04 يوليو 2022 487 0  

 

أوماريوم: الحب بيدفعك للنجاح.

مفيش سن محدد عشان تبدأي في البيزنيس الخاص بيكي، و الموازنة بين الكلية و الكاريير تحدي مش سهل ابداً، لكن حبك للشيء اللي بتعمليه هو المفتاح للنجاح اللي نفسك تحققيه.
مريم هي بنت عندها 20 سنة بتدرس علم نفس، و أختارت تمشي ورا حبها للفن وتحوله لحقيقة وواقع ملموس، و من أول يوم للبيزنيس بتاعها مريم عمرها ما وقفت إنها تبذل مجود كبير في شغلها أو أنها تعمل بحث قوي عشان تقدر تعمل حاجة مميزة كل مرة.
النهاردة هنقابل مريم و نتكلم معاها أكتر عن مشروع الهاند ميد الخاص بيها أوماريوم اللي جمعت في بين الحب للهاند ميد والشغف للكاريير، يلا نبدأ.

في البداية احكيلنا منين جتلك فكرة البيزنس بتاعك؟

انا بحب الفن، والرسم كان هوايتي من وانا صغيرة لكن بعد فترة لقيت نفسي منجذبة اكتر للديكور والتصميم. انا وقعت في حب الشغل الهاند ميد وفكرة إن كل قطعة بتتعمل بتكون مميزة حتى لو كانت نفس الشكل. من هنا جاتلي فكرة أوماريوم. انا بفضل وقت كتير جداً بختار الخامات وبعمل الشغل نفسه لكن عمري ما حسيت بتعب من ده لأني بحبه.

ايه كان سبب شغفك لشغل الهاند ميد؟

لما بهادي صحابي بحب الهدية تكون مميزة وقريبة ليهم و لاهتماماتهم وأنها تكون معمولة بحب. ده كان بداية شغفي للهاند ميد ومن وقتها قررت اني اساعد الناس تعمل هدايا مميزة للناس اللي بيحبوها.

ايه الصعوبات اللي واجهتك لما بدأتي؟

انا في سنة 2 كلية قسم علم نفس، كان صعب جداً  الموازنة بين الشغل والدراسة لأن كل قطعة بتاخد وقت كبير جداً عشان في النهاية تكون قطعة مميزة،  كمان غير الشغل والكلية انا مهتمة بالبحث العلمي وانا مؤسسة لمبادرة بتدعم البنات المعنفات و المبادرة دي اتكرمت من اشوكا الوطن العربي و وزيرة التضامن الإجتماعي في حفل لصناع التغيير.

 

تحبي تقولي ايه للستات اللي عايزين يبدأوا مجال الهاند ميد ومترددين؟ وايه اللي محتاجينه عشان يبدأوا؟

اكتر حاجة مهمة هي إنهم يكونوا بيحبوا اللي بيعملوه لأن أول ما تحب حاجة هتعمل كل اللي تقدر عليه عشان تخليها مميزة و هتستحمل كل الإرهاق والتعب والمذاكرة المستمرة عشانها.

دلوقتي انا عارفة حاجات كتير عن النجارة والخيوط و الزجاج والمرايات، حاجات انا مش مهتمه بيها لكني مهتمه إني اخلي المنتج اللي بعمله مميز ويفضل مع الناس اللي بتشتريه لسنين ويفضل بشكل حلو.

ابدأي حتى لو مش كل حاجة مثالية، وحتى لو الميزانية بتاعتك مش كبيرة ، أهم حاجة تقدمي للعملاء بتوعك أفضل تجربة. ودايمًا حافظي على شغفك.

ايه اقرب قطعة عملتيها لقلبك، وليه؟

هي مش قطعة، ده كان اول اوردر ليا، وذكرى مميزة بالنسبالي. كان في 2019 وكنت لسه فى ثانوية عامة وكان صعب جداً إني انزل واشتري الخامات واخد من وقت مذاكرتي.
الاوردر ده كان برطمان فيه 365 رسالة وكل رسالة ليها ميزة خاصة وكان في كارت فيه مجموعة من الرسايل كمان. هي كانت حاجة صغيرة لكنها مميزة جداً لأنها هدية هتفضل تستعملها طول السنة.

إزاي بتوازني بين الشغل وحياتك الشخصية؟

الموضوع أخد مني وقت كتير وكنت بحط خطط كتير جداً في بينجح وفي بيفشل واستخدمت ابليكيشنز وقريت كتب كتير عشان تقدر تساعدني، جربت حاجات كتير ولسه بحاول.

ايه النصيحة اللى تحبي تقدميها للستات اللى عايزة تبدا المشروع الخاص بها؟

اعملي حاجة بتحبيها. خدي خبرة مش بس في الحاجة اللي بتعرفي تعمليها لكن بردو في الحاجات اللي ليها علاقة البيزنس بتاعك زي التسويق، لأن ده اللي هيساعدك في شغلك، لانك حتى لو شاطرة وموهوبة في الحاجة اللي بتعمليها مش هيفيدك غير لو بتعرفي تسوقي لشغلك.
وأهم حاجة هي إنك تستمري حتى لو وصولك هياخد وقت.

ايه خطتك الجاية البيزنس بتاعك؟

انا دلوقتي شغالة في الاسكندرية حابة أكون موجودة في كل المحافظات. وصلت اوردرات في القاهرة ومحافظات تانية لكن التوصيل بياخد فلوس كتير و مبيبقاش مضمون أن المنتجات هتوصل في حالة كويسة.

شوفي كاتالوج المنتجات على واتساب : https://wa.me/c/201204368266