07 يوليو 2022 573 0  

علاقة الأم بأولادها علاقة مميزة جدًا، هي الحب الفطري اللي من أول مرة لإنك أول شخص بيحسوا بيه وبحنانه قبل ما بيشوفوه، زي ما أنتِ كمان بتحبيهم وبتحسي بيهم من قبل ما عينك تشوفهم. علاقتكم بتتطور مع الوقت من احتياج عشان الأكل والمساعدة في اللبس وغيرهم، لشئ أكبر وأقوى، فبيكونوا محتاجين وجودك معاهم دايمًا، وحنانك عليهم، ورأيك، وكل حاجة!
فعلاقتك مع أولادك من أول يوم لازم تكون صحية. لأنها هتكون أساس علاقتكم في المستقبل. وده الشئ الوحيد اللي لما تديله من قلبك هيعمل تغيير كبير، لأن فكرة تربية أشخاص أسوياء حاليًا بقت صعبة. وفيه شوية خطوات لو عملتيها هتساعدي إن طفلك يطلع شخص مسالم، عنده قلب، وسوي.

1- دايمًا اسأليهم عن رأيهم:
لما بتعودي طفلك إنه يقول رأيه، هيساعد في تنمية لغة الحوار بينكم. وهيساعده كتير في تنمية قدراته الذهنية وذكائه الاجتماعي، كمان هيخليه في المستقبل يقدر يعبر عن رأيه من غير ما يخاف أو يتكسف، وإن يكونله شخصية قوية. والفرق دا بيظهر مع الأطفال اللي أهلهم مكانوش بيسمحولهم يقولوا رأيهم، الأمر اللي أثر عليهم بشكل كبير، وخلى شخصياتهم أضعف.

2- عبريلهم عن حبك دايمًا:
فيه جملة قالها العالم سيجموند فرويد لخصت فايدة التعبير عن الحب في العموم، لما قال: “كم يكون المرء شجاعًا حينما يعلم أنه محبوب”
وده ببساطة اللي بيسببه التعبير عن الحب، بيخلينا أقوى!
التعبير عن الحب لأطفالنا -خصوصًا في أعوامهم الأولى- هيعزز ثقتهم في نفسهم، وهيديهم شعور بالقبول دايمًا وده الشئ اللي هيخلي من الصعب إن حاجة تأثر فيهم، بالإضافة لرابطة الحب اللي هتقوى بينكم، وتعليمه إنه كمان يعبر عن حبه.
تقدري تعبريلهم عن ده عن طريق إبراز مميزاتهم قدام الناس، تحضنيهم من وقت للتاني، تشاركيهم اهتماماتهم وتخرجي معاهم كتير أو تشتريلهم هدايا.

3- عوديهم يحكولك عن يومهم:
المشاركة مهمة لإنها بتخلي كل الأمور أسهل لمجرد إنك شاركتها مع حد، عودي أولادك دايمًا يشاركوكي تفاصيل يومهم ويحكولك ايه اللي بيحصل معاهم في المدرسة أو النادي أو أي مكان تاني. ده هيساعدك تعرفيهم الصح والغلط من خلال المواقف اللي فعلًا بيمروا بيها، وهيساعدك تديهم نصايح أكتر عن ردود 

.أفعالهم وإزاي يتصرفوا.

4- شاركيهم تفاصيل حياتك:
لما بتحكي لأولادك عن تفاصيل حياتك -المناسبة لسنهم بس- وايه اللي ممكن يضايقك، وإيه فرحك النهاردة مثلًا. ده بيقرب العلاقة بينكم أكتر. وهيحسوا إنك بتشاركيهم زي ما هما بيشاركوكي. مع الوقت هتحسي إنك كمان محتاجة تتكلمي معاهم وتحكيلهم.

5- اسأليهم عن أحلامهم وإيه اللي نفسهم يغيروه:
عالم الطفل صغير جدًا، بس العالم اللي في عقله كبير وفي اتساع دايمًا. قادر يتخيل ويحلم والطاقة اللي عنده كبيرة. اتكلمي مع طفلك دايمًا عن أحلامه زي: نفسه يطلع إيه لما يكبر؟ إيه اللي نفسه يحققه؟ إيه الحاجات اللي عايز يغيرها في حياته؟
ده هيساعد شخصيته إنها تنمو بشكل إيجابي ومتفائل، هيشجعه يذاكر أكتر، وهيبني جواه روح الطموح.

6- خصصيلهم وقت من يومك:
أفضل طريقة تقربي من أولادك بيها هي إنك تخصصيلهم وقت من يومك، وتشاركيهم اهتماماتهم، زي إنك تلعبي معاهم أو تخرجوا أو تطبخوا سوا.
ده هيقوي علاقتكم جدًا، وهيقلل احتياجهم للاهتمام من برا البيت. كمان هيساعدك تعرفي شخصية كل طفل واختلافه عن التاني، وإيه المشاكل اللي بتواجههم واللي محتاجة حل. وقت العيلة مهم جدًا، ولما كل فرد في الأسرة يهتم بيه ويقدره هيتعود عليه دايمًا ويبقى جزء من أساسيات حياتكم في المستقبل، والوقت اللي بتفصلوا بيه من ضغوطات الحياة.

7- خليكي مصدر الثقة والأمان ليهم:
علمي أطفالك إن الإنسان موجود في الحياة عشان يعيش، مش عشان دايمًا يتصرف صح ويختار كل الاختيارات المثالية في الحياة، بمعنى إن الخطأ وارد يحصل، الفكرة بقى أزاي نتعلم من الخطأ ده؟ علميهم يلجأولك دايمًا في أي مشكلة هتواجههم من غير خوف أو قلق لإن بكل بساطة، كل إنسان بيغلط!
ده هيساعدك تكوني مصدر الأمان والثقة ليهم وهيقلل من أي خطورة على حياتهم أو على سلوكهم.