07 أبريل 2021 1590 0  

أيام قليلة تفصلنا عن رمضان! متحمسة جداً للعزومات و كل روايحه الجميلة. أول يوم فطار رمضان في بيتنا ماما اتعودت أنها تعمل بشاميل، جُلاش و الطبق الرئيسي ديماً بيكون بط وشوربته اللذيذة. أول أسبوع في رمضان بيمشي على هذا المنوال أكلات رائعة كل يوم لكن بعد الأسبوع ما يعدي ماما بتبدأ تسألنا، تاكلوا ايه على الفطار بكره؟ أحياناً بنقولها عايزين ناكل ايه و احياناً بنكون معندناش أفكار، زيها بالظبط.
في الوقت ده برامج الطبخ بتكون هي الحل، و النهاردة هقترح عليكم واحد من برامج نتفليكس المفضلين بالنسبالي و اللي هيساعدك تلاقي طبقك الجاي بسهولة.

مخبوزات نادية او Nadiya's Bakes

من احلى واللطف برامج الأكل و المخبوزات اللي اتعملت على الاطلاق. نادية حسين الفائزة في برنامج ( ذا جريتست باكينج شو ) ابهرتني بحبها الأول - المخبوزات - و كل موجاتها من الإلهام و الشكل اللذيذ
البرنامج يتكون من 8 حلقات ، الحلقة 20 دقيقة و كل حلقة فيها 3 وصفات و هتعرفنا على الخبازين و طهاة المعجنات اللي بتقدرهم.
في كل حلقة ، نادية هتسيبك و انتِ جعانة قدام وصفاتها من أول طبق الترياكي بالشعرية و الدجاج لحد كيك المانجو و جوز الهند.

 

https://www.youtube.com/watch?v=q8EeDufrnKQ

نادية بتوصف الخبز بأنه "مكانها السعيد" و طريقة الاهتمام بذاتها: " إذا كنت قلقانة ، أخبز. إذا شعرت بقليل من الحزن، أخبز. فعندما أركز على وصفة، أشعر أنه لا داعي أن أفكر في شيء آخر"

من مشاهدتي للبرنامج أقدر أقولكم فعلاً أن الخبز هو "مكانها السعيد" و الشعور ده لمسني كمُشاهدة ومع آخر حلقة في البرنامج، الخبز بقى مكاني السعيد انا كمان!
ممكن دلوقتي تقولوا "خبيز في رمضان؟ اكيد هياخد وقت كتير"، لكن وصفات نادية سهلة التحضير و مش هتحسي ابداً بالوقت و هتلاقي وصفات حادقة و حلوة.
بالنسبالي، هي غيرت طريقة تفكيري عن الخبيز كنت فكراه ممل و مليان طرق و حركات كتير اللي عمري ما هقدر انفذها، لكن مع كل حلقة بدأت أحس أنه يمكن الخبز مش بالصعوبة و الملل اللي انا فكراهم، و أتحول "لمكاني السعيد"
أكتر حاجة حبيتها في البرنامج أن كل الوصفات مش بعيدة عن طرق الطبخ بتاعتنا كمصريين، على سبيل المثال كان في وصفة البقلاوة.
البرنامج ده بيضمن لك جرعة من اللطافة في يومك و بتقدملك أفكار لاطباق الفطار والحلو كمان.