10 مارس 2020 2530 0  

من وانتي صغيرة،ومن أول ما بتبتدي تفهمي الكارتون،بتبدي تحلمي بالأمير الوسيم،الأمير الي هيحارب عشانك التنانين،والساحرة الشريرة، ومراتات اللأب المتوحشين لحد ما يفوز بحبك.وبعدين لما تبتدي تدخلي سن المراهقة،تبتدي بقي تتفرجي علي الأفلام الرومانسية،والي بتاخد احلامك لمستوي تاني خالص. بتبدي تحلمي بقي بالحبيب الي هيموت لو بعد عنك والي مستعد يضحي بأي حاجة في حياته عشان سعادتك،بتحلمي بانك تعيشي أسعد حياة.حياة مليانة أحضان وقبلات ،مواعيد غرامية،مفاجآت، ورومانسية طول الوقت وغيرها وغيرها من الخرافات الرومانسية الي اتزرعت في عقولنا وقلوبنا.

وبعدين لما تكبري كمان وتجربي الحب، و طبعاً متلاقيش الأمير الوسيم أو الحبيب الي مبينامش الليل من التفكير فيكي،بتبتدي تتنازلي عن شوية منأحلامك عشان تبقي علي مقاس الواقع الجديد.بتقبلي باقل من الي حلمتي بيه،وبتققلي من توقعاتك،وانتي لسة مليانة بالأمل ،ومستنية تلاقي الشخص الي يفهمك،يتكلم معاكي ويحلم يكمل باقي عمره جمبك. وتبتدي حلمك الجديد بحياة زوجية رائعة،وبتبني معتقداتك دي علي فكرة انك انتي بس الي مسئولة عن نجاح زواجك وسعادتك،انتي بس الي ممكن تحولي حياتك لقصة خيالية ،وبيتك لعش حب سعيد.

وتبتدي تكبري الفكرة،وترعيها وتحوليها لحلمك الجديد للسعادة.الحياة الي تخليكي تخلصي من القيود العائلية،تبقي ملكة في بيتك ،وتقضي وقت رومانسي مع حبيبك،تنامو في حضن بعض تتكلموا طول الليل،وتصحي علي حب،فطار في السرسر،عشاء علي ضوء الشموع ومع بعض في كل حاجة.

وعشان الحلم الجميل الخيالي ده، بتبدي تتخلي عن شوية  كمان من توقعاتك ،وتتنازلي تاني وتالت ورابع،وانتي بتقنعي نفسك ان كل ده هيتغير أول ما تدخلوا العش السعيد.

وبالرغم من انك بتشوفي أيام صعبة جدا قبل فرحك بشهرين تلاتة (90% تقريبا من المخطوبين بيحصلهم كدة) بتنحطي فيهم تحت كل أنواع الضغط والخناقات الي خلقها ربنا علي أي حاجة وكل حاجة والي بتوصل ساعات لمرحلة التفكير في الانفصال.برضه بتفضلي متمسكة بقناعاتك عن الحلم الوردي للجواز.

ويجي يوم الفرح،أخيراً احلامك هتحقق بقي،ولو كنتي من المحظوظين،مش هتتخانقي خناقة يوم الفرح الأليمة( حوالي 2% من المخطوبين للاسف بيكونوا مش محظوظين)و الليلة هتعدي بسلام وبذكريات جميلة.

وبتدأ حياتك الجديدة،حلمك.بتقضي أيام حلوة،كلها سعادة.وممكن كمان يجيلك الفطار في السرير مرة ولا اتنين.

و تيجي أول خبطة ،بتخلص الأجازة،ولحظة واحدة...هو ايه الي حصل ده؟

فجأة بتكتشفي انك مش هينفع تصحي علي بوسات رقيقة ولا يجيلك الفطار في السرير لو كنتي انتي الي مسئولة عن الصحيان كل يوم وطول الوقت.وبتكتشفي انك بتبقي لوحدك طول اليوم وهو مشغول ومينفعش يتكلم.والمكالمات بتقل كل يوم عن الي قبله.واما يرجع البيت بيكون تعبان طبعاً،يمكن عنده صداع،أو مشاكل في الشغل،فالكلام بيقل أكتر وأكتر .

وبعدها،تيجي الخبطة التانية،انتي حامل،متلخبطة ،محبطةوتقريباً لوحدك خالص.مفيش فرصة تتكلمي عن مشاعرك.وبعدها يجي البيبي ،الكلام شبه منعدم،المجهود أكتر بكتير،وحدة،غضب،غياب،هو فيه ايه بالظبط؟

بتكتشفي تاني انه مينفعش تعملوا عشاء رومانسي علي ضوء الشموع ببيبي في ايدك ومسئوليتك لوحدك،ومينفعش تناموا في حضن بعض لو هو بيسيبلك الأوضة وينام في أوضة تانية عشان زن البيبي وعياطه بيصحيه من النوم وهو محتاج يرتاح عشان عنده شغل!!  مينفعش تسهروا طول الليل تتكلموا سوا لو هو بيسيبك برة مع بيبي صاحي وفايق ،وطبعاً مينفعش تتكلمي عن مشاعرك لأنه ممكن جداً يروح في النوم بعد الأكل علطول لأنه مرهق جداً!!!

وساعتها،بتكتشفي الحقيقة،يمكن متأخر شويتين..انك مش مسئولة لوحدك عن نجاح الحياة الزوجية أو سعادتك فيها، بتفهمي ان الجواز محتاج مجهود من الطرفين عشان ينجح. وان لو انتي بتقدري تطبقي يومين ورا بعض بتنضفي وتطبخي و تخلي بالك من الولاد وتشتري طلبات البيت يبقي أكيد الراجل يقدر يعمل أد ده مرتين.

وعلي أد ما الاكتشاف ده بيكون محبط ومستفز،علي اد ما معرفة ان ده تقريباً حال المتجوزين كلهم الا ما رحم ربي بيهون الموضوع شوية،لأنك بتفهمي ان المشكلة مش فيكي،دي في مفهوم الناس الغلط عن الجواز والحياة الزوجية.

الخلاصة:

متتنازليش،متضحكيش علي نفسك وتفتكري انك أذكي من كل الي قبلك ومنهم مامتك انتي شخصياً. أخلقي لنفسك حياة خاصة بيكي،متبنيش سعادتك ووجودك علي وجود شريك حياتك ،لأنك بكدة بتظلميهم هما كمان.

أعملي قواعد لحياتك،أهداف لجوازك واتكلمي مع شريك حياتك عن الأهداف دي،مش مفروض يكونوا مسئولين عن توقعاتك الي ميعرفوش عنها حاجة،مينفعش تعاقبيهم علي غلطة انتي الي عملتيها من الأول.

أما انتو،يا رفيقات الاحباط الزوجي، حاولوا تركزوا علي الجوانب الحلوة في الموضوع ،استمتعوا بنص الكوباية المليان. العمر لسة قدامكوا..