17 نوفمبر 2022 267 0  

العيلة مش دايمًا بتدعم أولادها، أوقات بيبقوا عايزينهم يطلعوا حاجة معينة وبس، وبيحطوا تصورات لشكل مستقبل أولادهم وبيشوفوا إن ده الصح بغض النظر عن أحلام أولادهم الحقيقية. بس لما حلمك يبقى هو كمان حلم عيلتك الموضوع بيبقى مختلف، وانت كمان بتكون أقوى، وبتحس بدعم حقيقي وسند. دي كانت قصة "رو أفريكان" اللي بدأ على إيد 3 أخوات ووالدتهم، اللي شاركوا بعض نفس الحلم وكانوا بيدعموا بعض لحد ما بقى "رو أفريكان" واحد من أشهر ماركات منتجات العناية بالبشرة والشعر في مصر. عشان كده كان لينا حوار مع ياسمين فكري، واحدة من مؤسسات رو أفريكان، عشان تكلمنا أكتر عن البراند وعن رحلة نجاح رو أفريكان وعشان كمان تقولنا على نصايح تجميلية مفيدة.

إزاي وصلتوا لفكرة "رو أفريكان"؟
كان عندنا شغف لمنتجات العناية بالبشرة والشعر وكنا بالفعل بنعمل منتجات كل مكوناتها طبيعية، وبنجربها على أطفالنا لإننا مؤمنين إن المنتجات الطبيعية مفيدة لينا وللبيئة، من هنا بدأنا نفكر في إننا نعمل البيزنيس ده.

إيه معنى "رو أفريكان" أو الاسم بيدل على ايه؟
رو أفريكان هو اسم مباشر جدًا، لإننا في البداية كنا بنبيع زبدة شيا خام، زبدة كاكاو خام، وزيوت طبيعية خام، وكنا بنستوردها من بلاد أفريقية زي غانا وجنوب أفريقيا، فلما عملنا صفحة على الفيسبوك سميناها رو أفريكان، وبالتالي سمينا البراند بنفس الاسم.

ايه العقبات اللي واجهتك لما بدأتي في البيزنيس بتاعك؟
إننا نلاقي أفضل المكونات بأفضل الأسعار وبكميات قليلة.

مين أكتر حد دعم مشروع "رو أفريكان"؟
احنا كمؤسسات البراند 3 أخوات وأم، واحنا بندعم بعض بشكل كبير. كمان جوزي كان له دور كبير في إن الشغل يكبر سنة بسنة.

لو عندك أطفال، إزاي بتقدري تعملي طلباتهم وفي نفس الوقت تعملي اللي شغلك بيحتاجه؟
أنا فعلًا عندي 3 بنات، وبقدر أقسم يومي لجزئين عشان أقدر أوفي احتياجات أولادي واحتياجات شغلي. الموضوع بيعتمد أكتر على إنك تتحكمي في وقتك.

إزاي بتقدري توازني بين حياتك العملية وحياتك الشخصية؟
فكرة التوازن صعبة بصراحة خصوصًا لو عندك بيزنيس خاص بيكي، دا بيخليكي تتعاملي معاه زي البيبي اللي محتاج 24 ساعة اهتمام، حتى لو أنا فاضية بيفضل عقلي بيفكر في الشغل.

ايه خططكم الجاية لـرو أفريكان؟
إننا نكبر أكتر في مصر ونوفر كل احتياجات عملائنا، وكمان نقدر نكبر برا مصر.

ايه النصيحة اللي ممكن تقوليها لست بتبدأ في شغلها الخاص؟
لو عندك فكرة حلوة، أكيد هتلاقي طريقة عشان تقدري تطلعيها للنور، صدقي نفسك وصدقي اللي بتعمليه، خليكي صبورة وخططي كويس.

ايه أكتر حاجة بتركزي عليها لما بتعملي منتج جديد؟
بنركز دايمًا على احتياجات السوق واحتياجات عملائنا، وبنركز كمان على جودة المنتج وفاعليته.


إزاي ممكن تدعمي الستات من خلال مشروعك؟
زي ما وضحت قبل كده إن البراند اتعمل على إيد ستات، وكل اللي شغالين معانا كمان ستات، واحنا مصدقين شغفهم بالشغل وكفائتهم.

قوليلنا نصايح للنجاح لرائدات الأعمال الصغيرات في السن؟
امشي دايمًا بخطوات متسقة وصدقي في نفسك واعملي شغلك بكل حب.

ايه أكتر منتج قريب لقلبك؟ وليه؟
أقرب منتج ليا هو الـ Follicle booster خصوصًا إنه عمل نتيجة كويسة جدًا على شعري بشكل شخصي. ومن الناحية العملية فهو من أكتر المنتجات مبيعًا.

ايه أفضل وقت تقدر فيه الست أو البنت تعتني ببشرتها؟
لازم يبدأوا ده في سن مبكر، خصوصًا البنات الصغيرة لازم يستخدموا غسول يومي للوجه ومرطب مناسب للبشرة. وفي منتصف العشرينيات يبدأوا يستخدموا الكريمات اللي بتحارب علامات الوجه.