28 يوليو 77 0  

ده سؤال بيدور جوا عقل كل بنت فى علاقة مؤذية، ودايما بنحس اننا بنلف فى نفس الدايرة ومش عارفين نكسرها ونخرج منها. الخروج من العلاقات المؤذية بياخد وقت واستعدادات وبيبقى على مراحل عشان تقدرى تمشى منها تماما بدون رجعه. وحتى لو بعد ما مشيتى اتطرح طلب الرجوع تبقي بتقرري ده من أرض صلبه واقفه عليها.

 وبما انك سألتي نفسك السؤال ده اعرفى انك هتقدرى تخرجى منها لأنك أدركتى الأذى الواقع عليكى وشفتيه بدون أى مبررات هتحطيها للي بيأذيكى.

المراحل كالآتي:

الورقة والقلم، اكتبى ودونى كل مواقفه معاكى الوحشة والحلوة. اللى جرحتك وكسرتك، واللى طيرتك من الفرحة. وده عشان عقلك يستوعب ان كل المواقف دى من شخص واحد مش اتنين، اكتبى أد ما تقدرى ولو قدرتى تكتبى بشكل يومى يبقى كويس جدا، اكتبى حتى لو كتابتك ملغبطه، الكتابة هتساعد عقلك انه يدرك ان كل الحلو والوحش اللى بيتعرضله من نفس الشخص.

وحاولى تحكى اللى تتعرضيله وحاسه بيه مع صديقة تثقي فيها وتسمعك، الحكى هيساعدك تشوفى أكتر اللى عايشاه.

 

بعد كده استقلالك المادى، سواء كنتى بتشتغلى أو مبتشتغليش، مهم فى المرحلة دى يبقى لك دخل شهرى خاص بيكى تدخرى منه جزء يساعدك تمشي من العلاقة وقت ما تكونى جاهزة، ولو بتشتغلى أصلا وبياخد فلوسك اسحبيها منه بالتدريج عشان ميأذكيش.

مهم ف المرحله دى تخططى لخروجك وتركزى على مواردك المادية، ايه بالفعل متوفروايه لسه محتاجاه؟

 

تالت حاجة اطلبى مساعده مختص، والمساعده موجودة لكل الفئات، من أول المستشفيات الحكومية زى الدمرداش وعين شمس والقصر العينى ودول فيهم عيادة نفسيه بفلوس قليلة جدا، لحد الدكاترة والأخصائيين النفسيين وبرضة موجود أسعار كتيرة للمتابعة فى جلساتهم، اختارى الأنسب ليكى واشتغلى على نفسك لحد ما تقدرى تاخدى قرار الانفصال عنه، واعرفى ان المطلوب  تتعلميه ف المرحله دى انك تنفصلي نفسيا وتصدى الأذى حتى لو فضلتى موجودة لحد ما تقدرى تمشى.

 

رابع وأهم حاجة بقى اعرفى انه أذاه ليكى مش غلط منك وانك مش ضعيفة، وانك متستحقيش الأذى النفسى والجسدى مهما كانت مبرراته ليكى، وانك تستحقى حياة سعيدة ومريحة وآمنة، وادراكك للأذى الواقع عليكى ورفضك ليه نابع من احترامك لنفسك ولمشاعرك.

وخليكى عارفة ان طبيعى تحسى خوف من الجاى لانه لسه مجهول بالنسبه لك، ركزى ف النهاردة ودلوقتى لأن تركيزك فيه هو اللى هيوديكى لبكرة اللى تحبيه ويكون آمن ليكى.