12 سبتمبر 2022 248 0  

كتير بتيجي عليكي فترات بتحسي بإرهاق نفسي وبدني، مع مشاعر قلق وأفكار سلبية كتيرة. ده بيظهر على شكل ألم في أنحاء متفرقة من جسمك زي الساقين، الثدي، أسفل البطن، وألم نفسي مفاجئ بييجي في شكل غضب، قلق، المزاج المكتئب. بتبتدي تفكري في سبب لكل اللي بيحصلك ده لحد ما بتفتكري إنك في فترة ما قبل الدورة الشهرية!

معظم الستات بتحس بكتير من الأعراض دي، لكن أكتر الناس عرضة ليهم هما اللي في سن العشرينيات لحد أواخر الأربعينيات. الدورة الشهرية بتستمر عند الستات من 3 لـ 7 أيام، مع 5 أيام قبلها في فترة الـ PMS، يعني الستات بتفضل حوالي 1\3 عمرها بتعيش في أعراض نفسية وجسدية مؤلمة!

متلازمة الـ pms هي أعراض بتيجي للستات قبل الدورة الشهرية. وبتختلف الأعراض دي من الشهية الكبيرة للأكل، الإرهاق، ألم في الجسم، ألم في الثديين، وتقلبات مزاجية وأحيانًا اكتئاب. وده بيحصل بسبب ارتفاع أو انخفاض لمستويات الهرمونات الأنثوية في الجسم زي هرموني الإستروجين والبروجسترون. مكتب HSS لصحة المرأة وضح من خلال تقرير إن أعراض ما قبل الحيض بتزيد مع تقدم العمر، وبتبقى شديدة أكتر في  سن الأربعينيات والخمسينيات.
الأبحاث كمان وضحت إن 3 ستات من كل 4 ستات بتجيلهم أعراض ما قبل الدورة الشهرية. ومستوى الأعراض دي بيختلف من ست للتانية، أوقات بتكون الأعراض خفيفة وأوقات بتكون مؤلمة ومعيقة لإنك تكملي يومك بشكل طبيعي.

ولكن اللي مش صح إنك تسيبي الأعراض دي تأثر عليكي، عشان كده هنتكلم على خطوات هتساعدك تخففي منهم.

1- ممارسة الرياضة:
ممارسة الرياضة هتساعدك تخففي من آلام ما قبل الدورة الشهرية. وده بحسب بحث عملته مجلة "فرويندين" الألمانية اللي كمان أكدت إن في الوقت ده عضلات الرحم بتكون منقبضة فبالتالي بتسبب آلام وتقلصات شديدة. الرياضة بتساعد على تدفق الدم في منطقة الرحم وده بيساعد على تخفيف الألم. عشان كده لازم نعمل الرياضة زي المشي وركوب العجل، واليوجا، لإنها مهمة في تدفق الدم للجسم وبالتالي تخفيف الألم.

2- عمل تمارين التأمل:
تمارين التأمل هتساعدك تصفي ذهنك من أي طاقة سلبية وهتساعدك على الشعور بالاسترخاء. والتقليل من معدل ضربات القلب أثناء الراحة وبالتالي هتقلل من أي توتر ممكن تحسي بيه.

3- تجنب بعض الوجبات:
بعض الوجبات ممكن تتسبب في زيادة الأعراض وخصوصًا ألم منطقة البطن، عشان كدا لازم تتجنبي الوجبات اللي بتحتوي على نسبة كبيرة من السكريات، أو الأكلات اللي فيها ملح زيادة أو الوجبات الحارة في العموم.


4- استشيري طبيب:
لو كانت أعراض ما قبل الدورة الشهرية شديدة وممكن تعطلك عن عمل الأنشطة اليومية اللي متعودة عليها، الأفضل استشارة طبيب نساء متخصص عشان يكتبلك العلاج اللازم للتخلص من الأعراض المؤلمة.

5- عدم إهمال الجانب النفسي:
كتير مهما الوقت عدى، بتحسي في كل مرة بالأعراض النفسية للـ pms بتفتكري إنها دايمًا أول مرة، وإن دي نهاية العالم، لكن بتكتشفي بعد كده إن الوقت التقيل ده بيعدي وبترجعي أحسن من الأول. عشان كده حاولي في كل مرة إنك تتقبلي الفترة دي بكل ما فيها وتعديها وتعرفي إنها جزء من طبيعتك، بل إنها مهمة لإنها بتجدد روحك من تاني!