14 نوفمبر 2022 289 0  

في اليوم العالمي للتوعية بمرض السكر..حاجات مهمة لازم نعرفها عن المرض

النهاردة اليوم العالمي للتوعية بمرض السكر، اللي غالبًا في كل عيلة لازم بنلاقي حد مصاب بالمرض ده، لإنه بيعتبر من أكتر الأمراض المزمنة المنتشرة بين الناس. المرض بيحصل بسبب نقص في إفراز هرمون الإنسولين أو عدم إفرازه أصلاً بسبب مشاكل في البنكرياس، وده بيسبب عدم سيطرة على مستويات السكر في الدم.  وصل أعداد مصابي مرضى السكر في العالم 422 مليون والمرضى في زيادة كل سنة! وفي اليوم العالمي للوقاية من مرض السكر، هنقولكم عن أنواع المرض وأعراضه وطرق الوقاية منه.   

 

أنواع مرض السكر:

مرض السكري النوع الأول:

النوع ده بيكون فيه الجسم مش قادر يفرز هرمون الإنسولين. لإن جهاز المناعة بيهاجم البنكرياس وبيخليه يعجز عن إفراز الأنسولين وبالتالي بيفقد الجلوكوز قدرته على دخول الخلايا وبيبدأ يتراكم في الدم. النوع دا بيصيب الأطفال والشباب الأقل من 30 سنة.

 

مرض السكري النوع التاني:

في النوع ده الجسم بالفعل بيقدر يفرز الإنسولين، ولكن الخلايا مش بتقدر تتعامل معاه بالفاعلية المطلوبة، ودي الحالة المعروفة بمقاومة الإنسولين. النوع ده منتشر أكتر بنسبة 90% وبيصيب الأفراد في أي مرحلة عمرية.

 

مرض سكر الحمل:

النوع ده بيصيب السيدات في فترة الحمل، وبيعتبر من النوع التاني. وفي معظم الحالات بيتم الشفاء منه بعد الولادة. ولكنه بالفعل بيحتاج متابعة عشان ميأثرش على الأم أو الطفل

 

أعراض بداية مرض السكر:

- التهابات في المسالك البولية

- التبول المتكرر

- فقدان الوزن أو زيادته بشكل كبير

- الغثيان والقئ

- عدم وضوح الرؤية

- وخز في اليدين أو القدمين

إزاي ممكن نحمي نفسنا من مرض السكر؟

1- نحافظ على جسم ووزن صحي، وده لإن السمنة وزيادة الوزن بتزود من خطر الإصابة بمرض السكر من النوع التاني.

2- نحافظ على ممارسة الرياضة، لإن الحركة والرياضة زي المشي بتساعد على تنشيط الجسم وبتحسن من قدرة العضلات على استخدام الإنسولين وامتصاص الجلوكوز. الدراسات كمان أثبتت إن المشي لمدة 30 دقيقة كل يوم هيقلل من خطر الإصابة بمرض السكر بنسبة 30%.

3- الامتناع عن التدخين، وده لإن التدخين بيزود من خطر الإصابة بمرض السكر من النوع التاني بنسبة 50%.

4- تناول الأطعمة الصحية: النظام الغذائي الصحي بيقدر يقي من خطر الإصابة بمرض السكر، الحبوب الكاملة، الشاي والقهوة قليلي السكر، تناول الدهون الصحية، الأسماك، الأطعمة الغنية بالألياف.