02 مارس 2021 853 0  

من أحلى المجاملات اللي ممكن تتقالك لما حد يدخل بيتك هي ان " بيتك دافي جداً "
مبقناش نتكلم عن ستايل البيت نفسه قد ما بقينا نتكلم عن الأحاسيس والمشاعر المصاحبة للبيت و عشان نحقق ده الموضوع بسيط جداً و هنحتاج حاجات صغيرة عشان نخلي البيت دافي و مريح ليكي و لضيوفك
جبنالك طرق تساعدك تدفى بيها بيتك مهما كان الاستايل:

 1. الإضاءة : مفيش حاجة اهم من الإضاءة لخلق جو دافي في البيت ضيفي مجموعة كبيرة من الإضاءة في البيت و استخدمي الإضاءة الدافية الصفرا و ابعدي عن الباردة البيضاء تماماً اكيد مش هتبقى حابة ان اضاءة  بيتك يبقى عامل زي إضاءة المكتب
الشمع كمان نوع من انواع الاضاءة , ممكن نعتبره النوع الأكثر راحة.

2. النباتات : ليهم طريقة فريدة من نوعها في اضافة الحياة للبيت و إحساس الدفء و الراحة اللي محتاجينه , ممكن تحطي نباتات طبيعية أو تزرعي النباتات اللي بتحبيها في مطبخك زي الروزماري مثلاً ولكن لو مش بتحبي النباتات الطبيعية ممكن تستخدمي البلاستيك و بتدي نفس المنظر و بتفضل فترة طويلة.

3.  المنسوجات: ضيفي مخدات و شالات على الاثاث و خصوصاً على الكنبة و السري و ممكن تختاري أي شكل بتحبيه بس اهم حاجة ان يكونوا لايقين على بعض.

4. أعمال فنية: الحيطة الفاضية مش عاطفية ابداً, حطي براويز مثلا او اي حاجة حباها و تكون ليها طابع شخصي كمان بتمنع صدى الصوت فبيزيد إحساس الدفء في البيت.

5. المرايات: ممكن تضيفها لتوسيع مساحة الغرفة كمان ممكن تضيفي عليها مصابيح اضاءة صغيرة دافية و لاحظي الفرق في الاوضة

6. رائحة لطيفة: من اكتر الحاجات اللي بتسيب أثر حلو جوانا لما بندخل أي مكان هو أن تكون ريحته حلوة و اكيد هنحتاج نعمل كده في بيتنا , ممكن تستخدمي الشموع المعطرة او تحطي معلقة صغيرة من الفانيليا جوه الفرن أو تغلي قرفة على النارده هيخلي البيت ريحته حلوة و كمان دافي.