03 نوفمبر 2022 230 0  

وجود قطة في البيت دايما بيكون مسلي و ممتع و محبب للقلب و بيهون علي الواحد مصاعب كتير بيمر بيها برة البيت. لكن للاسف مشاكلهم في البيت مبتخلصش. و لو جينا نقسم المشاكل دي ايه هنلاقيهم 5: الشعر، الخربشة، ريحة الليتر بوكس، ريحة البيت، و ريحة القطة نفسها. في المقال ده بنقدملك 15 حل للمشاكل دي و تقدري تعمليهم بسهولة عشان تحافظي علي نضافة بيتك و في نفس الوقت تحافظي علي قطتك.

1) الشعر:

الشعر اول و اكبر مشكلة في حياة اي مالك قطط. حلها حاجة من 3، يا لينت روللر اللي بتنضف العفش و تلم الشعر، يا متابعة اقراص الديدان في مواعيدها يا الجرومنج لو القطة شعرها طويل. دي الحلول اللي قدامك تقلل جدا من قلق الشعر.

2) الخربشة:

الخربشة و تقطيع العفش تاني اكبر مأساة في حياة صحاب القطط. حلها بسيط جدا. يا تجيبي عامود خربشة من اي محل حيوانات اليفة. يا تجيبي خيط خيش و تلفي بيه رجلين الكراسي و الترابيزات فبقي عندك عواميد للخربشة في اماكن متعددة من البيت بتكلفة اقل و هيبقي اسهل انك تعوديهم علي استخدامها بدل الخربشة في عفشك. الحل التاني انك تتابعي قص ضوافرها في مواعيدها فخربشاتها تبقي ملهاش تأثير علي العفش.

3) ريحة الليتر بوكس:

تالت اكبر مأساة بقي هي ريحة البيت اللي بيتسبب فيها الليتر بوكس بتاعهم. حلها حاجة من تلاتة: يا تشتري ليتر بوكس مقفول، يا تغيري نوع الرمل لنوع بيطلع ريحة حلوة، يا تنضفي البوكس كل يوم. منها تقللي فرص عمايل البيبي برة البوكس و منها تقللي الريحة المزعجة في البيت.

4) ريحة البيت:

دي بقي مشكلة كبيرة في حياتنا كصحاب قطط. و لو شيلنا الليتر بوكس من عناصر تواجد الريحة هنلاقي ان في ريحة برضه. سببها ريحة اكل و شعر القطة. فعشان نحلها نقدر نحط اكل القطة بعيد عن المية بتاعتها عشان ميتلغبطوش في بعض و يعملوا ريحة وحشة. و نحط الطبق بعيد عن المكان اللي احنا بنقعد فيه. و نقدر برضه طول الوقت لما نيجي ننضف نستخدم منظفات ريحتها نفاذة تغطي علي ريحة القطة و تشيلها.

5) ريحة القطة نفسها:

و دي من ابسط المشاكل. الدراي شامبو موجود عشان يحل الازمة دي. و كمان وايبس تنضيف القطط و هدية ليكي من ومنز افينوز دي وصفة سهلة و بسيطة تنفع للقطط و الكلاب: هاتي زيت جوزهند و حطي عليه زيت لافندر و زيت شجرة شاي و زيت ليمون و اعمليهم خلطة مع بعض, ادهنيهن بلطف ورا ودان الحيوان و بين كتافه و عند رجله و بطنه. هتلاقي ريحته بقت حلوة ده ان طلع ريحة اصلا.