19 سبتمبر 46 0  

هل الألم لازم يبقى جزء من الحياة؟

الإجابة آه، الألم جزء حتمي من الحياة بس اللي اكتشفته إن الألم في حياتنا أنواع!

ألم التزام على تعلم مهارة جديدة أفضل من ألم الندم انك لسه مكانك، ألم مواجهة أى شخص أو حاجة تاعباك بدل ألم جلد الذات أو بدل الكبت وشعورك انك ضعيف فتبقى كاره نفسك وكاره حياتك بكل ما فيها.

 

الالتزام مثلا عملية مؤلمة جدا ومجهد جدا بس نتيجته انك حاسس بقيمتك انك حاسس انك عيشت وجربت وحاولت تستغل وتستكشف قدراتك وامكانياتك اللى ادهالك ربنا.

وكذلك ألم التخلى مؤلم وقاسى ولكنه أهون من التمسك بحاجة أو شخص عشان بس خايف تفقده ويبقى بيحركك الخوف وزمام حياتك كلها هتبقى ف ايد حد تانى وفى النهاية هتخسرهم برضة وهتتألم ألم الفقد.

واها الاتنين ألم بس ألم التخلى فقد بارادتك وقرارك فقد وانت مؤهل لفكرة الفقد والاتنين هتحزن بعد الفقد بس الفرق ان ده حزن بارادتك وميقهرش قلبك.

وهتشوف ان الفقد ده ليه مكسب من ناحيه تانية وان اللى خسرته دلوقتى هيجى مكانه الأفضل ليك وهتكون مؤهل لوجوده وجاهز تتعامل معاه.

 

كان فى مشهد فى مسلسل اسمه O.A على نتفلكس المشهد ده من يوم ما شوفته وهو محفور ف ذاكرتى المشهد مدته دقيقتين بس بس شرح معنى تقبل الألم، باختصار بطله المشهد ده اتاخد منها الكاميرا بتاعتها واللى خد منها الكاميرا معاه كلب كبير حجما وهى بتخاف جدا من الكلاب وهو طبعا بيستغل الكلب عشان تمشى ومتاخدش الكاميرا، البنت بتتردد لحظات وبعدها بتصمم تاخد الكاميرا وهنا بيخلى الكلب يهاجمها وبيعضها فى ايدها وبعد ما البنت تدرك ان مفيش مفر وان محدش هينقذها بتعض الكلب! أيوة زى ما قريت كده بتعض الكلب والكلب بيصرخ وبعدها الكلب بيسيبها وهى بتحضن الكلب! ووبتقوم من على الأرض تاخد الكاميرا وتمشى والكلب بيمشى وراها هى ومبيرجعش لصاحبه!

 

 

طيب هو ايه اللى حصل ده؟!

ببساطة هى اختارت تتألم بارادتها وتواجه الكلب اللى هو تجسيد لخوفها عشان تاخد الكاميرا وقبلت وجوده، ولا انها تتألم انها ضعيفة وتمشى من غير ما تاخد الكاميرا بتاعتها.

فى النهاية هنتألم بس الشطارة انك تختار تتألم ألم لأجل التئام جروحك ألم لأجل تحقيق مكاسب ليك ووقتها هيبقى للألم مُبررعندك وهتتحمله وهتتخطاه كمان.