29 يونيو 2022 484 0  

Love At First Swipe..Is it true?

التكنولوجيا غيرت كتير في نظرتنا لكل حاجة في حياتنا، من التسوق، الشغل، وحتى الكلام العادي، بس هل قدرت تغير وجهة نظرنا عن الحب؟
الحقيقة إنها بالفعل قدرت تغير وجهة نظر معظم الناس عن الحب، وتحول الحب من صدف ومواقف لطيفة ونظرات وحاجات كتير، لفكرة البحث عن الحب في الأساس. إنك تحط قايمة طويلة من المقاييس والحسابات والمواصفات عشان تلاقي حد تحبه! ولأننا لحم ودم ومشاعر، تطبيقات المواعدة قدرت تفقد الحب جانب كبير من مشاعره وواقعيته وكمان إحساسنا بيه، وبالتالي بعض الناس كان ليهم تجارب سيئة مع تطبيقات المواعدة، من عدم الأمان لشعور بالوحدة أكتر من الأول. عشان كده women's Avenues هتقولك على شوية حاجات ممكن تقابليها لو قررتي تدخلي عالم الـ dating apps.

1- حسابات أو أكونتات وهمية:
بعض الناس ممكن تحط صور مش حقيقية ليهم، ومعلومات مش حقيقية عنهم وعن حياتهم، وبالتالي بيكذبوا وبيقولوا كلام عكس مشاعرهم. وده ممكن يحطك في موقف إنك بتكلمي شخص مش موجود أصلاً في الدنيا، كمان ممكن يكون الموضوع مش آمن لو قررتوا تتقابلوا، وممكن تتعرضي للاحتيال أو النصب، عشان كده لو قررتي تقابلي حد مش عارفاه إلا عن طريق تطبيقات المواعدة أو من السوشيال ميديا في العموم، إنك تقابليه في مكان عام وفيه ناس كتير عشان تكوني في أمان!

2- الاختفاء في أي وقت:
أي شخص بتتكلمي معاه على أي تطبيق من تطبيقات المواعدة ممكن يختفي في أي وقت ومن غير أي مقدمات لو عمل unmatch أو لو مسح الأكونت بتاعه، وكإنه مكانش موجود أبدًا قبل كدا، وده ممكن يزيد من تعاستك بدل ما يخلصك منها، وهيدخلك في دايرة كبيرة من التفكير في كواليس الاختفاء ده أو إيه سببه؟. كمان هيزود شعورك بالوحدة.

3- الاعتماد على المظهر الخارجي:
النجاح في الحياة العاطفية بيتم بطريقة متوازنة ما بين حب الروح والشخصية الداخلية، مع حب الشكل والمظهر الخارجي. الـ dating apps بيكون فيها العكس تمامًا، لإن النجاح بيعتمد بس على المظهر الخارجي، إنك تتصوري بشكل معين، أو إن يكون فيه مقاييس معينة لشكلك. وده ممكن يحطك تحت ضغط إنك لازم تبذلي مجهود كبير عشان تلاقي القبول وتحصلي على علاقة ناجحة.



4- ناس كتير بتكون مختلفة على الحقيقة:
معظم مستخدمي الـ dating apps بيختاروا أفضل الصور ليهم أو بيعدلوا عليها باستخدام الـ filters، وده بيخلي شكلهم مختلف جدًا في الواقع في حين إنك بتبني ليهم صورة معينة في عقلك عكس صورتهم الحقيقية، كمان بعض الناس بتكتب صفات مش حقيقية عنهم أو اهتمامات مش حقيقية.

5- التواصل مش بيتم بشكل طبيعي:
التواصل على الـ dating apps أو السوشيال ميديا في العموم بيكون مش طبيعي، لإننا مش شايفين الشخص اللي بنكلمه، مش قادرين نشوف طريقة كلامه، ردود أفعاله، صوته، ونظراته أو تعبيرات وشه. وده بيخلينا نتصدم لما نشوف الشخص على الحقيقة! التواصل لما بيتم بالطريقة المعتادة، بنقدر نعرف من أول مرة الشخص ده مناسب لينا ولا لأ!

6- مش دايمًا هتلاقي علاقات حقيقية من خلاله:
معظم مستخدمي الـ dating apps بيستخدموه عشان يملوا فراغ معين أو عشان يلاقوا اهتمام مش لاقيينه في حياتهم، فبالتالي معظم الناس مش بتكون داخلة لهدف جادي أو عشان يلاقوا علاقات حقيقية سواء علاقات عاطفية أو حتى علاقات الصداقة.