21 نوفمبر 2022 259 0  

“جوليريف".. تجربة جديدة ومختلفة للهدايا!

الحب هو العطاء بكل معانيه. والتعبير عنه بيكون شئ عاطفي كبير جدًا. الهدايا من أبسط الطرق للتعبير عن الحب والعطاء، معظمنا بيحس بقيمة الهدية وبفرحتها أكتر من الشخص اللي بياخد الهدية، وده لإننا بنحط مجهود وحب ومشاعر في كل تفصيلة فيها. وبنتمنى على أساسها يحسوا بقيمتهم عندنا، أو إن الهدية تديهم شعور معنوي جميل! من حبها لفكرة الهدايا، بدأت ستيفاني البراند بتاعها المتخصص في بوكسات الهدايا "جوليريف" في مصر. الفكرة جديدة في مصر، بتخليكي تنسي الشكل الممل والمعتاد للهدايا، لإن كل هدية بتقدم تجربة حقيقية وحيوية عشان تعملي بيها ذكريات أكتر كل يوم. عشان كده حبينا نعمل حوار مع ستيفاني، عشان تكلمنا أكتر عن مشروعها وسر حبها لمصر!

إزاي قدرتي تلاقي فكرة جوليريف؟
كنت بعمل هدية لأتنين مرتبطين، فكرة الهدايا من النوع ده موجود عندنا في فرنسا، لكن مكانش موجود في مصر، عشان كده فكرت فيه.

كـفرنسية، إزاي فكرتي تبدأي شغلك الخاص في مصر؟
أنا بحب مصر وبحب طاقتها الإيجابية، وفكرت أعمل حاجة هنا. فكرة الهدايا دي متطورة جدًا في فرنسا لكنها جديدة في مصر. ومصر عمومًا بتساعد جدًا المبتدئين والشركات الناشئة. على عكس فرنسا، اللي لازم يبقى عندك فيها فكرة جديدة تمامًا ومختلفة عشان تقدري تنجحي.

هل المشروع كان ليه تأثير عاطفي عليكي؟ وإزاي؟
أكيد! أنا بعتبره طفلي الخامس. لإن دي حاجة عمومًا بتبدئيها من الصفر وبتفكري فيها ليل ونهار. أنا أكيد ماخترعتش الفكرة لكني بعملها هوية مختلفة، اختيار الشركاء، وكمان عمل الموقع الإلكتروني للبراند. ولسة كمان عندي أفكار للمستقبل! عشان كده لو عندك فكرة لازم يبقى عندك شغف وحب ليها.

ايه العقبات اللي واجهتك لما بدأتي في البراند الخاص بيكي؟
أنا واجهت عقبات كتير، أول حاجة كانت فكرة رأس المال، وهي كانت محدودة جدًا لإني حطيت كل فلوسي يعتبر في المشروع فمش كل اللي خططت ليه حصل. تاني حاجة الفترة اللي بعد إطلاق البراند، بتحسي بشغف كبير بعدها وبتتوقعي إن كل الناس هيشتروا منك وإن البراند هيكبر مرة واحدة.. بس للأسف مش ده بالظبط اللي بيحصل، وده يعتبر أصعب جزء يعني. كمان، بما إن فكرة بوكسات الهدايا جديدة في مصر بتضطري إنك تشرحيها لإن الناس لسة مش فاهماها أوي وده بياخد وقت ومجهود. كمان من ضمن الصعوبات هي فكرة البحث عن العملاء وده بياخد وقت كبير ومش دايمًا بيبقى شئ مجزي. وأخيرًا فكرة التوتر والضغوطات من إنك تبقى لسة مبتدئة، لازم تتحكمي في ده، وأنا ده اللي بتعلمه دلوقتي.


مين أكتر حد كان بيدعمك؟
جوزي هو أكتر حد دعمني. هو كمان شريكي وشجع الفكرة جدًا وساعدني إني أوصل لأحلامي.

