10 مايو 2020 1177 0  

وباء الكورونا الجديد جالنا بهدية، ادانا وقت. معظمنا دلوقتي يا بيشتغل من البيت يا بينزل يومين او تلاتة بس في الاسبوع. و مع الحظر بقي اخرنا كلنا في البيت الساعة 9. فبقي عند الناس المشغولة دايما اللي زينا وقت مكوناش نحلم به. و بقي فيه وقت نقضيه مع عانلاتنا و شركاء حياتنا. كلنا بنمر بمرحلة جديدة من حياتنا احنا فيها اهم من اي حاجة بنعملها. في ناس بتستخدم الوقت ده في حاجات مفيدة. غيرهم كان نفسهم تجيلهم الفرصة يبقي عندهم اي وقت زيادة يرتاحوا فيه او يعملوا حاجات لنفسهم تغيرلهم المود او حتي يقعدوا يتكلموا و يفضفضوا مع اهاليهم او صحابهم و يعوضوا عن الانشغال الدايم اللي هما فيه بسبب الوقت اللي بيروح في الشغل و المواصلات و ادارة البيت. حابة افرح الناس دي و اقولهم ان العالم اخيرا قرر يسلينا! اماكن زي برودواي و مواقع زي شيكسبير جلوب و وزارة الثقافة المصرية فتحوا مكاتب المحتوي بتاعتهم للجمهور ببلاش. و متاحف زي اللوفر و فان جوخ و الفاتيكان عرضت المعارض اللي فيها للجمهور اونلاين برضه ببلاش. اكيد الحاجات دي مش زي التجربة الحقيقية، بس وفرولنا فرص نغير الروتين و نتفرج علي حاجات مختلفة مكنش عندنا وقت نشوفها او ندور عليها لولا الاوقات الصعبة اللي احنا بنمر بيها. فلو انتي من محبي الفن، او بتحاولي ترجعي تمارسي هوايات منسية و تحيي حسك الفني، اللستة دي هتفرحك عشان فيها اهم الاماكن اللي فتحت محتواها للجمهور ببلاش:

الفنون و الثقافة من جوجل:

جوجل اتعاونت مع معظم المتاحف في العالم زي فان جوخ، موما و متحف فريدا كاهلو و دار الاوبرا الفرنسية و غيرهم كتير عملوا جولات افتراضية في المتاحف بتاعتهم. الموضوع بسيط، هتلاقوا اللوحات و الوصف بتاعها جمب بعض. و المتاحف مترتبة بالترتيب الابجدي. هتتبسطي جدا لو انتي من محبي اللوحات الفنية و تاريخ الفن التشكيلي و بتحبي المعارض و المتاحف.

برودواي اتش دي:

لو بتحبي التمثيل و المسرح، برودواي اتش دي بتوفرلك 7 ايام ببلاش لكل المسرحيات اللي علي الموقع من غير اعلانات. و لو حبيتي الموضوع و اتعودتي عليه اشتراكها الشهري حوالي 150 جنيه. زيها زي نتفليكس لمحبي المسرح!

شيكسبيرز جلوب:

هدية تانية لمجانين المسرح! شيكسبيرز جلوب رفعت شوية مسرحيات علي قناتهم علي اليوتيوب ببلاش. و كلنا طبعا عارفين اهمية شيكسبير لاي حد بيحيب المسرح: الاب الروحي للدراما! لو حابة تمثلي و بتتمرني او بتتفرجي علي كل حاجة خلقها ربنا عشان عايزة تبقي مخرجة او بتذاكري دراما عشان حابة تكتبي او بس بتحبي المسرح و الدراما هتلاقي نفسك في شيكسبيرز جلوب! معلومة بسيطة: ماكبث هتتعرض لاول مرة اونلاين يوم 11 مايو، جهزي نفسك!

وزارة الثقافة المصرية:

لو انتي مش بتحبي السرحيات الانجليزي، هتلاقي قناة وزارة الثقافة علي اليوتيوب فاتحة عروض من عروضها ببلاش. هتلاقي عليها حاجات كتير مختلفة، مسرحيات و حفلات موسيقية و باليه. الوقت مناسب للحبسة في البيت. انتي و لابتوبك و مسرحياتك في اوضتك.

فودو:

اما بقي لو كنتي مش مهتمة بالمسرح و بتحبي الافلام و المسلسلات. فودو بيقدم افلام انجليزي و مسلسلات كتير ببلاش من غير اشتراك. المشكلة الوحيدة انه مش اجدد افلام، بس معظمها حلوة جدا. هتلاقي افلام حلوة هتفكرك بايام حلوة. بالذات افلام الاكشن و الجريمة. بس احلي حاجة في الموقع افلام الرعب. الافلام القديمة اللي كانت قصصها حلوة و تنفيذها علي القد قبل ما كل القصص تتكرر و كل الخدع تتحفظ. خدي لفة اكيد هتلاقي حاجات تعجبك.

 

واضح ان العالم قرر يتكاتف و يوفر كل انواع الترفيه و التعليم علي النت ببلاش او بتكلفة قليلة. كل حاجة دلوقتي بقت متاحة عشان تشجعنا نعمل حاجة واحدة بس: نقعد في البيت! حتي لو الحظر اتخفف و الدنيا اتفتحت بالتدريج احنا عارفين ان لسه المشكلة متحلتش و مخلصتش. بلاش نخرج غير لو مضطرين. اتبسطوا و انتخوا شوية قبل ما الدنيا ترجع دوشة و زحمة تاني.