقيتي الشخص مش مهتم حقيقي إنه يعرفك، وكل كلامه عن نفسه أكتر وعن حياته، وإنك مش بتعرفي تعبري عن نفسك معاه، وده شئ مؤذي في أي علاقة. لإننا الطبيعي إننا بنختار شريك حياتنا عشان محتاجين فعلًا حد يكون قريب مننا، بيسمعنا، مهتم يعرف أكتر عن تجاربنا وعن اللي مرينا بيه. والموضوع ده بيحصل بشكل متوازن بين الطرفين، عشان يحسوا إنهم في علاقة صحية.

2- من الحاجات اللي ممكن كمان نقابلها إنه يكون طول الوقت بيتكلم عن علاقاته السابقة وعن مشاعره فيهم أكتر من كلامه عنكم وعن مستقبل علاقتكم، وده بيخليه يبان إنه مش قادر يتخطى ماضيه وإنه معاكي بس لإنه بيحاول يتخطاه.

3- أوقات بنتحط في موقف إن الطرف التاني بيتعمد إنه يحسسك أقل من قيمتك ويحسسك بشكل مش مباشر إنك شخص أقل منه، وده غالبًا بيظهر لما بيحاول طول الوقت يتكلم أكتر عن عيوبك بدل مميزاتك، أو إنه يبقى بيتكلم كتير عن نفسه أكتر من الكلام عنك.

4- التواصل الناجح هو أساس أي علاقة ناجحة، ولو ده مش موجود فمن المستحيل إن العلاقة تنجح، لإن رحلتنا في العلاقة مش بس بتمر بالأوقات الحلوة بس. كتير بنمر بخناقات ومشاكل وتحديات كتير عشان نقدر نكمل، ولو مقدرناش نتواصل مع بعض كويس ويبقى عندنا لغة للحوار في وسط كل ده، مستحيل نقدر نعيش مع بعض!

4- فكرة شريك الحياة معناها إننا بجد نلاقي حد نشارك معاه حياتنا بكل حاجة فيها، ونشارك يومنا من أول ما نصحى تعبانين ومش في أحسن حالاتنا، نشارك نجاحاتنا، واحتياجاتنا في نص اليوم، وخناقتنا ومودنا اللي مش دايمًا مظبوط، يعني حد نكون معاه على طبيعتنا بكل حاجة فينا، ولما ماتقدريش تكوني على طبيعتك وحقيقتك مع شريك حياتك.. إعرفي إنه مش مناسب لإنه يكون بجد شريك للحياة!