لو عندك أطفال، إزاي بتقدري توازني بين احتياجاتهم وبين احتياجات شغلك؟
أنا عندي 4 أولاد، 19 سنة، 17 سنة، 15 سنة، و13 سنة. هما مش أطفال بس في نفس الوقت بيحتاجوا يتكلموا، يشاركوني بأفكارهم عن حياتهم المدرسية أو الجامعية، عن مشاعرهم! وفي حياتي اللي طول الوقت مشغولة، بحاول أقضي وقت أكبر مع كل واحد فيهم من خلال بقى الخروج، نتعشى برا في يوم، نقضي الأجازات والويك إند سوا.

إزاي بتقدري توفقي بين شغلك وبين حياتك الشخصية؟
عيلتي هي الأولوية دايمًا حتى لو الشغل بياخد وقت كبير، لو عرفت إن جوزي أو حد من أولادي مش مبسوطين أنا مش هنجح لإنهم سبب سعادتي وسبب قوتي وأكتر ناس بتدعمني. عشان كده بحاول أوفرلهم احتياجاتهم وفي نفس الوقت هما متفهمين إن شغلي مهم وفخورين بيا ومتفهمين فكرة إني لازم أبقى بشتغل حاجة بكل شغف.

إيه خططك الجاية لجوليريف؟
أول حاجة إني أقدر أتحكم في فكرة رأس المال عشان أقدر أعمل حملات تسويقية، تاني حاجة أزود المبيعات التجارية، تالت حاجة إني أطور الموقع الإلكتروني بتاعي، وإني أقدر أعمل أعمال خيرية بسبب المبيعات عمومًا.

ايه أكتر بوكس قريب لقلبك؟ وليه؟
البرستيج بوكس، لإنه فيه اختيارات كتير، وبيديك الفرصة تكتشف مصر.

ممكن تكلمينا عن مكونات كل بوكس؟
البوكسات بيبقى فيها أكتر من 30 نشاط ليهم علاقة بالرياضة، بالمغامرات، وأنشطة تانية كتير! فيه كمان أنشطة ليها علاقة بالطبخ والمطاعم، فيه أنشطة التأمل واليوجا والتأهيل. في البرستيج بوكس الأنشطة بتتكلم عن فكرة الهروب.

إزاي بتدعمي الستات من خلال مشروعك؟
بساعدهم يوفروا في الوقت في وسط مسؤولياتهم اللي مش بتخلص. وبما إننا معظمنا أمهات وبنشتغل في نفس الوقت، فبيكون من الصعب والمتعب إنك تدوري على هدية ومافيش وقت. جوليريف هو أسهل حل، لإنك بتقدري تطلبي البوكس بتاعك أون لاين وبتستلميه في خلال 48 ساعة.

إزاي جوليريف بيساعد الستات إنها تعبر عن نفسها؟
حوالي 30% من شركائي من الستات، وبحب أساعدهم في شغلهم الخاص وبتمنى كمان إن عملاء جوليريف يعرفوهم لإنهم فعلا عظيمات وبيشتغلوا بجد.

قوليلنا ليه اختارتي مجال بوكسات الهدايا بالذات؟
أنا كنت بدور على هدية لشخصين مرتبطين بس لقيت إن الفكرة دي أصلًا مش موجودة في مصر مع إنها موجودة في فرنسا وكل الناس بيشتروها. الناس بتحب النوع ده من الهدايا، مين مابيحبش المساج، المطاعم، أو أي نشاط تاني مسلي؟ عشان كده التجربة دي هي فرصة عظيمة لعمل ذكريات جميلة لما بنشاركها مع حد. كمان تاني حاجة هي فكرة نوع الهدية نفسها، بعض الهدايا العادية بناخدها وبنشيلها ومش بنشوفها كتير، لكن الهدايا اللي بتبقى عبارة عن تجربة بتفضل عايشة معانا.

إزاي ممكن نختار هدية من النوع دا لحد بنحبه؟
الفلوس المتاحة معاكي هي اللي بتحكم الموضوع أكتر، وعلى حسب ده بتختاري الهدية.