08 مارس 2020 2119 0  

شغف السفر بيتشارك فيه عدد كبير من الناس، والتدوير علي اماكن جديدة مبيخلصش. عشان كدة، لو انتي بتدوري علي اماكن جديدة تكتشفيها، جبنالك قايمة بالاماكن الي لازم تشوفيها:

1.بحر النجوم على جزيرة فادهو: جزر المالديف

جزر المالديف احسن مكان لو عاوزة تكوني وسط الجمال الرباني، بس جزيرة فادهو في المالدف بتعتبر فعلا جنة علي الارض، وده بفضل ظاهرة بحر النجوم. ممكن تتمشي علي الشط بعد الغروب وتشوفي النجوم بتلمع جوة البحر. والسر هو ان النباتات البحرية هناك بتنور و بتشع باللون الازرق. وده بيخلي المنظر رومانسي جدا و رائع.

2.مرجيحة اخر الدنيا، بانوس، اكوادور:

لو كنتي بحبي المغامرة ايه ممكن يكون ممتع اكتر من المرجيحة الي في "كاسا دل اربول" في الاكوادور. بيت شجرة متهالك علي ارتفاع 2600 متر، بيطل علي بركان "تاجوراهوا" النشط. و المرجيحة ملهاش سرج. فلو كنتي بتحبي الادرينالين، لازم تروحي وتركبي المرجيحة وتتمتعي بالمنظر البديع. اما لو مكنتيش من النوع المغامر، فالمكان برضه مناسب جدا عشان تقضي يوم وسط الطبيعة والمنظر الخلاب.

3.كهف "سكافتافل"، ايسلندة:

المكان ده بيعتبر جنة للي بيحبوا التسلق، اسمه كمان كهف الكريستال، بيظهر لما بتتقابل الانهار الجليدية مع الشط. والظاهرة دي بتحصل بس في شهور الشتا و بتعتبر عجيبة من عجايب الطبيعة الخلابة. ف يلا جهزي بوت التسلق بتاعك واتقل لبس عندك وروحي لتجربة مذهلة مش هتنسيها ابدا.

 4.تكوين "زانجي دانكسيا" : جانزو، الصين:

لو كنتي فنانة، او بتقدرى اللوحات الفنية يبقي مش لازم تفوتي المنظر دة.

التحفة الفنية دي عاملة زي اللوحة الزيتية بكل المنحدرات الحمرا و التلال الملونة. الخبراء بيقولوا ان الوان التلال دي من الرمل الاحمر والمعادن الي بتعود للعصر الحجري من اكتر من 24 مليون سنة.

الوان "زانجي دانكسيا" بتختلف حسب ظروف الجو. واحسن وقت تزوريها فيه من يونيو لسبتمبر، اما باقي السنة فبيكون جاف جدا وفي الشتا الجو بيكون تلج.

5.حديقة "لينكويس ماراننسس" الوطنية في البرازيل

المكان ده من الاماكن الي بتحول السفر لرحلة خيال..مكان مش ممكن تتخيليه.

رمل ابيض ساحر مليان بالاف الكثبان الرملية مليانة مياه شفافة من موسم المطر. من كتر جمالها صعب تصدقي انها حقيقية. تحسي انها مش من العالم ده. بس من حسن حظنا ان المكان ده حقيقي. ومستنيكي تروحي تشوفيه. لكن لازم تشوفيه مابين يوليو وسبتمبر وده وقت تكوين البرك دي. لان بمجرد دخول الموسم الجاف المياه دي بتتبخر و نص السحر بيتبخر معاها.