17 مايو 2020 1943 0  

صباح الخير. النهاردة هاتكلم عن مسلسل خيانة عهد بطولة الفنانة يسرا ونخبة عظيمة من الممثلين. تأليف احمد عادل سلطان وإخراج سامح عبد العزيز سيناريو وحوار امين جمال.

المسلسل بيحكي عن انتقام اخ واخت من اختهم من الاب بسبب معاملة مرات ابوهم  السيئة لهم واستيلاءها علي حقوقهم  اللي كان السبب في موت امهم. وطبعا الانتقام كان بشع ادي الي وفاة الابن الوحيد  لعهد  واللي قامت بالدور ده يسرا اللي تفوقت علي نفسها  في هذا العمل. خصوصا في مشاهد  المشرحة والدفن والجنازة و بالمناسبة قام بدورالاخ الممثل خالد سرحان. وقامت بدور الاخت الممثلة هلا شيحة اللي كانت ممكن تستخدم ادواتها احسن من كدة في تجسيد الشخصية اللي بتقوم بها.

في الحقيقة العمل ممتاز في الايقاع والحوار والتمثيل بغض النظر عن اخفاق بعض الممثلين في بعض المشاهد المهمة . عجبني جدا تركيز المسلسل علي موضوع قراءة الفنجال وما تجلبه من مصائب لمن يقرءه.  وانا اعرف ناس كتير بيؤمنوا بالحكاية دي. كمان انا معجبة باداء الممثلة الشابة هنادي مهني، خصوصا بعد وفاة هشام ابن يسرا الي قام بدوره الممثل الجميل خالد انور. و بيومي فؤاد كان له ماستر سين في المشهد الخاص به في المشتل. والممثلة جومانة مراد كانت ممتازة. خلاصة القول: المسلسل ممتاز حتي الان.

 طولت النهاردة عليكوا شوية معلش والي اللقاء في عمل تاني...