03 أكتوبر 2022 377 0  

السرير مش ساحة حرب!
مؤخرا طول الوقت بنتكلم عن اهمية تغيير صورة المرأة في نظر الرجالة كحل للعنف الاسري و العنف ضد المرأة عموما. بس معظمنا بينسي او بيتناسي ان صورة المرأة عمرها ما هتتغير في نظر الرجالة غير لما صورة السكس تتغير الاول في نظرهم. منين هنغير نظرة الراجل للست علي انها سلعة من غير ما نغير نظرته للجنس علي انه بضاعة؟

كتير من الرجالة بتشوف السكس علي انه عار، هزيمة، خناقة، عنف و ضرب. حاجة بتشتريها بالفلوس، ففي نظرهم كل الستات عاهرات. يا عاهرة بننام معاها و نشتهيها يا ماما نحترمها و تحافظلنا عالبيت فبالتالي ممنوع عليها تتكلم في السكس او حتي تعوزه عشان هي ست محترمة مش زي اللي برة دول.

الرجالة محتاجة تتربي علي ان السراير مساحات للحب مش مساحات للمعارك اللي دايما لازم هو اللي يفوز فيها و اللي معاه محطوط عليها و متخيطة من بعده. بضاعة تلفانة تحمد ربنا انه لسه بيبصلها كل يوم و يطلع بره يدور علي سلعة جديدة بالسلوفانة او عاهرة جديدة يفضي فيها نوع شهوة مش قادر يفضيه في الست الكبارة اللي بتربي عياله فالبيت.

السكس، اللي هو ترجمته ممارسة الحب، غرضه الاول و الاساسي في الجنس البشري هو التواصل مش التكاثر. عشان كدة ربنا امرنا انه ميكونش عمال علي بطال مع اي حد. بل و خلاها خطيئة لا تغتفر غير بتوقيع حد. عشان احنا مش حيوانات. و السكس بيننا بيعزز قيم المودة و الرحمة اللي ربنا ميز الجواز بيها. فمنين ده الغرض منه و منين اتحول و بقي بهذا الكم من العنف؟ من خلال التربية. الجنس خطيئة، فبالتالي هو وحش، فبالتالي الست هي اللي تتحكم لانها صاحبة غشاء البكارة، فبقت اللي تسلم عاهرة، و اللي توافق مومس، و الراجل واقف قدام الفترينة مش عليه حاجة غير انه يختار، لان شهوته اعلي من شهوة الست (و دي معلومة علميا و دينيا خاطئة تماما بالمناسبة)، عرفنا ازاي؟ عشان ربنا سمحله يتجوز 4، بشروط؟ علي قول بعض اهم الشيوخ: لا، علي كيفه، مع ان القرآن بيقول عكس كدة. كل دي تراكمات ادت للي احنا فيه دلوقتي. و عشان السكس عيب و خطيئة و البنت بتتختن عشان متعوزوش، بقي الكلام في السكس ممنوع. و الطفل اللي يسأل ندور ازاي منجاوبش عليه. و اللي يقع عليها اعتداء لازم تخبي، لانها كدة بقت بضاعة معيوبة، هو في حد بيشتري منتج مفتوح؟

يوم ما السكس يتحول من "زنقتها، كسحتها، نطيت عليها" ل "حضنتها، لمستها، بصيت في عينيها" الست هتبقي غالية و عزيزة و محدش هيقرب منها بل و هيرجع المجتمع تاني يحميها. خلونا نبدأ بنفسنا و نربي عيالنا تقرف من الولد اللي يتنمرعالبنت او يبص عليها بشكل مخزي او يعريها بعينيه. و نربيهم أن معيار الرجولة في دماغهم مش بين رجليهم.