09 سبتمبر 2021 1477 0  

بيريود! ايه الكلمة الأبيحة دي 

 

النهارده صحيت من النوم و بدأت أتجول في كل أبلكيشن شوية كالعادة و جيه دور تويتر. فضلت اقلب من غير تركيز لحد ما لقيت تويت فيها سكرين شوت من جروب على فيسبوك، حد بيسأل الناس على موقف حصله و محتاج يسمع رأيهم عشان مش عارف الموقف ده طبيعي ولا لا، عشان مامته بتقوله انه لأ مش طبيعي!

ايه الموقف ده يا ترى؟ الموقف كالاتي " طبيعي خطيبتي تقولي عندي البيريود مش هعرف انزل معاك ؟ ما تقول (عيانة) ليه تدخل في تفاصيل ولا ده عادي عشان حكيت (لماما) عايزاني اسيبها".

 

الموقف ده دخل في حوارات مختلفة حبيت أتكلم معاكم عنها شوية : 

1- هل البيريود كلمة أبيحة؟ 

2- هل البيريود مرض؟

3- ليه يقول لماما أن خطيبته عندها البيريود؟

 

الستات في المجتمع العربي بيحسوا دايماً بالاحراج من شيء طبيعي و شهري بيحصلهم لأن المجتمع ربط دورتهم الشهرية بالقرف و ان الست في الفترة دي بتكون مش نظيفة و لازم الراجل يبعد عنها وقت دورتها الشهرية. من هنا بدأ الهوس الشديد بالدورة الشهرية و الخوف و الكسوف من الكلام عنها، أو إننا نداري أي حاجه تتعلق بيها زي الكيسة السوداء كأنها واقع مخجل. الحقيقة أن الخوف مكنش بدايته كلام الست مع الراجل عن وقت الدورة الشهرية وآلامها، لكن ده بدأ مع الأمهات!

نسبة كبيرة من البنات قبل دورتها الشهرية مكنتش تعرف اي حاجه عنها، و ممكن تصحى من النوم أو تكون ماشيه في الشارع وتلاقي سيل من الدم حواليها متعرفش مصدره ايه، و تبدأ تترعب من أن يكون حصلها حاجه و هتموت دلوقتي حالاً. وده سببه كسوف الأمهات من الكلام مع بناتهم عن الدورة الشهرية و ايه اللي هيحصل فيها و الاكتفاء بتسميتها بـ "البتاعة" او "الحاجة" او "الاكس" او اي اسم تاني غير اسمها الحقيقي عشان ميصحش!
أنا مثلاً عرفتها من إعلانات (أولويز) ليس إلا و الحماية 8 ساعات من التسرب و مجاش في بالي وقتها هو ايه يعني اللي هيتسرب غير البيبي!

السبب التاني اللي خلي البيريود من التابوهات اللي مينفعش نتكلم عنها وإلا نوصم بقلة الأدب هو أن البنت بدأت مرحلة البلوغ وأصبحت جاهزة للتزاوج و التخصيب رسمياً فلازم نحرص عليها و نبعدها عن أي راجل ممكن يضيع عود الكبريت اللي بنحافظ عليه من سنين لأن جسم الست مش ملكها ده ملك جوزها أيا كان جاي امتى وده يترتب عليه ان اي حاجة ليها علاقة بمرحلة البلوغ بتندرج تحت قلة الأدب.

طيب عرفنا دلوقتى ايه سبب أصل الحدوتة و منين جت فكرة أن البيريود شيء ممنوع الكلام عنه و اللي تعمل عكس كده تبقى بنت قليلة أدب.
طيب هل ده يخلي البيريود كلمة (أبيحة) فعلاً أو مرض شهري لازم نخجل منه؟  الإجابة طبعاً لا.

المؤشرات الحيوية للدورة الشهرية هي جزء مهم من صحتنا الجسدية كستات و في نفس أهمية نبضات القلب. الدورة الشهرية مش بس فترة الحيض اللي بتستمر في الغالب من 3 لـ 7 أيام كل شهر، لكن في 3 مراحل كمان مهم نعرفهم هما مرحلة التكاثرية اللي بتبدأ بعد مرحلة الحيض و مرحلة التبويض و المرحلة الصفراوية، دي مراحل فيها الرحم بيجدد نفسه ويجهز نفسه خلال الشهر لاستقبال الجنين ان تم تخصيبه، أو يعيد نفس المراحل لشهر تاني، و هكذا.

المراحل دي هي سر استمرار الحياة بدون مبالغة. الستات بتعيش طول حياتها بتلف حوالين الدورة دي لحد ما تنقطع في سن معين و ده جزء من  تكويننا و هويتنا مش لازم ابداً نخجل منه لأن ده الشكل اللي خلقنا به ربنا و كل اللي المفروض نعمله اننا نفهم جسمنا و نفهم ان ده جزء مننا و منسمحش لأي حد يحسسنا بالقرف و الخجل بسبب شيء طبيعي.

و نيجي لاخر جزء هتكلم عنه وهو أن أكيد هيبقى ربنا نجدها نوسة عشان خطيبها سابها بعد ما قال لمامته أن خطيبته أستغفرالله العظيم يارب قالتله أن عندها (البيريود).